Погода
Нур-Султан +7 °С
Алматы +14 °С
Курс валют
USD 449.85
EUR 485.43
RUB 5.71
CNY 70.69

ەلىمىزدەگى ەڭ ءىرى قۇس فابريكاسى قالاي جۇمىس ىستەيدى؟

29 Ноября 2021 20:14

نۇر-سۇلتان. قازاقپارات - قازاقستانداعى قۇس ەتىن وندىرۋدەن الدىڭعى قاتارلى كاسىپورىننىڭ ءبىرى - اقمولا وبلىسى بۇلاندى اۋدانىنداعى ماكينسك قۇس فابريكاسى.

اتالعان كاسىپورىننىڭ ىسكە قوسىلعانىنا كوپ ۋاقىت بولماسا دا، بۇگىندە ىشكى سۇرانىستى وتەپ وتىر.

وسى ورايدا «ماكينسك قۇس فابريكاسى» ج ش س ديرەكتورى رومان رومانوۆ قۇس ەتىن ءوندىرۋ كاسىبى تۋرالى ايتىپ بەردى، دەپ حابارلايدى قازاقپارات ءتىلشىسى.

«ماكينسك قۇس فابريكاسى» جابىق كاسىپورىن ساناتىنا جاتادى. سوندىقتان سانيتارلىق تالاپتاردى قاتاڭ ساقتايمىز. ونىڭ ۇستىنە بۇل تاماق ءوندىرىسى. كاسىپورىنعا كىرۋ ءۇشىن ارنايى ۇلگىدە كيىنىپ، قولدى جۋىپ، ماسكا تاعۋ قاجەت. ءبىز جىلىنا 76 مىڭ توننا قۇس ەتىن وندىرەمىز، ونىڭ 68 تونناسى دايىن ەت ءونىمى. فابريكادا 1427 ادام جۇمىس ىستەيدى. قۇس ەتى ونىمدەرى ەكى تۇردە ازىرلەنەدى ءبىرى مۇزداتىلعان ادىسپەن، ەكىنشىسى سالقىنداتىلعان تۇردە»، - دەدى رومان رومانوۆ ب ا ق وكىلدەرىنە ارنالعان باسپا ءسوز تۋرى بارىسىندا.

ونىڭ ايتۋىنشا، اتالعان قۇس فابريكاسى ەلىمىز بويىنشا ءونىم كولەمى جاعىنان العاشقى ورىندا.

«كاسىپورىندا ەۋروپا وندىرۋشىلەرىنىڭ الدىڭعى قاتارلى تەحنولوگيالىق قۇرىلعىلارىن قولدانامىز. ءبىزدىڭ فابريكا تەحنولوگيالاندىرۋ جاعىنان الەم كوشباسشىلارىنان كەم تۇسپەيدى. وسى ورايدا الداعى جىلى ءونىم قۋاتىن 30 پايىزعا ارتتىرىپ، جىل سايىن 100 مىڭ توننا قۇس ەتىن ءوندىرۋدى جوسپارلاپ وتىرمىز. بۇل - وتە جاۋاپتى قادام. وسىلايشا ءبىز رەسەي، بەلارۋس جانە ۋكراينانىڭ دەڭگەيىنە جەتە الامىز»، - دەيدى ول.

سونداي-اق، كاسىپورىن باسشىسى مەملەكەت تاراپىنان كورسەتىلەتىن قولداۋعا توقتالىپ ءوتتى.

«الدىمەن سۋبسيديا بويىنشا مەملەكەتتىك قولداۋ بار. سونىمەن قاتار ينۆەستيتسيا تارتۋ مەن تومەن پايىزبەن نەسيە الۋدا ايتارلىقتاي جەڭىلدىكتەر قاراستىرىلعان. ءبىز مەملەكەتتەن تولىق كولەمدە سۋبسيديا الا الامىز. پاندەميا كەزىندە جۇمىس توقتاعان جوق. بۇگىندە قىزمەتكەرلەرىمىزدىڭ دەنى ۆاكسينا العان. تاعى ءبىر ماڭىزدى جايت، ءبىزدىڭ فابريكادا قۇس تۇماۋى جاعدايى تىركەلگەن ەمەس. جالپى ءبىز ونىممەن نەگىزىنەن ەلىمىزدىڭ سولتۇستىك اۋماعىن قامتىپ وتىرمىز. ارينە وڭتۇستىك ءوڭىردىڭ دە نارىعىن قامتۋعا تىرىسامىز. قىزمەتكەرلەردىڭ ورتاشا جالاقىسى 160 مىڭ تەڭگەگە جۋىقتايدى. ارتىق نەمەسە قوسىمشا جۇمىس ىستەگەن جاعدايدا قىزمەتكەرگە ۇستەماقى تولەنەدى. بۇل جاعىنان ءبىز ەڭبەك زاڭىنا باعىنامىز»، - دەدى ر. رومانوۆ.

ايتا كەتسەك، «ماكينسك قۇس فابريكاسى» 2018-جىلى ىسكە قوسىلدى. كاسىپورىننىڭ اشىلۋىنا وراي تاۋىق ەتىنەن 223 مەتر 65 سانتيمەتر كاۋاپ ازىرلەنىپ، ول گيننەس رەكوردتار كىتابىنا ەنگەن ەدى.

Ключевые слова: ايماق,
Наверх