Aýa raıy
Astana 17 °S
Almaty 17 °S
valıýta baǵamy
USD 405.69
EUR 455.51
RUB 5.72
CNY 57.42

Jaryqsyz sol jaǵalaý: Elorda ǵımarattaryna elektr qýatyn berý jumysy júrip jatyr

2019 jyldyń 11 qarasha 2019 11:18

NUR-SULTAN. QazAqparat - 9 qarashadan 10 qarashaǵa qaraǵan túngi saǵat 02.04-te elordadaǵy «Levoberejnaıa» 110/10 kV shaǵyn stansasynyń 10 kV kabel kanalynda órt shyǵyp, kabel jelisi zaqymdandy. Sonyń saldarynan qalanyń sol jaǵalaýyndaǵy keıbir turǵyn úıler men ákimshilik ǵımarattar jaryqsyz qaldy.

Olardyń qatarynda Aqorda, Parlament Senaty, Májilis, Mınıstrlikter Úıi, Úkimet Úıi, Joǵarǵy Sot, «Ýıýt», «Kraýn Plaza», «Tumar» (2 úı), «Art Haýs», «Vıva plaza», «Alataý», «Na vodnom zelenom býlvare», «Báıterek» monýmenti, «Izýmrýdnyı kvartal» bıznes ortalyǵy, «Kerýen», Ulttyq kitaphana men Ulttyq muraǵat ǵımarattary bar.

Apat oryn alǵan sátten bastap «Astana AREK» kompanııasy jedel apatty joıý sharalaryn qolǵa alyp, elorda turǵyndaryn da qajetti aqaratpen qamtamasyz etip otyrdy.

«10 qarasha túngi saǵat 02.04-te atalǵan stansaǵa qosylǵan nysandar elektrmen jabdyqtaý jelisinen apat saldarynan aǵytyla bastady. Osy kabel jelisine qosylǵan tutynýshylar órt sóndirý brıgadalaryn elektr toǵy soǵýyn boldyrmaý úshin elektrmen qamtýdan ajyratyldy. Quramynda 15 maman bar apat saldaryn joıý brıgadasy 6 arnaıy tehnıka jáne qajetti jabdyqtarmen shuǵyl túrde jumysqa kiristi. 5 jedel-kóshpeli brıgadalar nysandardy qaıta qosýmen aınalysýda. Qolda bar barlyq mobıldi dızel-generatorlar iske qosyldy. Kabel jelilerin qalypqa keltirý jumystary jalǵasýda», - delingen kompanııanyń eń birinshi taratqan habarlamasynda.

Elektr stansasynda apat oryn alǵannan keıin oqıǵa ornyna elorda ákimi Altaı Kólginov te jetip, jedel atqarylyp jatqan sharalardy jiti baqylaýyna aldy.

«Levoberejnaıa» podstansasynyń kabel jelilerin qalpyna keltirý jumystary jalǵasýda. Brıgadalar sonymen birge nysandardy aýystyryp qosý sharalaryn júzege asyryp jatyr. Kóshpeli dızel-generatorlar iske qosyldy. Turǵyn úıler men nysandardyń bóligi órt sóndirýshilerdiń qaýipsizdigi úshin elektr jelisinen ajyratyldy. Jumystar jalǵasýda. Apat sebepterin tekserý bastaldy«, - dep jazdy Nur-Sultan qalasynyń ákimi Altaı Kólginov Facebook paraqshasynda.

Búgin tańerteń elorda ákimdiginiń baspasóz qyzmeti ákimshilik jáne turǵyn ǵımarattarǵa elektr jaryǵy berile bastaǵandyǵyn habarlady. Taratylǵan málimetke sáıkes, Aqorda, Parlament Senaty, Májilis, Mınıstrlikter Úıi, Úkimet Úıi, Joǵarǵy Sot elektrmen jabdyqtaldy. Sonymen qatar, 9 kóppáterli turǵyn úı jaryqpen qamtyldy, olar - «Ýıýt», «Kraýn Plaza», «Tumar» (2 úı), «Art Haýs», «Vıva plaza», «Alataý», «Na vodnom zelenom býlvare». Qazirgi ýaqytta «Báıterek» monýmentin, «Izýmrýdnyı kvartal» bıznes ortalyǵyn, «Kerýen», Ulttyq kitaphana men Ulttyq muraǵat ǵımarattaryn jaryqqa qosý boıynsha jumys júrip jatyr.

Qala basshysy kúni-túni tynbaı jumys istegen AREK qyzmetkerlerine rızashylyǵyn bildirdi.

«Elektr jelilerin qalpyna keltirgen AREK qyzmetkerlerine alǵys aıtamyn», - dep jazdy shahar basshysy Instagram paraqshasynda.

Esterińizde bolsa, osydan 1 jyl buryn elordanyń sol jaǵalaýy jaryqsyz qalǵan edi. Ol kezde qurylys jumystary barysynda «Shubar uıashyǵy 405» shaǵyn stansasynyń kabeli qıylyp, Shubar shaǵyn aýdany, Saraıshyq pen Qonaev kósheleri, «Nursaıa», «Araılym», «Lazýrnyı kvartal», «Novyı mır», «Versal» turǵyn úıleriniń halqy elektr energııasynsyz qalǵan bolatyn.

Aıta keteıik, búgin Memleket basshysy Qasym-Jomart Toqaev Elordanyń basym bóliginde jaryqtyń sónip qalýyna ákep soqtyrǵan apatty jaǵdaıǵa baılanysty Úkimetke arnaıy komıssııa qurýdy tapsyrdy.

Avtor Marlan Jıembaı
Basty sózder: Oqıǵa, Nur-Sultan,
Joǵary qaraı