Погода
Астана +7 °С
Алматы +14 °С
Курс валют
USD 421.58
EUR 496.83
RUB 5.53
CNY 62.20

جالعىز ءوزى 7 ءۇيىر جىلقى باعاتىن قازاق قىزى جەلى جۇلدىزىنا اينالدى

28 Июля 2021 19:46

نۇر-سۇلتان.قازاقپارات - ءۇيىر- ءۇيىر جىلقى باعىپ، جۇرتقا اۋىلدىڭ ءومىرىن كورسەتىپ تانىمال بولعان اسىل احمەتوۆانىڭ بۇرىمىنا، ۇلتتىق ناقىشتاعى كيىمىنە، اتتىڭ قۇلاعىندا وينايتىن ونەرىنە قىزىعاتىندار كوپ.

قازىر ول پەتروپاۆل قالاسىنا قاراستى وزەرنوە اۋىلىندا تۇرادى. 25 جاستاعى قىز اۋىل مەكتەبىندە جۇمىس ىستەپ، بوس ۋاقىتىندا جىلقى باعادى.

«ءوزىم قوستانايدىڭ قىزىمىن. قازىر سولتۇستىك قازاقستان وبلىسى وزەرنوە اۋىلىندا تۇرامىز. اكەمنىڭ تۋعان جەرىنە بىرنەشە جىلدان كەيىن كوشىپ كەلدىك. نۇر- سۇلتان قالاسىنداعى پوليتەحنيكالىق كوللەدجدى ءبىتىرىپ، تەحنيكالىق ماماندىق الىپ شىقتىم. قازىر پەتروپاۆلدا جوعارى ءبىلىم الىپ جاتىرمىن. ماماندىعىم - ينفورماتيكا ءپانىنىڭ ءمۇعالىمى. ءۇشىنشى كۋرستى ءبىتىردىم.

جەتىنشى سىنىپتان بەرى اكەمە كومەكتەسىپ كەلەمىن. اكەم مەن ەس بىلگەلى جىلقى باعۋمەن اينالىسادى. كارانتين باستالعاننان كەيىن اۋىلعا كەلدىم. Tik Tok قوسىمشاسىن جۇكتەپ، ءوزىم ءۇشىن ۆيدەو ءتۇسىرىپ ءجۇردىم. العاشىندا كونتەنتىم اسا قىزىق بولعان جوق. ونىڭ ۇستىنە اۋىلدا ينتەرنەت مەكتەپتە عانا ۇستايدى. Tik Tok قوسىمشاسىنا العاش رەت ۇيدە ءمىنىپ جۇرگەن جىلقىممەن 20 سەكۋندتىق ۆيدەو جاريالادىم. ۆيدەو ترەندكە كىرىپ، رەسەيلىكتەرگە تارالىپ كەتتى. وسىلايشا، كۇندەلىكتى اۋىلدىڭ ءومىرىن ءجيى سالا باستادىم. قازىر Tik Tok-تا 65 مىڭ جازىلۋشىم، Instagram جەلىسىندە 6 مىڭ ادامنان جوعارى اۋديتوريام بار» ، - دەيدى اسىل اzattyq-ruhy-نا بەرگەن سۇحباتىندا.

جالعىز ءوزى جەتى ءۇيىر جىلقى باعادى…

ول جىلقى باعۋدىڭ ەرەكشەلىكتەرى مەن ونى كۇتۋدىڭ جولىن ايتىپ بەردى.

«اكەم بۇرىنعىداي ەمەس، قارتايدى. سوندىقتان تەك جىلقى ۇستايدى جانە تۇرىپ جاتقان اۋىلدىڭ جىلقىسىن قوسىپ باعامىز. قازىر بارلىعى 7 ءۇيىر جىلقى باعامىن. جانۋاردى قىستا قاماماي ەركىن جىبەرەمىز. ال، كوكتەمدە ەگىندى تاپتاپ كەتپەس ءۇشىن قوراعا قاماپ، قاداعالاپ باعامىز.

تاڭعى تورتتە جىلقى جايىلىمعا شىعادى. اكەم تۇسكە دەيىن ءوزى قارايدى. تۇستەن كەيىن اۋىسىپ، ورنىنا مەن كەلەمىن. كۇن توبەگە شىعىپ قاتتى ىسىعان ۋاقىتتا ءۇيىردى اكەلىپ قوراعا قامايمىن. كەيىن 4-5 كەزىندە قايتا شىعارىپ، تۇنگى 11 جارىمعا دەيىن باعامىن» ، - دەيدى جىلقىشى قىز.

اسىل اكەسىنە ەرەكشە جاقىن. جىلقى مالىنا دەگەن ماحابباتىن وياتقان دا اكەسى. كىشكەنتايىنان اتتا شاۋىپ ۇيرەنگەن ول مال باعۋ كەزىندە ءتۇرلى وقىس وقيعالاردىڭ بولاتىنىن ايتادى.

«مەن ءوزىمىزدىڭ ەمەس، اۋىل ادامدارىنىڭ دا جىلقىسىن باققاندىقتان، جاۋاپكەرشىلىكتىڭ ۇلكەن ەكەنىن بىلەمىن. ءار جىلقىعا باسىممەن جاۋاپ بەرەمىن. كەيدە جانۋار جاراقات الىپ قالادى، سۋعا باتقان كەزى دە بولدى، تولدەيدى. سونداي ۋاقىتتا جالعىز ءوزىم ابدىراپ قالماي، شۇعىل شارا قولدانۋىم كەرەك. ايدالادا كوپ جاعدايدا بايلانىس جوق، بولسا دا ءالسىز. سوندىقتان، كومەك جەتكەنشە كۇتىپ وتىرماي، العاشقى الدىن الۋ جۇمىستارىن اتقارامىن. مۇنىڭ ءبارىن اكەم ۇيرەتكەن. كىشكەنتايىمنان اتىنا مىنگەستىرىپ الاتىن، قايدا بارسا دا جانىنان تاستامادى. 5-سىنىپتان باستاپ ءوزىم اتقا وتىرىپ، 6-سىنىپتا مال قاراۋعا شىعا باستادىم» ، - دەيدى اسىل.

ول جىلقى باعىپ قانا قويماي، بايگەگە دە قاتىسادى. نازىك، ءمۇسىندى قىزدىڭ اتتىڭ قۇلاعىندا ويناپ، شابا جونەلگەنىن كورگەندە ەرىكسىز سۇيسىنەسىڭ. اسىلدىڭ ايتۋىنشا، جىلقىنى باعىندىرۋ ءۇشىن ەڭ الدىمەن كۇش ەمەس، مىنەز كەرەك.

«ەڭ الدىمەن جىلقىمەن ءتىل تابىسۋ كەرەك. ونىڭ ۇستىنە دۇرىس وتىرماساڭ، جانۋار قىرسىعادى دا قويادى، سوسىن ونىمەن دۇرىس شابا المايسىڭ، مىنەزىن كورسەتەدى. ۇيگە نەمەسە ۇيىرگە قاراي شاۋىپ كەتۋى دە مۇمكىن. مىسالى، جايىلىم كەزىندە ۇيگە بارعىڭ كەلىپ اتتى بۇرساڭ، ايعىر ءۇيىردى تاستاعىسى كەلمەي قارسىلاسادى. سونداي كەزدە ادام ءوز ۇستەمدىگىن كورسەتىپ، وكتەم داۋىسپەن بۇيىرا ايقايلاپ، نەمەسە ۇرىپ جىبەرۋ قاجەت» ، - دەيدى جىلقىشى قىز.

5-6 جىلدان بەرى ول ەرلەرمەن بىرگە بايگەگە قاتىسىپ ءجۇر. قالاداعى وقۋىنان كەلگەن زامات جىلقىعا وتىرىپ، اۋىلدىڭ شەتىنە تارتىپ كەتەدى ەكەن.

«بايگەدە شابۋدى دا اكەم ۇيرەتتى. جارىس باستالماس بۇرىن اتتى تەرلەتىپ، كوبىگىن شىعارۋ كەرەك. بىردەن شىعارماي ەكى نەمەسە ءۇش كۇن دايىندايمىز. بايگەنىڭ ۋاقىتىندا اتتىڭ باسىن قاي كەزدە تارتىپ، قاي كەزدە جىبەرۋ كەرەكتىگىن قاداعالاپ وتىرۋ ماڭىزدى. ەگەر اتتىڭ باسىن بىردەن بوساتىپ جىبەرسەڭىز، سوڭىنا دەيىن شارشاپ قالادى.

بايگەدە اتتىڭ ءبارى ءبىر جولمەن كەلە جاتقاندىقتان ءبىر- بىرىنە سوعىلۋى مۇمكىن نەمەسە جولداعى شۇڭقىر، تاس سياقتى كەدەرگىلەرگە شالىنىپ كەتەدى. سوندىقتان الدى- ارتىڭدى قاراپ وتىرۋ دا ماڭىزدى. سوڭعى قاتىسقان ات جارىسىندا شاۋىپ كەلە جاتىپ الدىمداعى ات اياعىمنان تەۋىپ جىبەردى. اياعىم ۇزەڭگىدەن شىعىپ، قۇلاپ كەتۋگە ءسال قالدىم. ءبىراق، ۋاقىتىندا اتتىڭ مويىنىنان ۇستاپ، قايتا ءمىنىپ ۇلگەردىم. اۋىر جاراقات العان جوقپىن» ، - دەيدى ول.

اناسى العاشىندا بايگەنىڭ قاۋىپتى ەكەنىن ايتىپ، قارسى بولعانىمەن قىزىنىڭ سۇيىكتى ىسىنە تىيىم سالماۋدى ءجون كورگەن. جىلقى باعىپ، ءۇي شارۋاسى مەن مەكتەپتەگى جۇمىسىن قاتار الىپ جۇرگەن اسىل، ءان ايتقاندى دا جانى سۇيەدى. ءتىپتى، مەكتەپتەن كەيىن ونەر اكادەمياسىنا وقۋعا تۇسكىسى كەلگەن. الايدا، اتا- اناسى بۇل ارمانىنىڭ ورىندالۋىن كەيىنگە شەگەرگەن ەكەن.

اسىلدىڭ ونەرىنە قىزىعاتىندار الەۋمەتتىك جەلىدە كوپ. ونىڭ اۋديتورياسى سوڭعى ۋاقىتتا تەز كوبەيىپ كەلەدى. ءتىپتى، جىلقىشى قىزدى كەلىن ەتىپ العىسى كەلەتىندەر دە كەزدەسەدى ەكەن.




«الەۋمەتتىك جەلى قانشاما ادامعا جاڭا مۇمكىندىك اشىپ جاتىر. قازىر قازاق تىلىندە تۇسىرىلگەن كونتەنت تەز قارالىم جينايتىن بولعان. مەنىڭ تۇسىرگەن ۆيدەولارىمدى كورىپ كوبى «سولتۇستىكتە وسىنداي تازا قازاقشا سويلەيتىندەر بار ما؟» دەپ تاڭقالىپ جاتادى. سولتۇستىكتە قازاق تىلىندە ساۋاتتى سويلەتىندەر كوپ ەكەنىن كورسەتكىم كەلەدى. سونداي- اق ءبىزدىڭ اۋىل ءالى كۇنگە دەيىن سۋدى تاسىپ ىشەدى. ونىڭ ۇستىنە قىستىڭ كۇندەرى جولدىڭ ناشار بولعانىنان قالاعا ەركىن شىعا المايمىز. ينتەرنەت جوق. الەۋمەتتىك جەلى ارقىلى وسىنداي جاعدايدا ءومىر ءسۇرىپ جاتقانىمىزدى دا كورسەتكىم كەلەدى»، - دەيدى اسىل.

ول بولاشاقتاعى جوسپارلارىمەن ءبولىسىپ، اتقا مىنبەك تۇگىلى، قاسىندا تۇرۋعا قورقاتىن كەيبىر جاندارعا اقىل- كەڭەسىن ايتتى.

«قازىر جىلقىعا مىنە المايتىن جاستار كوپ. قىزداردى بىلاي قويعاندا، ەر ادامدار اتقا مىنە المايدى. بىرەۋدىڭ ونەرىنە قىزىققانشا، ءوزىمىزدىڭ اتا- تەگىمىزدى ساقتاپ قالسا ەكەن دەيمىن. ەگەر ءبىز اتا- بابادان قالعان قۇندىلىقتاردى دارىپتەمەسەك، ۋاقىت وتە كەلە ۇمىتىلىپ كەتۋى مۇمكىن. سوندىقتان الەم پايدالاناتىن Tik-Tok قوسىمشاسىندا قازاقتىڭ ۇلتتىق كاسىبىن كورسەتىپ، ءبىر ادامنىڭ بولسىن ويىن وزگەرتۋ مەن ءۇشىن جەتىستىك»، - دەدى اسىل احمەتوۆا.

aikyn.kz

Ключевые слова: قوعام,
Наверх