Aýa raıy
Astana -9 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Jańa jyldan bastap múgedekter úshin áleýmettik kómek portaly ashylady

2020 jyldyń 26 qarasha 2020 13:53

PETROPAVL. QazAqparat – Petropavlda 10 myńnan astam múmkindigi shekteýli adam tirkelgen. Keler jyldan bastap olar ońaltýǵa qajetti quraldardy jańa portal arqyly ózderi tańdaıdy, dep habarlaıdy QazAqparat tilshisi.

Petropavl qalalyq jumyspen qamtý jáne áleýmettik baǵdarlamalar bóliminiń málimetinshe, 2021 jyldyń qańtar aıynan bastap múmkindigi shekteýli jandar úshin áleýmettik kómek kórsetý portaly ashylady.

Bul múgedek jandarǵa sýrdo, teflo apparattardy jáne qolarbalardy ózderine tańdaýǵa múmkindik bermek.

«Áleýmettik qyzmet kórsetý portaly múgedekterdiń ózine tańdaý jasaýǵa múmkindik bermek. Olar ońaltýǵa qajet qural-jabdyqtardy jáne ony jetkizýshi kompanııany osy jerden ózi tańdaıdy. Tek ol úshin tsıfrlyq qoltańba bolýy qajet. Múgedek janǵa kepildi qarajat bólinedi. Alaıda ol tańdaǵan qural-jabdyqqa jetpese, qalǵan somany óz qaltasynan shyǵarady», - deıdi Petropavl qalalyq jumyspen qamtý jáne áleýmettik baǵdarlamalar bóliminiń bas mamany Olga Prasolova.

Petropavlda 10 myńnan astam múmkindigi shekteýli jan tirkelgen. Olar ońaltý quraldaryn tegin alý úshin kezekke turǵan.

«Qazir bul qyzmet halyqqa qyzmet kórsetý ortalyǵy arqyly júzege asady. Múmkindigi shekteýli jan ortalyqqa baryp, sýrdo, teflo jáne qolarbaǵa tapsyrys beredi. Ol úshin jeke kýáligi, múgedektigin rastaıtyn anyqtama men ońaltý baǵdarlamasy jazylǵan qaǵazy bolýy kerek. Keıin oǵan 10 kúnniń ishinde qajetti qondyrǵyny alýǵa bolatyny jaıly habarlama beriledi. Qolymyzda bolsa ony tapsyramyz nemese kútýge týra keledi», - deıdi Olga Prasolova.

Bıyl oblys ortalyǵy boıynsha sýrdo apparatqa zárý 306 adamnyń 105-ine jáne tapsyrys bergen 377 múgedektiń 224-ine teflo quraldar berildi. Múgedekter arbasyna 238 adam muqtaj bolsa, sonyń 183-ine tabystaldy.


Joǵary qaraı