Погода
Астана +7 °С
Алматы +14 °С
Курс валют
USD 421.58
EUR 496.83
RUB 5.53
CNY 62.20

Тараздағы бір көшеге Жазылбек Қуанышбаевтың  есімі берілді

28 Октября 2021 08:50

ТАРАЗ. ҚазАқпарат – Биыл екі мәрте Социалистік Еңбек Ері Жазылбек Қуанышбаевтың туғанына - 125 жыл. Данқты шопанның мерейтойы аясында Тараз қаласында Жазылбек Қуанышбаевтың бейнесі суреттелген барельеф мемориалдық тақтаның, «Ауыл шаруашылығы» скверінің салтанатты ашылуы өтті, деп хабарлайды ҚазАқпарат тілшісі.

Шараға ауыл шаруашылығы министрі Ербол Қарашөкеев, өңір басшысы Бердібек Сапарбаев, ардагерлер, Ж.Қуанышбаевтың туыстары қатысты.

Саябақ «Таразға тарту» жобасы аясында ауыл шаруашылығы және ветеринария саласы өкілдерінің қолдауымен абаттандырылған. Сквеор облыс әкімінің бастамасымен екі мәрте Социалистік Еңбек Ері Жазылбек Қуанышбаевтың есімі берілген көшенің бойында орналасқан.




«Екі рет Социалистік Еңбек Ері жоғары атағына ие болған Ыбырай Жақаев, Нұрмолда Алдабергенов, Жазылбек Қуанышбаев жас ұрпақ үшін аянбай еңбек етудің, еңбексүйгіштік пен шынайы патриотизмнің жарқын үлгісі болып табылады. Олардың есімі тек Қазақстанда ғана емес, бүкіл посткеңестік кеңістікке белгілі. КСРО-ның екі мәрте Социалистік Еңбек Ері Жазылбек Қуанышбаевтың туғанына 125 жыл толуына орай, биыл дала академигінің есімі мен мұраларын насихаттау бойынша жұмыстар жүргізілуде. Ол қаракөл қойының тұқымын сұрыптауға және жақсартуға үлкен үлес қосты. Ол өсірген қаракөл қойы шет елдерде жоғары бағаланды. Жазылбек Қуанышбаев еңбекке деген қабілеті мен өз ісіне деген сүйіспеншілігінің арқасында биік белестерді бағындырды. Ол өзінің тәжірибесін жас шопандармен бөлісіп, балаларды жастайынан еңбекке баулыды. Бүгінгі таңда оның жұмыс тәжірибесін тарату, жас ұрпаққа еңбектегі ерліктері туралы насихаттау – аса маңызды», - деп атап өтті облыс әкімі.

Аймақ басшысы жаңадан ашылған сквердің қала тұрғындарының сүйікті демалыс орындарының бірі болатынына сенім білдірді.

Ауыл шаруашылығы министрі Ербол Қарашөкеев те жиналғандарды құттықтады.

«Жазылбек Қуанышбаев қой шаруашылығының дамуына, мал басының өсуіне өлшеусіз үлес қосып, әр жүз саулықтан 130-140 қозыдан алған. Оның қажырлы еңбегінің арқасында сонау құмды өлкеде Қазақстандағы қой шаруашылығының негізгі базасы құрылды. Сол кезде Жазылбек Қуанышбаевтың есімі Одақ аумағында ғана емес, бүкіл әлемге тарады. Қазақ халқының даңқты перзентінің мерейтойы ел Тәуелсіздігінің 30 жылдығымен тұспа-тұс келіп отыр. Жамбылдықтарды шын жүректен қос мерекемен құттықтаймын», - деді Ауыл шаруашылығы министрі.

Мойынқұм аудандық қоғамдық кеңесінің төрағасы Болат Сатыбалдиев атақты қойшы Жазылбек Қуанышбаев туралы естеліктерін бөлісті.

«Жаз-ата бейнеленген барельеф пен саябақтың ашылуы біздің кездің нағыз батырын еске түсіреді. Бұл Жаз-ата ғана емес, ауыл шаруашылығы саласының барлық ардагерлеріне, қарапайым шаруаларға көрсетілген құрмет деп білемін. Ел және облыс басшылығына көрсетілген құрмет пен ықылас үшін алғыс айтамыз. Табандылығымен, еңбегімен бүгінгі игіліктерді қамтамасыз етіп кеткен тұлғалардың есімін жас ұрпақ білуі тиіс», - деді ардагер.


















Автор Сая Сембай
Ключевые слова: Ономастика, Жамбыл облысы, Аймақ, Ауыл шаруашылығы,
Наверх