Погода
Нур-Султан +7 °С
Алматы +14 °С
Курс валют
USD 449.85
EUR 485.43
RUB 5.71
CNY 70.69

استانادا لومبارد قىزمەتكەرى كاسىپكەرگە 58 ميلليون تەڭگە شىعىن كەلتىرگەن

18 Мая 2022 22:09

نۇر- سۇلتان. قازاقپارات - ەلوردالىق كاسىپكەر سۆەتا جانايداروۆانىڭ بۇرىنعى جۇمىسشىسى قىزمەتىن اسىرا پايدالانىپ ءىرى كولەمدە قارجىلاي جانە زاتتاي شىعىن كەلتىرگەن.

بۇل تۋرالى اتالعان كاسىپكەر مەن ونىڭ ادۆوكاتى ءمالىم ەتتى، دەپ حابارلايدى قازاقپارات ءتىلشىسى.

«بۇل وقيعا 2017 -جىلعى 4-قازاننان باستاۋ الادى. لومبارد ماتەريالدارىنا جاۋاپتى كاسسيردىڭ ۇستىنەن ءىس قوزعالدى. اراعا 1,5 اي ۋاقىت سالىپ اتالعان ءىس بەلگىسىز سەبەپپەن جوعالدى. ىشكى ىستەر مينيسترىنە جۇگىنگەن سوڭ جوعالعان ءىس تابىلدى. ول بويىنشا 1 جىلدان استام ۋاقىت بويى سوت الدى تەرگەۋ امالدارى ءجۇردى. شارۋا ونبەگەن سوڭ ءمينيستردىڭ جەكە قابىلداۋىنا كىردىم. سودان سوڭ عانا ءىس سوتقا جىبەرىلدى. ناتيجەسىندە 3 سوت وتىرىسى ءوتتى. ءار وتىرىس سايىن سوت وكىلدەرى ءىستى نەگىزسىز توقتاتۋعا تىرىسىپ باقتى. سوڭىندا ويلاعاندارى بولىپ، قىلمىستىق ءىستى قاراۋ توقتاتىلدى. سوت وكىلدەرىنىڭ ايتۋىنشا، ءىستى ودان ءارى قاراۋ ءۇشىن دالەل مەن ايعاق جەتىسپەيدى. دەسەك تە، ءبىزدىڭ قولىمىزدا ۆيدەو، اۋديودالەلدەر مەن كۋاگەرلەر بار. بيىل، مىنە، 5 جىل بولادى. ال ماسەلە ءالى كۇنگە شەشىمىن تاپپاي كەلەدى»، - دەدى «لومبارد- تريۋمف- ا» ج شس ديرەكتورى سۆەتا جانايداروۆا نۇر- سۇلتان قالالىق «اتامەكەن» ۇلتتىق كاسىپكەرلەر پالاتاسى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، لومباردتىڭ بۇرىنعى قىزمەتكەرىنەن زارداپ شەككەن باسقا دا ازاماتتار بار.

«ول قىزمەتكەر مەنىڭ لومباردىمدا 1 جىلدان استام جۇمىس ىستەدى. ول ءوز قىزمەتىن پايدالانا وتىرىپ لومباردقا تۇسكەن پايدانى اقشالاي جانە زاتتاي جىمقىرىپ كەلگەن. جالپى شىعىن كولەمى 58 ميلليون تەڭگەدەن اسىپ تۇسەدى. سونىمەن قاتار كۇدىككە ىلىنگەن بۇرىنعى قىزمەتكەرىم «ماعان ەشتەڭە ىستەي المايسىڭ، مەنىڭ بايلانىسىم مىقتى» دەگەن ەسكەرتۋ جاسادى. بولعان جايت بويىنشا مەن بارماعان ورگان قالعان جوق. قۇزىرلى ورگانداردىڭ بارىندە بولدىم. جاعدايدى ءتۇسىندىردىم، سوعان قاراماستان ءىس توقتاپ تۇر. سوندىقتان شىندىقتى ىزدەپ «اتامەكەن» ۇلتتىق كاسىپكەرلەر پالاتاسىنا جۇگىندىم، ەندىگى ءۇمىت ب ا ق وكىلدەرىندە»، - دەيدى ول.

سونداي- اق، زارداپ شەگۋشىنىڭ مالىمدەۋىنشە، بۇرىنعى قىزمەتكەرى كەلتىرگەن شىعىندى ءالى كۇنگە دەيىن لومبارد قوجايىنى ءوزى وتەپ كەلەدى. ودان بولەك، زارداپ شەگۋشى بەلگىسىز بىرەۋلەردىڭ قورقىتىپ، جەكە باسىنا قاۋىپ توندىرگەنىن ايتتى.

«مەنىڭ كليەنتىم جەكە كاسىپكەر. ول جاڭا قىزمەتكەردى لومباردقا جۇمىسقا الادى. ۋاقىت وتە كەلە لومبارد قوجايىنى ءتۇسىپ جاتقان پايدانىڭ ازايعانىن، جەتىسپەۋشىلىكتى بايقايدى. ءوز كەزەگىندە قىزمەتكەر جاۋاپكەرشىلىكتەن قاشقاقتاي باستايدى. كەيىن قوجايىن لومباردتان ءىرى كولەمدە قارجى جىمقىرىلعانىن انىقتايدى. ايتا كەتسەك، لومبارد قىزمەتىندە ءىس جۇرگىزۋ بويىنشا ارنايى باعدارلاما بار. سونىڭ كومەگىمەن بۇكىل پروتسەستى انىقتاۋعا بولادى. تەكسەرە كەلە اقشالاي شىعىننان بولەك، زاتتاي شىعىن دا تىركەلەدى. قوجايىن بىردەن پوليسياعا حابارلاسادى. سول سياقتى لومباردتا بولعان جايتتىڭ بارلىعى بەينەباقىلاۋ كامەراسىنا جازىلعان. ياعني، كىمنىڭ قاشان كەلگەنى، نە بولعانى - ءبارى بار»، - دەدى زارداپ شەگۋشىنىڭ ادۆوكاتى جاقسىبەك ايىمبەتوۆ.

وسىلايشا زارداپ شەگۋشى مەن ونىڭ ادۆوكاتى بولعان جايتقا قاتىستى ءىستىڭ قايتا قولعا الىنىپ، ءتيىستى شارا قابىلدانۋىن تالاپ ەتىپ وتىر.

Ключевые слова: قوعام,
Наверх