Aýa raıy
Astana -14 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

Jeltoqsan men qańtarda karantın qatańdaýy múmkin

2020 jyldyń 28 qarasha 2020 17:34

NUR-SULTAN. QazAqparat - Elimizde karantın sharalaryn kúsheıtý halyq densaýlyǵy úshin tıimdi bolǵanymen, bıznes ókilderine jeńil tımeıtini anyq. Árıne, qarapaıym jurt ta shekteýlerden sharshaıdy. Qalaı bolǵan kúnde de saqtyq sharalaryn qaperden shyǵarýǵa bolmaıdy. Tártipke baǵynyp, talapty oryndaǵannan utylmaıtynymyz anyq. Óıtkeni, eń bastysy densaýlyq. Bas aman bolsa, ortaıǵan qazandy toltyryp alarmyz.

Elimizdiń Densaýlyq saqtaý mınıstri Alekseı Tsoı karantın sharalaryn qatańdatýǵa qatysty pikir bildirdi. Vedomstvo basshysy bul kezeń jeltoqsan-qańtar aılaryna saı kelýi múmkin ekenin aıtyp otyr.

«Apta saıyn málimetterge saraptama jáne aldaǵy jaǵdaıǵa qatysty boljam jasalady. Qazirgi ahýalǵa kóz júgirte otyryp jeltoqsan-qańtar aılarynda karantın sharalary kúsheıtilýi múmkin ekenin boljaýǵa bolady. Biraq barlyǵy jaǵdaıdy qanshalyqty baqylaýda ustaı alatynymyzǵa baılanysty», – dedi A.Tsoı Ortalyq kommýnıkatsııalar qyzmetinde ótken brıfıngte.

«Qyzyl aımaqqa» engen óńirler

Elimizdiń bes óńiri «qyzyl aımaqqa» kirdi. Shyǵys Qazaqstan, Soltústik Qazaqstan, Pavlodar, Qostanaı jáne Aqmola oblystarynda qatań shekteý sharalary engizildi.

Elimizde qazan aıymen salystyrǵanda indettiń taralý deńgeıi 3,7 ese ósken. Sońǵy ýaqytta vırýs juqtyrǵandardyń 70% - «qyzyl aımaqqa» engen óńirlerdiń turǵyndary.

Syrttan aýrý ákelgender sany 2 ese azaıǵan. Buǵan deıin Reseıden kelgenderden vırýs jıi anyqtalyp keldi. Syrttan keletinder PTR test tapsyrýǵa mindetti. Mınıstrdiń sózinshe, burynǵydaı emes, jurt bosańsyp ketken. Toı-tomalaq ótkizý tyıylmaı tur.

Shyǵys Qazaqstanda jaǵdaı turaqtaldy.

«Mysaly, koronavırýs órshigen keı óńirde juqtyrý deńgeıi tómendep kele jatqanyn baıqap otyrmyz. Shyǵys Qazaqstanda jaǵdaı rettelip, juqtyrý deńgeıiniń azaıǵanyn baıqadyq», dedi A.Tsoı.

28 qarashadaǵy málimet boıynsha, elimizde 130 039 naýqas koronavırýs juqtyrǵan. Jáne 41 940 adamnan KVI-ge uqsas pnevmonııa anyqtaldy.

Osy KVI oń aýrýdan 1990 adam, al, KVI anyqtalmaǵan pnevmonııadan 440 adam qaıtys bolǵan. 27 qarashadaǵy aqparat boıynsha, elimiz ortasha qaýipti aımaqta tur.

Alekseı Tsoıdyń málimdeýinshe, kúni búginge deıin vırýsty anyqtaý maqsatynda 4 mln zertteý júrgizilgen.

Test ótkizý táýligine 90 myńǵa deıin jetipti. Dárilik preparattar eki aıǵa jetedi. Medıtsına qyzmetkerlerine arnalǵan qorǵanysh quraldarynyń 3 aılyq qory jasalǵan.

Infektsııalyq aýrýhanalarda tósek-orynnyń 22%, jansaqtaý oryndarynyń 17% tolǵan. Mınıstr koronavırýspen kúreske jumsalǵan barlyq qarajat týraly aldaǵy ýaqytta tolyq málimet beretinin aıtty.

Almaty oblysynyń Shonjy eldi mekeninde sońǵy on kúnde 21 adamnan kovıd belgileri anyqtalǵan.

Іndettiń órshýine baılanysty aýdandyq bas sanıtarlyq dárigerdiń qaýlysymen aýylǵa tórt birdeı tekseris beketi qoıyldy. Sonyń negizinde birqatar shekteý engizilip, saqtyq sharalary kúsheıtildi.

Naqtyraq aıtqanda, bir otbasy músheleri bolmasa kóshede toptasyp júrýge tyıym salyndy. Saýda úıleri men dúkenderdiń jumys ýaqyty qysqartyldy.

Eldi mekenge syrttan kelgender kirgizilmeıdi. Tek azyq-túlik tasymaldaıtyn jáne tranzıt arqyly ótetin medıtsınalyq, kommýnaldyq qyzmetter men ózge qurylymdardyń mamandaryna ǵana ruqsat berilip otyr.

Onyń ózinde jolaýshylardyń dene qyzýy ólshenip, saýalnama júrgizilgennen keıin jiberiledi.

600 medıtsına qyzmetkerine rezerv jasaqtaldy

Pavlodar oblysynyń koronavırýs pandemııasy boıynsha «qyzyl» aımaqqa enýine Reseıden kelýshilerdiń áseri kóp. Oblys basshysy Ábilqaıyr Sqaqov osylaı dep málimdedi.

Qazan aıynda kórshi elden 34 myń adam kelgen. Jaǵdaı kúrdelenip, aýrý juqtyrǵandar sany ósip ketti. Keıin shekteý sharalary engizilip, qarashada ótkizý beketterinde barys-kelis azaıdy. Sáıkesinshe, aýrý tasymaldaý kórsetkishi tómendedi.

Degenmen, oblys turǵyndarynyń arasynda vırýstyń taralýy báseńdemeı tur. Osyǵan oraı epıdemıologııalyq ahýaldy retteý joldary jetildirilip jatyr.

«Aýrýhanalardaǵy jansaqtaý bóliminde tósek-oryn kóbeıtildi. Statsıonarlar barynsha jabdyqtaldy. Ottegi 6 ese ulǵaıdy. Dári jetkilikti. Medqyzmetkerler rezervi – 600. Árıne, koronavırýs qaýipti. Ony anyqtaý da, kúresý de ońaı emes. Ózge naýqastardyń da jaǵdaıyn eskerýdi umytqan joqpyz», - dedi oblys ákimi.

Eki qalaǵa kirip-shyǵý qıyndady

Kókshetaý men Stepnogor qalalaryna kirip-shyǵýǵa tyıym salynady. Bul týraly aımaqtyń bas sanıtar dárigeri Aınagúl Mýsına málimdedi.

Jańa qaýlyda 28 qarashadan bastap atalǵan shaharlardaǵy sanıtarlyq beketterde karantın talaptary kúsheıtiletini aıtylǵan. Óıtkeni vırýs órship barady.

Máselen, ótken aptada óńirde 257 jaǵdaı tirkelse, osy aptada 500-ge jýyq adam qaýipti indetke shaldyqqan. Al onyń kóbi - Kókshetaý men Stepnogor qalalarynan deıdi mamandar.

Atalǵan eldi mekenderge turǵyndar jumys ornynan anyqtama, issapar qaǵazy nemese emhananyń joldamasy sekildi qujattarmen ǵana kirip-shyǵa alady.

Eger bul eki qalaǵa óte tyǵyz jaǵdaımen kirip-shyǵý qajet bolsa, ol adamnan merzimi 3 kúnnen aspaǵan PTR anyqtamasy talap etiledi. Al ushaqpen jáne poıyzben atalǵan test nátıjesinsiz-aq kelip-kete berýge bolady.

Ondaǵy shekteýler respýblıkalyq komıssııanyń sheshimimen retteledi. Al qozǵalysty túbegeıli toqtatý, ıaǵnı blok-beketter qoıý tek tótenshe jaǵdaı rejıminde jasalatyn is-shara.

Tártipke baǵynbaı toı jasaǵandar

Jurt qaýipti indet qaı jaqtan kep qalar eken, dep alańdap júrse, shymkenttikter qalyń adamdy jınap, toı jasaýyn doǵarmaı keledi. Aıyppuldan da áser joq.

Kúni keshe ǵana Shymkentte qyz uzatý toıyn uıymdastyrǵandar anyqtaldy. 25 qarasha kúni Shymkent qalasynyń Táýke han dańǵyly boıynda ornalasqan «777 (7 bochek)» meıramhanasynda qyz uzatý toıyn uıymdastyrǵan.

Saltanatty sharaǵa shaqyrylmaı kirip barǵan tártip saqshylary jıynda 100-ge jýyq adamnyń bolǵanyn anyqtapty. Polıtseıler atalǵan jaıtqa qatysty karantın talaptaryn buzǵan azamattarǵa QR ÁQBtK 425–baby boıynsha hattama toltyrdy.

Jınaqtalǵan is-qujattar sanıtarııalyq-epıdemıologııalyq baqylaý basqarmasyna joldandy.

Aıta keteıik, karantın rejımi engizilgeli beri Shymkent qalasy polıtseıleri jáne arnaıy qurylǵan mobıldi top 910 quqyqbuzýshylyq anyqtaǵan.

Qaýipti indetten qorǵaný úshin qajet qosymsha

Elimizde «Saq bol» mobıldi qosymshasy ázirlendi. Ol qaýipti indetten qorǵaný úshin jasaldy. Mobıldi qosymshany smartfonǵa júktegen soń «Blıýtýzdy» qosyp qoıý kerek.

Onyń kómegimen adamdar arasyndaǵy araqashyqty saqtaý jeńil. Álgi qosymsha sát saıyn belgi berip otyrady.

Sosyn eger áldekimnen vırýs anyqtalyp, ol aqparatty mobıldi qosymshaǵa engizse, sizge habarlama keledi.

Vırýs juqtyrǵan adamnyń sońǵy eki aptada sizben baılanysta bolǵan-bolmaǵanyn bilip otyrasyz. Mamandar osy qosymshany júktep alýǵa keńes berip otyr.


Joǵary qaraı