Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jún men teri suraýsyz qalǵan soń qoı baǵýdyń paıdasy «kól-kósir» bolmaı jatyr - Jıgýlı Daırabaev

2021 jyldyń 28 qazan 2021 10:01

TARAZ. QazAqparat – Tarazda Táýelsizdiktiń 30 jyldyǵyna jáne eki márte Sotsıalıstik Eńbek Eri Jazylbek Qýanyshbaevtyń 125 jyldyǵyna arnalǵan birinshi respýblıkalyq ǵylymı-tájirıbıelik konferentsııa ótti, dep habarlaıdy QazAqparat tilshisi.

«Rýhanı jańǵyrý» baǵdarlamasy sheńberinde «Respýblıkalyq mal ósirýshiler sleti-2021» sharasy aıasynda ótken konferentsııaǵa oblys ákimi Berdibek Saparbaev, aýyl sharýashylyǵy mınıstri Erbol Qarashókeev jáne Premer-Mınıstr keńsesi, Shymkent qalasynyń, Almaty, Qyzylorda, Túrkistan oblysy ákiminiń orynbasarlary, qoǵamdyq birlestikterdiń ókilderi men Taraz óńirlik ýnıversıtetiniń professor - oqytýshy quramy qatysty.




Sharanyń ashylýynda oblys ákimi QR Prezıdenti Qasym-Jomart Toqaevtyń arnaıy joldaǵan hatyn qatysýshylarǵa tanystyrdy.

Memleket basshysynyń hatynda Jazylbek Qýanyshbaev – elimizdiń mal sharýashylyǵyn damytýǵa ólsheýsiz úles qosqan dańqty shopan ekendigi, kóp jylǵy eren eńbeginiń arqasynda asa tanymal tulǵaǵa aınalǵany aıtylǵan.

Sonymen qatar, Tarazda tulǵaǵa laıyqty qurmet kórsetilip, barynsha dáriptelip jatqanyn quptarlyq qadam dep baǵalap, mundaı sharalar ásirese, jas býyndy atakásipke adal bolýǵa úndep, ónimdi eńbek etýge jigerlendiretinin atap ótken Memleket basshysy konferentsııa jumysyna sáttilik tilegen.

Berdibek Saparbaev jıynnyń mańyzyna toqtalyp, Elbasy men Memleket basshysynyń qoldaýynyń arqasynda aýyl sharýashylyǵyn damytýǵa baǵyttalǵan birqatar iri maqsatty baǵdarlamalar júzege asyrylyp, oń nátıje berip jatqanyn aıtty.

«Eńbek – er atandyrady» degen naqyl sóz dál «Dala akademıgi», «Malshylardyń marshaly» atıanǵan, búkil ǵumyryn aqtyly qoı ósirýge arnaǵan, óńirdiń gúldenip, kórkeıýine úlken úles qosqan Jazylbek Qýanyshbaevqa arnap aıtylǵandaı. Ol jarty ǵasyrdaı adal eńbegimen shalǵaıda jatqan aýdannyń atyn aspandatyp, mereıin kóterdi. Qyrqynshy jyldardyń basynda qarakól qoıyn ósirý qolǵa alynǵanda, Jazylbek Qýanyshbaev onymen alǵash aınalysqandardyń biri edi. Aǵa shopannyń, ásirese, soǵys kezindegi eńbegi elge erekshe úlgi boldy»,- degen aımaq basshysy danqty shopannyń ıgi isin búgingi jerlesteri de jalǵastyryp jatqanyn jetkizdi.




Qazirgi tańda oblysta qarakól qoı sharýashylyǵyn damytý maqsatynda 3 qarakól qoı sharýashylyǵyna beıimdelgen qojalyq uıymdastyryldy.

Osy saladaǵy jetekshi ǵalymdarmen birge qoıdy qoldan uryqtandyrý tehnologııasy paıdalanylýda.

Aýyl sharýashylyǵy mınıstri Erbol Qarashókeev elimizdiń agroónerkásiptik kesheninde qalanǵan jaqsy negiz jáne kópjyldyq tájirıbeniń arqasynda koronovırýs pandemııasyna baılanysty daǵdarysqa qaramastan salada turaqty jaǵdaı saqtalyp otyrǵandyǵyn tilge tıek etti.

«Qazaqstan fermerler odaǵy» qaýymdastyǵynyń prezıdenti Jıgýlı Daırabaev, QR Ulttyq Ǵylym akademııasynyń korrespondent-múshesi Ábdirahman Ombaev, Atyraý oblysynyń kásipkeri Nazerke Kýsesova da sóz alyp, oramdy oılaryn ortaǵa salyp, usynys-pikirlerin bildirdi.

«Qazirgi zamanda kópshilik qoı baǵýdyń qıyndaǵanyn, tipti, tıimsiz bolyp qalǵanyn alǵa tartady. Jún de, teri de suraýsyz qalǵan soń, babalarymyz aıtqandaı, qoı baǵýdyń paıdasy «kól-kósir» bolmaı jatyr. Biraq, Qazaqstannyń jeri keń baıtaq. Ónimniń ózindik quny tómen bolýy úshin jaıylym jerlerdi barynsha tıimdi paıdalanýymyz qajet. Zaman ózgergenimen, qoıdyń fızalogııasy sol qalpynda qaldy», - degen Jıgýlı Daırabaev bul salada jańa tehnologııalardy ıgerip, burynǵy qoı baǵý dástúrlerimizben úılestirip, áleýetti barynsha arttyrý kerektigin aıtty.

«Jazylbek Qýanyshbaev Qazaqstandaǵy qoı sharýashylyǵyn damytýda kóp eńbek sińirgen tulǵa. Ol elimizde alǵash ret óziniń sharýashylyǵynda qoldan uryqtandyrý ádisin engizgen. Ata kásipti damytýǵa aıryqsha úles qosqan abyz aqsaqal bul iske jastardy baýlý, tárbıeleý jolynda kóp eńbek ete bildi. Bul konferentsııa Jaz-atanyń tájirıbesin nasıhattap, taratýda, sol arqyly qoı sharýashylyǵyn damytýǵa yqpal etýde mańyzy zor bolady dep oılaımyn»,-dep atap ótti QR Ulttyq Ǵylym akademııasynyń korrespondent-múshesi Ábdirahman Ombaev.

Qonaqtar óńirdegi oń ózgeristerdi, sharanyń uıymdastyrylýyn joǵary baǵalap, oblys basshylyǵyna alǵys bildirdi.

Konferentsııa barysynda «Jalpaq jurttyń Jaz atasy» kitabynyń tusaýy kesildi.











Joǵary qaraı