Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jastar birlestigin qurǵan aqtaýlyq jigit: Shyǵarmashyl jastardyń basyn qosqym keldi

2021 jyldyń 14 jeltoqsan 2021 13:17

NUR-SULTAN. QazAqparat – Mańǵystaý oblysynyń týmasy Nursultan Myrzabek Almatyda rejıssýra, vıdeo jasaý, klıp jáne jarnama túsirý boıynsha tájirıbe jınaqtaǵan. Keıin týǵan jerine oralyp, jastarǵa arnalǵan shyǵarmashylyq birlestik qurdy. Búginde Aqtaý qalasynda «Aktown» jastar shyǵarmashylyq birlestigi jumys istep tur. Onda shyǵarmashyl jastar bas qosyp, talanttaryn damyta túsýde. Osy oraıda QazAqparat tilshisi Nursultan Myrzabekti áńgimege tartty.

«Men Mańǵystaý oblysy, Munaıly aýdany Qyzyltóbe aýylynda týyp óstim. Jasym 27-de. Mektep bitirgen soń Aqtaý qalasyndaǵy Sh. Esenov atyndaǵy Kaspıı memlekettik ýnıversıtetinde «ekonomıka» mamandyǵy boıynsha joǵary bilim aldym. Oqýdy támamdaǵan soń óz jolymdy izdep, Almatyǵa bardym. Onda rejıssýra, vıdeo túsirýmen aınalystym. Jalpy medıa salasynda jumys istedim. Birneshe jyl jumys istep, tájirıbe jınaǵan soń, týǵan jerge oralyp, Almatyda úırengenimdi óz óńirimizde damytqym keldi. Sóıtip Aqtaý qalasynda «Aktown» jastarǵa arnalǵan shyǵarmashylyq birlestigin qurdym. Óıtkeni, bizde shyǵarmashyl jas talanttarǵa arnalǵan alań joqtyń qasy», - dedi Nursultan Myrzabek.




Onyń aıtýynsha, atalǵan jobany qolǵa alǵandaǵy maqsaty – shyǵarmashylyǵyn damytamyn degen jastarǵa múmkindik berý, jas talanttarǵa jol ashý.

«Bizdiń mıssııa – qoǵamǵa paıdasy bar adamdardyń sanyn kóbeıtý. Negizgi aýdıtorııamyz – jastar. Shyǵarmalyqqa qyzyǵýshylarmen qatar, bilimge qumartqan jastarǵa da qol ushyn sozamyz. Ol úshin bizde arnaıy baza bar. Ol bazany túrli bilim kýrstary men kitaptarmen tolyqtyryp, jastarmen bólisip otyramyz. Bizdiń esik barlyq azamattar úshin ashyq. Eger ıdeıasymen kelip, ortaǵa salyp jatsa, biz qolymyzdan kelgenshe kómektesýge daıynbyz. Degenmen bizde de múmkindik kóp emes, sebebi biz jekemenshik, úkimettik emes uıymbyz. ıAǵnı óz kúnimizdi ózimiz kórip otyrǵan ujymbyz. Mysaly, bizge talantyn damytqysy kelgen balalar keledi. Biz olardy sol baǵyttaǵy mamandarmen baılanystyryp, jan-jaqty qoldaý kórsetemiz», - deıdi ol.




«Aktown» jastar shyǵarmashylyq birlestigi 2019 jyly qurylǵan jáne birlestik quramynda 11 adam eńbek etip jatyr.

«Birlestik qurylǵaly 2 jyldyń ishinde aldymyzǵa biraz shyǵarmashyl jastar kelip, talantyn tanytyp jatyr. Kishkentaı ǵana Aqtaý qalasynda qanshama shyǵarmashyl jastyń baryna ózimiz de tańǵalýdamyz. Sonymen qatar biz jastar shyǵarmashylyǵymen qatar, olardyń problemasyn zerdeleýmen de aınalysamyz. Túrli qıynshylyqqa tap bolǵan jastarǵa qoldaý kórsetemiz. Pandemııaǵa baılanysty ótken jyly jumys qarqyny baıaýlady. Degenmen keıbir sharalardy onlaın ótkizdik. Jýyrda bizde qala ákimi aýysty, endi jańa ákimge óz jobamyzdy kórsetkimiz keledi. Múmkin qoldap qalar», - dedi joba jetekshisi.




Sondaı-aq aqtaýlyq belsendi azamat aldaǵy josparymen de bólisti.

«Árıne, aldaǵy ýaqytqa jospar kóp. Meniń aldaǵy armanym Aqtaý qalasynda jastarǵa arnalǵan platforma ashý. Óıtkeni, Aqtaýda jastar jınalyp, bas qosatyn turaqty alań joq. Múmkin kovorkıng, múmkin jastar ortalyǵy, múddeles, belsendi, shyǵarmashyl jastardyń basyn qosqym keldi. Men jıi aıtamyn, Aqtaý kárilikti qarsy alyp, qartaıǵan shaqta ómir súrý úshin jaqsy qala, biraq jastarǵa arnalmaǵan. Sózdiń shyndyǵy damımyn degen jastarǵa múmkindik az. Men sol kemshilikti joıǵym keledi», - dedi N. Myrzabek.











Joǵary qaraı