Погода
Астана +7 °С
Алматы +14 °С
Курс валют
USD 421.58
EUR 496.83
RUB 5.53
CNY 62.20

جاڭگىردى بيىكتەتۋ ءۇشىن ماحامبەت پەن يساتايدى الاسارتقان جوقپىز - ارمان سقابىل ۇلى

2 Декабря 2021 22:14

نۇر-سۇلتان. قازاقپارات - بەلگىلى پروديۋسەر، «جاڭگىر حان. ساراي سىرى» تاريحي سەريالىنىڭ كوركەمدىك جەتەكشىسى ارمان سقابىل ۇلى تۋىندىدا ماحامبەت پەن يساتايدىڭ وبرازى قالاي بەينەلەگەنىن ايتىپ بەردى، دەپ حابارلايدى قازاقپارات ءتىلشىسى.

Qazaqstan ارناسى تۇسىرگەن 6 تاريحي سەريالدىڭ ىشىندە «جاڭگىر حان. ساراي سىرى» اتتى حيكايا دا بار.

كورەرمەنگە ۇلتتىق ارنا ەفيرىنەن جول تارتاتىن تۋىندىنىڭ كوركەمدىك جەتەكشىسى ارمان سقابىل ۇلىنان جاڭگىر حاننىڭ قايشىلىقتى وبرازى كينو تىلىندە قالاي سومدالعانى تۋرالى سۇراعان ەدىك.

«جاڭگىر حان. ساراي سىرى» سەريالىنىڭ سەناريىن جازعان ءۇش ادامنىڭ ءبىرى رەتىندە، تۋىندىنىڭ كوركەمدىك جەتەكشىسى رەتىندە بۇل ساۋالىڭىزعا بىلاي جاۋاپ بەرە الامىن. ءبىر عانا نارسەنى ايتايىن. ماحامبەت تە، يساتاي دا - ءبىزدىڭ ءىرى تۇلعالارىمىز. ءبىرى - باتىرىمىز، ءبىرى - اقىنىمىز. ولاردىڭ قاسىندا سوۆەت يدەولوگياسىنىڭ داۋرەنى ءجۇرىپ تۇرعان كەزدە جاڭگىر حان وتە ءبىر جاۋىز وبرازدا كورسەتىلگەنىن بىلەمىز. ال تاريحقا ۇڭىلسەڭىزدەر، زەرتتەۋ ەڭبەكتەرىنە سۇيەنسەڭىزدەر، جاڭگىر مۇلدەم ونداي ادام بولماعان. سەريالدا جاڭگىر دە بيىك، ماحامبەت تە بيىك، يساتاي دا بيىك»، - دەيدى تانىمال جۋرناليست.

پروديۋسەردىڭ ايتۋىنشا، سەريالدا جاڭگىر مەن يساتاي اراسىنداعى ارازدىق جەر ماسەلەسىنەن تۋىنداعانى باياندالادى.

«جاڭگىر مەن ماحامبەت بالا كەزدەن بىرگە وسكەن. وقۋعا دا بىرگە بارعان. سوڭىندا ماحامبەت سارايدان كەتىپ قالادى. سودان 2-3 جىلدان كەيىن تاريحقا بەلگىلى كوتەرىلىس بۇرق ەتەدى. وسىلايشا بالا كۇنگى دوستار ءبىر-بىرىنە اتا جاۋ بولىپ شىعا كەلەدى. تاريحتىڭ وسىلاي وربۋىنە نە سەبەپ بولدى؟ كەيبىر تاريحشىلار جەرگە بايلانىستى دەگەندى العا تارتادى. جەر ماسەلەسى بويىنشا قايشىلىق يساتاي مەن جاڭگىر اراسىندا بولعان»، - دەدى ارمان سقابىل ۇلى.

سونداي-اق، ول جاڭگىر حان مەن ۇلت-ازاتتىق كوتەرىلىس باسشىلارىنىڭ اراسنىداعى قايشىلىق ايەلگە تالاستان بولعان دەيتىن دەرەكتى جوققا شىعاردى.

«بۇل سەريال بولعاننان كەيىن، كوركەم تۋىندى بولعاننان كەيىن، ماحامبەتتى دە، جاڭگىردى دە، يساتايدى دا تومەندەتپەي، تاريحي كەزەڭدەگى قايشىلىقتىڭ نەدەن تۋىنداعانىن كورسەتۋگە تىرىستىق. ونى كورەرمەن تۇسىنەدى دەپ ويلايمىن. ودان كەيىن ول جەردە جۇرت ويلاعانداي ايەل ماسەلەسى جوق»، - دەدى تۋىندىنىڭ كوركەمدىك جەتەكشىسى.

ايتۋىنشا، سەريالدىڭ شيكىزاتىن دايىنداعان كەزدە ماحامبەت تۋرالى زەرتتەۋلەردەن بولەك، راحىمجان وتاربايەۆتىڭ جاڭگىر حان تۋرالى ماتەريالدارى قولدانىلعان.

«اكادەميك زەينوللا قابدولوۆتىڭ ءوزى قايتىس بولعاننان كەيىن جارىق كورگەن «ماحامبەت» رومانى بار. ودان باسقا باتىس وڭىرىنەن شىققان تاريحشىلارىمىزدىڭ ءبارىنىڭ ەڭبەگىن قارادىق. ءتىپتى كوزى تىرىلەرىمەن كەزدەسىپ، اقىلداسىپ وتىردىق. 2012-جىلى ءوز باسىم «حابار» ارناسىنا سول كەزدە رەسەيدەگى ەلشى بولعان زاۋىتبەك تۇرىسبەكوۆتىڭ وتىنىشىمەن «بوكەي حان» جايىندا دەرەكتى فيلم دايىنداعانمىن. وسى جۇمىس اياسىندا ورىنبوردىڭ، قازاننىڭ ارحيۆتەرىن اقتارۋدىڭ ءساتى تۇسكەن. نەگىزگى يدەيا سول كەزدە كەلگەن. ارحيۆ ماتەريالدارىن كورگەن كەزدە «شىركىن-اي، مۇنداعى وقيعالار وسمانلىنىڭ «سۇلەيمەن سۇلتانىنىڭ» سارايى سياقتى ەكەن عوي» دەپ تاڭدانعانبىز. جاڭگىردىڭ ايەلدەرى بىرىنەن كەيىن ءبىرى قايتىس بولادى، بالاسى كوز جۇمادى. سارايعا تاتار سۇلۋى فاتيما تۇسكەننەن كەيىن «ينتريگالار» باستالادى. مۇنىڭ ءبارى سەريالعا دايىن تۇرعان سەناري سياقتى كورىندى. ەندى سونى ەكرانعا يكەمدەپ بەرۋگە تىرىستىق»، - دەدى بەلگىلى پروديۋسەر.

Ключевые слова: بيلئك جانة ساياسات,
Наверх