Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jastardy qoldaý, áleýmettik jobalardy damytý – Tuńǵysh Prezıdent qory qandaı jobalardy atqardy

2021 jyldyń 1 jeltoqsan 2021 07:49

NUR-SULTAN. QazAqparat – 2000 jyly Nursultan Nazarbaevtyń jeke bastamasymen óz atyndaǵy kommertsııalyq emes qor qurylǵan bolatyn. Búginde Qor Elbasynyń adamı kapıtaldyń básekege qabiletin arttyrýǵa jáne qazaqstandyq jańa urpaqtyń qalyptasýy jónindegi ıdeıalaryn júzege asyryp keledi. 1 jeltoqsan – QR Tuńǵysh Prezıdenti kúni qarsańynda N. Nazarbaev qory qandaı jobalardy júrgizip jatqanyn aıtyp berdi, dep habarlaıdy QazAqparat.

Jas qazaqstandyq urpaqty qoldaý

Atalǵan qor jumysy talantty jastardy qoldaýǵa, áleýmettik jobalar men azamattyq bastamalardy jáne básekege qabiletti saraptamalyq-taldaý ortalyǵyn damytýǵa baǵyttalǵan. Mysaly, «Qamqorlyq» baǵyty ınklıýzıvtik qoǵamdy damytýdy kózdeıdi, onyń maqsaty – jasyna qaramastan barlyq azamattar úshin teń jaǵdaılar men teń múmkindikter jasaý. Atalǵan bastama aıasynda el óńirlerinde balalardy ońaltý ortalyqtary men mektepter janynan ınklıýzııany qoldaý kabınetteri ashylyp keledi.

«Qazirgi ýaqytta Tuńǵysh Prezıdent qory Almaty, Atyraý, Batys Qazaqstan, Shyǵys Qazaqstan, Túrkistan, Jambyl, Qostanaı oblystary men Nur-Sultan qalasynda 8 ortalyq ashty. Jyl sońyna deıin taǵy 10 ortalyq óz esigin ashady. Munda balalar emdeý jáne ońaltý kýrstarynan tegin ótedi. Olarmen tájirıbeli mamandar – logopedter, defektologtar, ergoterapevter jáne basqa da mamandar aınalysady. Jalpy bul bastama jylyna 5 000 balany ońaltýǵa múmkindik beredi. Jańa 8 ortalyq jumysynyń nátıjesinde tserebraldy sal aýrýy bar balalardyń ońaltý jumystarymen qamtylýy 20%-ǵa kóbeıgen. Dárigerlerdiń kómegimen alǵashqy sózderdi aıta bastaǵan, alǵashqy qadamdaryn jasaǵan baqytty balalar, balasynyń jetistikterin kórgen qýanyshty analar – ortalyqtardyń jumysynyń basty nátıjesi», - dep atap ótti Tuńǵysh Prezıdent qorynyń baspasóz qyzmeti.

El Úmiti zeıindi mektep oqýshylaryn tabady

Elbasynyń ekinshi jańa bastamasy El Úmiti dep atalady. Onyń maqsaty – jaqyn bolashaqta elimizdegi túrli salalarda kásibı elıtaǵa enýi tıis talantty jas qazaqstandyqtardy izdestirý jáne qoldaý kórsetý.

Bul bastama aıasynda N. Nazarbaev qory Qazaqstan Úkimetimen tyǵyz yntymaqtastyqta birneshe bilim berý jobalaryn iske asyrady. Solardyń biri – «Myń bala» olımpıadasy. Olımpıada aýyldyq jerlerdegi qabiletti balalardy qoldaýǵa baǵyttalǵan jáne oǵan 5 jáne 6-synyp oqýshylary qatysa alady. Eki jyl ishinde olımpıada aýyl mektepteriniń 400 myńnan astam oqýshysyn qamtyǵan. Bıyl «Myń bala» olımpıadasy alǵash ret onlaın formatta ótkizildi. Nátıjesinde taǵy myńǵa jýyq qabiletti aýyl oqýshylary elimizdiń daryndy balalarǵa arnalǵan jetekshi mektepterinde oqýǵa múmkindik aldy.

Sonymen birge, El Úmiti bastamasynyń taǵy bir sátti jobasy «Elbasy medali» boldy. Búginde ol jastardy keshendi damytýǵa baǵyttalǵan ulttyq deńgeıdegi jalǵyz baǵdarlama bolyp otyr. Oǵan qatysqan jastar óz ýaqytyn basqarýdy, aldyna maqsat qoıýdy, salaýatty ómir saltyn ustanýdy jáne únemi ózderin damytýdy úırenedi.

«2020 jyly «Elbasy medali» baǵdarlamasy 11 myńnan astam qatysýshyny, 600 tálimgerdi, 17 óńirlik úılestirýshiler men sarapshylardy qamtyǵan. Elbasy medaliniń ıegerleri zańda belgilengen tártip boıynsha bilim berý granttaryn berý kezinde artyqshylyqqa ıe bolady. Bıylǵy joba 11 myńǵa jýyq belsendi jastarmen birge jalǵasýda», - dep habarlady Tuńǵysh Prezıdent qory.

Talanttylarǵa jol

«Qor myńdaǵan jastarǵa «ómirlik joldama» berip, olardyń damýyna jańa múmkindikter ashty, jastardyń jobalaryn ilgeriletip, ıdeıalaryn júzege asyrýǵa kómektesti. Jyl saıyn Qazaqstannyń 80-nen astam úzdik stýdentteri qordyń ataýly stıpendııalaryn aldy. Elimizdiń 100-den astam aqyn-jazýshylary jyl saıyn respýblıkalyq «Altyn tobylǵy» ádebı baıqaýyna qatysady. Al shyǵarmashylyq jobalardy qoldaýǵa arnalǵan granttar baıqaýy jastardyń ózin-ózi damytýynyń taǵy bir múmkindigi boldy», - deıdi Nursultan Nazarbaev qory.

Qordyń jańa tsıfrlyq servısterdi damytýǵa, jas IT-mamandardy qoldaýǵa baǵyttalǵan jobalary da óz tıimdiligin kórsetti. «Smart Zholy» baǵdarlamasynyń jeńimpazdary óz jobalaryn halyqaralyq deńgeıde usyndy, al Intellection, Webtotem, Nommi startaptary Azııanyń úzdik 10 jobasynyń qataryna enip, Azııanyń jetekshi venchýrlyq qorynan qarjylandyrý alǵan.

Qordyń mańyzdy jobalarynyń biri – áleýmettik ıdeıalar men jobalar jármeńkesi boldy. Búginde bul jármeńke – úkimettik emes uıymdardyń qarqyndy ózara is-qımyly úshin aýqymdy, turaqty jumys isteıtin alańǵa aınaldy. 2008 jyldan bastap áleýmettik ıdeıalar men jobalar jármeńkesine 15 000-ǵa jýyq túrli uıymdar qatysqan. Nursultan Nazarbaev qory 300-den astam jobaǵa granttyq qoldaý kórsetken.

Jahandyq deńgeıdegi yntymaqtastyq

«Qor úshin jahandyq beıbitshilik pen kelisim qundylyqtaryn nyǵaıtý salasyndaǵy halyqaralyq yntymaqtastyq árdaıym mańyzdy. Osyǵan baılanysty bul qyzmettiń ıdeologııalyq negizgi baǵyty – qazirgi kezeńde planetanyń damýy týraly Elbasy fılosofııasy. Qor kóptegen jyldar boıy sheteldik seriktestermen yntymaqtastyqty nyǵaıtyp keledi», - dep atap ótti qor.

Qordyń habarlaýynsha, Geıdar Álıev qorymen (Ázirbaıjan), Goı beıbitshilik qorymen (Japonııa), Konrad Adenaýer qorymen (Germanııa) jáne basqalarmen dostyq qarym-qatynas ornatylǵan. Halyqaralyq saıasattyń ózekti taqyryptary – jahandyq qaýipsizdik, jergilikti daǵdarystar, ekonomıka, jańa syn-tegeýrinderdi talqylaý boıynsha tanymal sarapshylardyń, saıasattanýshylardyń jáne ekonomısterdiń aýqymdy dıalog alańdary uıymdastyrylýda. Buǵan bedeldi «Astana club» halyqaralyq pikirtalas klýbynyń qyzmeti, kóptegen konferentsııalardyń jumysy baǵyttalǵan.

Nursultan Nazarbaev qory habarlaǵandaı, uıym basqa nysandarmen seriktestigin únemi keńeıtip otyrady, jastardyń áleýetin ashýǵa jáne qoǵamdaǵy rýhanı, mádenı qundylyqtardy nyǵaıtýǵa kómektesip, jumystyń jańa baǵyttaryn júzege asyrady.


Joǵary qaraı