Погода
Нур-Султан +7 °С
Алматы +14 °С
Курс валют
USD 449.85
EUR 485.43
RUB 5.71
CNY 70.69

قازاقستاندا قوقىسقا تاستالاتىن تەرىدەن تۇرىكتەر جەلاتين وندىرمەك

19 Мая 2022 07:56

نۇر-سۇلتان. قازاقپارات - تۇرىك كومپانياسى قازاقستاندا مال تەرىسىن وڭدەيتىن جانە جەلاتين وندىرەتىن زاۋىت سالماق، دەپ حابارلايدى قازاقپارات اۋىل شارۋاشىلىعى مينيسترلىگىنە سىلتەمە جاساپ.

تۇركيانىڭ Iskefe Holding كومپانياسى الماتى قالاسىندا كومپانيانىڭ جەلاتين ءوندىرۋ زاۋىتىن سالۋدى ينۆەستيتسيالاماق. جوسپارلانعان ينۆەستيسيا كولەمى 27 ميلليون ا ق ش دوللارى. جوبا 2022-2023 -جىلدار ارالىعىندا ىسكە اسىپ، 100-دەن استام جاڭا جۇمىس ورنى اشىلماق. كاسىپورىن يندۋستريالىق ايماعىندا ىسكە قوسىلادى، ال شيكىزات رەتىندە ءىرى قارا مال تەرىسى پايدالانىلاتىن بولادى.

زاۋىت قۇرىلىسى بيىل باستالىپ، 2023 -جىلى پايدالانۋعا بەرىلەدى دەپ بولجانىپ وتىر، ءوندىرىس قۋاتى جىلىنا 7000 توننا جەلاتيندى قۇرايدى.

«ەلىمىزدە تەرىنى باستاپقى وڭدەۋ بويىنشا 9 كاسىپورىن جۇمىس ىستەيدى. ءبىراق، وڭدەۋشى كاسىپورىندار اۋىل شارۋاشىلىعى تاۋارىن وندىرۋشىلەرگە ءىرى قارا مالدىڭ وڭدەلمەگەن تەرىلەرىن ساتىپ الۋ ءۇشىن باسەكەگە قابىلەتتى باعا ۇسىنا الماۋدا. وسىعان بايلانىستى ءىرى اۋىل شارۋاشىلىعى تاۋارىن وندىرۋشىلەر تاۋاردى مۇمكىندىگىنە قاراي ەكسپورتتايدى. ۇساق جانە جەكە قوسالقى شارۋاشىلىقتار جانۋارلاردىڭ تەرىسىن قوقىسقا تاستايدى، ال بۇل ءوز كەزەگىندە اسا قاۋىپتى اۋرۋلارىنىڭ تارالۋ قاۋپىن تۋدىرادى. 7000 توننا جەلاتيندى وڭدەۋ ءۇشىن شامامەن 38 مىڭ تونناعا جۋىق شيكىزات (تەرى) قاجەت»، - دەلىنگەن مينيسترلىك حابارلاماسىندا.

بۇل كەلىسىمگە ق ر پرەزيدەنتىنىڭ تۇركياعا جاساعان ساپارى بارىسىندا قول قويىلعان. جالپى بىلتىر تۇركيانىڭ قازاقستانعا تىكەلەي ينۆەستيسياسى رەكوردتىق كورسەتكىشكە جەتكەن. سونىمەن قاتار مەملەكەت باسشىسى تۇركيامەن اراداعى كەلىسىمدەردى جۇزەگە اسىرۋ جەكە باقىلاۋىمدا بولاتىنىن ايتتى.

ايتا كەتسەك، جەلاتين - مالدىڭ سۇيەگىن، تەرىسى مەن شەمىرشەگىن قايناتۋ ارقىلى الىناتىن اقۋىز زاتتاردىڭ قوسپاسى. جەلاتين جىلى سۋدا جاقسى ەريدى، ال سالقىنداعاندا قويۋ دىرىلدەك ءتارىزدى قوسپاعا اينالادى. تاماق ونەركاسىبىندە، فوتو ەمۋلسيا جاساۋدا، ميكروبيولوگيادا جانە اعاش جەلىمى ەسەبىندە پايدالانىلادى. كوللويدتى ەرىتىندىنىڭ قويۋلانۋى جەلاتيندەنۋ دەپ اتالادى.

Ключевые слова: ةكونوميكا, الةم,
Наверх