Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jańa Qazaqstan, yqpaldy Parlament, jańa oblystar − Prezıdenttiń 2022 jylǵy bastamalary

2022 jyldyń 17 mamyr 2022 11:00

NUR-SULTAN. QazAqparat – Jyl basynda Qazaqstanda jappaı narazylyqtar men tártipsizdikter bolyp, elimiz eleýli syn-qaterge tap bolǵan edi. Memleket basshysy barlyq suhbattary men Joldaýynda túbegeıli reformalardy bastama etip kóterdi. QazAqparat agenttigi oqyrmandarǵa Prezıdenttiń bıylǵy mańyzdy reformalaryn usynady.

Qańtar oqıǵasy, Úkimet pen kúshtik qurylymdardyń jańarýy

Barys jyly suıytylǵan gaz baǵasyn arzandatý týraly mıtıngilermen bastaldy jáne áleýmettik-ekonomıkalyq jáne qoǵamdyq-saıası talaptarǵa ulasty. Nátıjesinde memleket Úkimetti otstavkaǵa jiberdi jáne avtogaz baǵasyn burynǵy deńgeıde qaldyrdy.

Degenmen Prezıdent muny destrýktıvti kúshterdiń turaqtylyqty buzýǵa, tártipsizdikke jol ashýǵa paıdalanǵanyn aıtty jáne UQShU bitimgerlik kúshterin shaqyrýdy uıǵardy.

«Táýelsizdik tarıhynda biz alǵash ret asa kúrdeli jáne qaterli kezeńge tap boldyq. El basyna túsken osyndaı synaqty qaıyspaı birtutas el bolyp eńsere bildik. Endi biz mundaı jaǵdaıǵa eshqashan jol bermeýimiz qajet. Sondyqtan elimiz dýshar bolǵan aýyr qasirettiń sebepterin saralap, onyń saldaryna naqty baǵa berý – aldymyzda turǵan óte mańyzdy mindet», - dep atap ótti Prezıdent 11 qańtarda Májilis otyrysynda.

Prezıdent qoǵamnyń birtutastyǵy júıeli túrde shaıqalyp kelgen, onyń ishinde narazylyqtar men kásibı túrde ázirlengen stsenarııler qoldanylǵanyn aıtty.

«Osy aralyqta halyqtyń avtogaz baǵasynyń qymbattaýyna narazylyǵy qural retinde qoldanylyp ketti. Odan keıingi oqıǵalar spıral sekildi jalǵasty. Birinshi oramda – birqatar óńirde, dálirek aıtqanda Jańaózende mıtıngter ótti. Ekinshi oramda – bandıtter men maroderler qosyldy. Ári qaraı qarýly terrorısterdiń, onyń ishinde sheteldik sodyrlardyń qatysýymen qyzý kezeńi bastaldy. Osydan keıin olardyń negizgi maqsaty belgili boldy – memlekettik basqarý ınstıtýttaryn taratý, konstıtýtsııalyq qurylymdy buzý jáne túptiń túbinde bılikti basyp alý. Ár nárseni óz atymen atar bolsaq, bizdiń elge qarsy terrorıstik soǵys ashyldy», - dedi Q. Toqaev.

Memleket basshysy Qarýly kúshter men quqyq qorǵaý qurylymdarynyń jumysyn qaıta qurýdy tapsyrdy.

«Ulttyq qaýipsizdikti qamtamasyz etýdiń barlyq júıesin túbegeıli qaıta qurý syndy strategııalyq mindetke erekshe toqtalǵym keledi. Qarýly kúshterimizdiń, quqyq qorǵaý qurylymdarymyzdyń, Ulttyq qaýipsizdik organdarymyzdyń, syrtqy barlaý qyzmetterimizdiń jumysyn qaıta qurý qajet. Olardyń barlyǵy bir maqsat – kez kelgen sıpattaǵy jáne aýqymdaǵy qater kezinde azamattarymyzdy, konstıtýtsııalyq qurylymdy, egemendikti barynsha tıimdi qorǵaý úshin jumyla jumys isteýi tıis. Muny memleketimizdiń túbegeıli múddesi talap etedi», - dedi Qazaqstan Prezıdenti.

Prezıdent Qaýipsizdik keńesiniń tóraǵasy atandy

Qańtardaǵy tártipsizdikter kezinde Memleket basshysy Qasym-Jomart Toqaev Qazaqstan halqyna úndeý jarııalady. Onda Prezıdent retinde azamattardyń qaýipsizdigi men tynyshtyǵyn qorǵaýǵa mindetti ekenin jáne Qaýipsizdik Keńesiniń Tóraǵasy retinde barynsha qatań áreket etetinin aıtty.

«Prezıdent retinde, men, azamattarymyzdyń qaýipsizdigi men tynyshtyǵyn qorǵaýǵa, Qazaqstannyń tutastyǵyna alańdaýǵa mindettimin. Meniń qabyldaǵan sharalarym kópultty Qazaqstannyń ıgiligine baǵyttalǵan. Alaıda bul sharalar jetkiliksiz bolyp tur. Buzaqy toptardyń áreketteri joǵary deńgeıde uıymdastyrylǵanyn kórip otyrmyz. Bul qarjylandyrylǵan búlikshilerdiń jan-jaqty oılastyrylǵan jospary ekenin dáleldeıdi. Bul – qaskóılerdiń qıturqy áreketi. Sondyqtan Memleket basshysy jáne búginnen bastap Qaýipsizdik Keńesiniń Tóraǵasy retinde barynsha qatań áreket etemin. Bul – ómirin qorǵap qalýǵa ótinish bildirgen kóptegen azamatymyzdyń qaýipsizdigine qatysty másele. Bul – memleketimizdiń qaýipsizdigine tikeleı qatysty. Halyq meni qoldaıtynyna senimdimin. Qandaı jaǵdaı bolsa da men elordada bolamyn. Halyqpen birge bolý – meniń Konstıtýtsııalyq mindetim», - dedi Prezıdent óz úndeýinde.

29 qańtarda «Habar» arnasyna bergen suhbatynda Q. Toqaev Qaýipsizdik keńesiniń tóraǵalyǵy jóninde bylaı baıandady:

«Tuńǵysh Prezıdentpen (N. Nazarbaev – red.) eshqandaı saýdalastyq bolǵan joq, jeke basymdyqtary týraly da sóz bolmady. Jalǵyz áńgime – Qaýipsizdik Keńesiniń Tóraǵasy mártebesi máselesin tez arada sheshý qajet boldy. Jasyrary joq, jaǵdaı kúrdelengen sátte halyqqa úndeý jasaımyn, osy sátten bastap Qaýipsizdik Keńesiniń Tóraǵasy ózim bolatynymdy jarııalaımyn degen máseleni ashyq kóterdim. Bul másele sol sátte-aq sheshildi», - dedi Prezıdent.

«Jańa Qazaqstan» tujyrymdamasy jarııalandy

11 qańtardaǵy Májilis otyrysynda Prezıdent «Jańa Qazaqstandy» qurý ıdeıasyn alǵash ret aıtty.

«Qıyn kúnder artta qaldy. Osy sátte el taǵdyry úshin uıysa bilgen búkil halqyma shynaıy rızashylyǵymdy bildiremin. Bárimiz bul oqıǵadan sabaq alýymyz kerek. Eń bastysy, bereke-birlikti, tynyshtyq pen turaqtylyqty saqtaýymyz qajet. Eńdi, Qazaqstanda damýdyń jańa kezeńi bastalady. Bul - shynaıy jańarý kezeńi bolady. Egemen elimizdi birge órkendeteıik. Halqymyz úshin Táýelsizdik bárinen qymbat! Jańa Qazaqstandy birge quraıyq!», - dedi Memleket basshysy.

Keıinirek Q. Toqaev 8 aqpanda Úkimettiń keńeıtilgen otyrysynda «Jańa Qazaqstan» saıasatynyń basym baǵyttaryn atady.

«Jańa Qazaqstandy» qurý úshin ádil ári túsinikti memlekettik saıasat júrgizilýi kerek. Bul saıasat sanasyz sheneýnikterdiń jónsizdigine jol bermeıdi. Básekege jáne tehnologııaǵa negizdelgen ekonomıkany qalyptastyrady. Sonymen birge jeke menshikke, adamnyń quqyqtary men bostandyǵyna qol suǵylmaýyna zań ústemdigi arqyly kepildik beredi. Barlyq azamattarǵa birdeı múmkindik jasaıtyn da osy saıasat. Árkim Qazaqstannyń bolashaǵyna jaýapty ekenin sezinip, ortaq iske úlesin qosýy kerek. Jurt memleketten ashyq ári túsinikti saıasat júrgizýdi talap etedi. Osy talapqa saı bolýymyz qajet», - dedi Prezıdent.

«Qazaqstan halqyna» qory quryldy

Prezıdent 11 qańtardaǵy sózinde «Qazaqstan halqyna» qoǵamdyq áleýmettik qory qurylatynyn jáne onda qaı sanatqa kómek kórsetiletinin aıtty.

«Qazaqstan — Konstıtýtsııa boıynsha áleýmettik memleket. Memleket az nárse tyndyryp jatqan joq. Respýblıkalyq bıýdjettiń 50 protsentten astamyn áleýmettik shyǵyndar quraıdy. Biraq bul jetkiliksiz. Bizde ulttyq qor bar, ol – elimizdiń qarjylyq tiregi. Búgin «Qazaqstan halqyna» qoǵamdyq áleýmettik qoryn qurýdy tapsyramyn. Ol densaýlyq saqtaý, bilim berý, áleýmettik qoldaý salalaryndaǵy ózekti máselelerdi sheshýge kómektesedi», - dedi Memleket basshysy.

Mysaly osy qor qarajatynan sırek aýrýǵa shaldyqqan balalarǵa kómek kórsetiledi. Qalalarda, aýdandar men aýyldarda balalarǵa sporttyq nysandar salynady. Daryndy balalarǵa kómek kórsetiledi. Mádenıetke, Almaty qalasyn qalpyna keltirýge, qaza tapqan polıtseıler men áskerı qyzmetshilerdiń otbasylaryna qoldaý kórsetiledi.

Sonymen birge, Memleket basshysy atalǵan qorǵa Qazaqstandaǵy óte baı adamdardyń kómektesýi qajet ekenin basa aıtty.

«Tuńǵysh Prezıdent – Elbasynyń arqasynda elimizde óte tabysty kompanııalar toby jáne tipti halyqaralyq ólshemder boıynsha da óte baı adamdar paıda boldy. Endi olardyń Qazaqstan halqyna qurmet kórsetip, oǵan júıeli jáne turaqty negizde kómektesetin kezi jetti dep sanaımyn. Sondyqtan Úkimet kompanııalar tobyn anyqtap, qorǵa jyl saıyn aýdarylatyn jarnalar mólsherin bekitýi kerek. Oǵan qosa, úlken qarajatqa ıe bolyp, kóleńkede júrgen tulǵalardyń da belsendi qatysýyn kútemin. Bul qor qoǵamdy toptastyrýdyń taǵy bir quralyna aınalyp, azamattarda áleýmettik ádilet sezimin nyǵaıta alatynyna senimdimin», - dedi Q. Toqaev.

Sáýir aıynda «Qazaqstan halqyna» qoǵamdyq qoryna 126 mlrd teńge qarjy túsken. Bul qor Qańtar oqıǵalarynda mert bolǵan polıtseılerdiń, áskerılerdiń jáne 13 azamattyń otbasy múshelerine aqshalaı tólemder jiberdi. Odan bólek, «Qazaqstan halqyna» qory múgedektigi bar jáne naýqas balalarǵa kómek kórsetýde.

Ýtıl alymy 50 paıyzǵa tómendedi

Májilistegi jıynda Memleket basshysy Qasym-Jomart Toqaev ýtıldik alym stavkalaryn qaıta qaraýdy tapsyrdy.

«Kásipkerler men jalpy qoǵamda «ÓKM operatory» kompanııasynyń qyzmeti kóptegen suraq týyndatyp otyr. Tipti osy jeke kompanııaǵa qarsy qoǵamdyq qozǵalys ta uıymdastyryldy. Men Úkimetke «Operator ROP» ýtıldik alym jınaýyn ákimshilendirýdi tyıym salýyn tapsyramyn. Munymen shet memleketterdegideı memlekettik uıym aınalysýy kerek. Alymdardyń ózine kelsek, olardyń stavkasy qaıta qaralýy tıis», - dedi Prezıdent.

19 qańtar kúni «ÓKM operatory» JShS-ne ýtılızatsııalyq alym jınaýǵa tyıym salyndy. Ýtılızatsııalyq alym qarajaty esebinen qurylǵan aktıvter memleket menshigine berildi.

Budan bylaı kádege jaratý alymyn jınap, úılestirý «Jasyl damý» aktsıonerlik qoǵamynyń quzyrynda bolady.

Al, qańtardyń sońynda QR Ekologııa, geologııa jáne tabıǵı resýrstar vıtse-mınıstri Ahmetjan Pirimqulov pen «ÓKM operatory» JShS Basqarma tóraǵasy Medet Qumarǵalıev ustaldy. Olarǵa kólik quraldaryn kádege jaratýdyń joǵary qunyn belgilep, kásiporynnyń 20 mlrd teńgeden astam qarajatyn jymqyrdy degen aıyp taǵyldy.

Aqpan aıynda avtokólik pen aýyl sharýashylyǵy tehnıkasyna kádege jaratý alymy 50 paıyzǵa tómendetildi.

14 mamyrda QR Bas prokýratýrasy men Sybaılas jemqorlyqqa qarsy qyzmet ÓKM operatorynyń qarajatyn avtonesıe men áleýmettik jobalarǵa jiberdi.

17 mamyrda 4 paıyzdyq jeńildetilgen avtonesıe berý bastaldy.

Nur Otan partııasy AMANAT bolyp ózgerdi

«Saıası uıymnyń ataýyn Amanat dep ózgertý usynyldy. Jasyratyn eshteńe joq, men de bul máselege baılanysty pikirtalasqa qatystym. Birneshe usynys boldy, sonyń ishinen AMANAT degen ataýǵa toqtadyq. Bul – elimiz úshin de, ultymyz úshin de aıryqsha máni bar kıeli uǵym. Egemendigimiz, eldigimiz ben birligimiz, keń baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qııanat jasamaǵan. Partııa bul qaǵıdatty berik ustanady», - dedi Memleket basshysy 1 naýryzda ótken partııa sezinde.

Bul rette Prezıdent partııa rebrendıngi onyń ataýy men jazylýyn ózgertýdi ǵana bildirmeıtinin, birinshi kezekte barsha partııalyq jumysty qaıta qurý keregin jetkizdi.

«Eń aldymen, ortalyqqa táýeldilikti joıý jáne partııa apparatynyń tıimdiligin arttyrý qajet. Bıýrokratııa men qaǵazbastylyqtan úzildi-kesildi bas tartý kerek. Aımaqtyq fılıaldar men bastaýysh uıymdary saılaýshylarmen ózdiginen jumys isteı alady jáne jumys isteýge mindetti. Ortalyq apparat nusqaýshylyq jáne «qolmen» basqarý tájirıbesinen arylýǵa tıis. Onyń maqsaty – jalpy partııalyq vektordy qurý, ádistemelik ári ıdeologııalyq qoldaýdy qamtamasyz etý, kadrlardy oqytý, júıeli problemalardy taldaý. Partııaǵa senim men yntymaqtastyqqa negizdelgen qarym-qatynastyń jańa mádenıeti kerek», - dedi Q. Toqaev.

Sonymen birge, sezd barysynda «ADAL» saıası partııasynyń «AMANAT» partııasyna qosylýy maquldandy.

Prezıdent partııa tóraǵalyǵynan ketti

«Men buǵan deıin partııa tóraǵasy laýazymynan bosap, uıym qatarynan shyǵatynymdy aıttym. Osy uıǵarymdy júzege asyratyn kez keldi. Búginnen bastap AMANAT partııasynyń tóraǵasy retinde ókilettigimdi toqtatyp, partııadan shyǵý týraly sheshim qabyldadym. Bul qadamnyń sımvoldyq máni bar. Osy oraıda Prezıdent saılaýynda maǵan senim artyp, qoldaǵandaryńyz úshin barshańyzǵa alǵysymdy aıtqym keledi. Sondaı-aq jaýapty sátte partııa tizginin senip tapsyrǵandaryńyz úshin rızashylyǵymdy bildiremin», - dedi Memleket basshysy AMANAT partııasynyń sezinde.

Al 16 naýryzdaǵy halyqqa Joldaýynda Prezıdent óziniń ókilettigin atqarý kezeńinde partııaǵa músheligin toqtata turýǵa mindetti ekenin zań júzinde rásimdeýdi usyndy.

«Bul norma saıası básekeni arttyryp, barlyq partııanyń damýyna birdeı jaǵdaı jasaıdy. Osylaısha, biz elimizdiń bolashaqtaǵy kóshbasshylaryn negizgi saıası ınstıtýttardy ózine baǵyndyryp alýǵa qumar bolýdan saqtaımyz. Dál sol sııaqty, Ortalyq saılaý komıssııasynyń, Esep komıteti men Konstıtýtsııalyq keńestiń tóraǵalary jáne músheleri mindetti túrde partııadan shyǵýy kerek degen normany da zańnamaǵa engizgen jón», - dedi Prezıdent.




Prezıdenttiń jaqyn týystary laýazymdy qyzmet atqara almaıdy

Qazaqstanda Prezıdenttiń jaqyn týystarynyń saıası memlekettik qyzmetshiler men basshylar laýazymdaryna ornalasýǵa zańdy túrde tyıym salynady.

«Barlyq azamattarǵa birdeı múmkindik beriletinine Memleket basshysy myzǵymas kepil bolýǵa tıis. Sondyqtan Prezıdenttiń jaqyn týystaryna saıası memlekettik qyzmetshi bolýǵa jáne kvazımemlekettik sektorda basshylyq laýazymdardy ıelenýge zań júzinde tyıym salynady. Mundaı normany Konstıtýtsııaǵa engizsek te artyq bolmaıdy dep sanaımyn», dedi Qasym-Jomart Toqaev Naýryz aıyndaǵy halyqqa Joldaýynda.

Sonymen birge, Prezıdent elde Prezıdenttiń ókilettigin birtindep qysqarta otyryp, Parlamenttiń rólin aıtarlyqtaı arttyrýdy usyndy.

«Ekinshi másele – ókildi bılik tarmaǵyn qaıta qurý. Biz Prezıdenttiń ókilettigin birtindep qysqarta otyryp, Parlamenttiń rólin aıtarlyqtaı arttyrýymyz kerek. Sol arqyly memleketimizdiń ınstıtýtsıonaldyq tuǵyryn nyǵaıtamyz. Shyn máninde elimizde ókildi bılik tarmaǵy myqty bolýy qajet. Halyqtyń senim mandatyna ıe bolǵan depýtattarǵa joǵary jaýapkershilik júkteledi. Olar memleketimizdi órkendetý isine belsene atsalysýǵa tıis», - dedi Qazaqstan Prezıdenti.

Qazaqstanda Parlamenttiń yqpaly kúsheıedi

«Qazaqstandy damytýdyń saıası modelin ózgertý úshin ár qadamdy muqııat jasaýymyz kerek. Bul jerde basqarýdyń sýperprezıdenttik úlgisinen myqty Parlamenti bar prezıdenttik respýblıkaǵa birjola kóshý týraly aıtyp otyrmyn. Mundaı júıe bılik ınstıtýttarynyń tepe-teńdigi ońtaıly bolýyn qamtamasyz etip, elimizdi ornyqty damytýǵa septigin tıgizedi. Aldymyzda Parlamenttiń rólin kúsheıtý mindeti tur. Bul «halyq únine qulaq asatyn memleket» tujyrymdamasyn tabysty júzege asyrýǵa jol ashady. Biz bolashaqta qandaı el bolatynymyzdy naqty bilemiz. Jańa Qazaqstandy azamattyq qoǵamy qalyptasqan tıimdi memleketke aınaldyramyz. Osyǵan oraı «Kúshti Prezıdent – yqpaldy Parlament – esep beretin Úkimet» qaǵıdatyn basshylyqqa alamyz», - dedi Prezıdent halyqqa Joldaýynda.

Prezıdent saılaýdyń proportsıonaldy-majorıtarly úlgisi týraly aıtyp berdi.

«Ashyǵyn aıtsaq, qazir jurt depýtattardy asa tanı bermeıdi. Osyndaı jaǵymsyz jaıttardy eskere otyryp, men aralas saılaý júıesine kóshýdi usynamyn. Májilistiń depýtattyq korpýsynyń 70 paıyzy proportsıonaldyq, 30 paıyzy majorıtarlyq tásilmen jasaqtalatyn bolady. Sonymen birge aralas saılaý úlgisi oblystar men respýblıkalyq mańyzy bar qalalardaǵy máslıhattar saılaýyna da engiziledi. Budan bylaı majorıtarlyq júıe boıynsha árbir aımaq Parlamenttiń tómengi palatasyna óziniń keminde bir depýtatyn saılaı alady», - dedi ol.

Sonymen birge, Q. Toqaev Senattaǵy prezıdenttik kvota sanyn azaıtý keregin málimdedi.

«Eń aldymen Senatty jasaqtaý tártibi men onyń birqatar fýnktsııasyn qaıta qaraǵan jón. Prezıdent Senattaǵy kvotasyn baqylaýdyń quraly emes, Parlamentte ókilderi az áleýmettik toptardyń úni men oı-pikirin eskerý tetigi retinde qarastyrǵany jón. Osy oraıda Prezıdenttiń Senattaǵy kvotasyn 15-ten 10 depýtatqa deıin azaıtý týraly sheshim qabyldadym. Onyń beseýin Qazaqstan halqy Assambleıasy qazirgideı saılamaıdy, tek usynatyn bolady», - dedi Qasym-Jomart Toqaev.




Partııalardy tirkeý ońaı bolady

«Partııalardy tirkeý rásimi edáýir jeńildeıdi. Tirkeý shegin 4 esege – 20 myńnan 5 myń adamǵa azaıtqan jón. Óńirlerdegi ókilder sany 600-den 200 adamǵa tómendetiledi. Partııa qurý úshin azamattardyń bastamashyl tobynyń eń tómengi sany úshten birge, ıaǵnı 1000-nan 700 adamǵa azaıady», -dedi Prezıdent.

Onyń aıtýyna qaraǵanda, bul - qabiletti saıası partııalardyń paıda bolýyna múmkindik beretin qadam.

«Quryltaı sezin ótkizýge jáne fılıaldardy qurýǵa beriletin ýaqyt kóbeıedi. Bul máselelerdi lıberaldandyrý elimizdegi saıası keńistikti damytý úderisin edáýir jandandyrady. Óz saılaýshylarynyń qordalanǵan problemalaryn saýatty jetkizip, tıimdi sheshýge qabiletti jańa partııalar paıda bolady», - dedi Memleket basshysy.

Qazirgi ýaqytta Ádilet mınıstrliginiń qaraýynda 4 jańa partııanyń qujaty jatyr. Olar – « Halyq derbesti», «El tiregi», «Namys», «Báıterek».

Osydan bir aı buryn Qazaqstan qurylysshylar odaǵy «Eńbek» partııasyn quratynyn jarııalaǵan edi. Al keshe belgili qazaqstandyq saıası qaıratker jáne bıznesmen Bolat Ábilov Bizdin Tandau partııasyn quratynyn málimdedi.

Jańa oblystar quryldy

Memleket basshysy óz Joldaýynda Jezqazǵan oblysynyń aýmaǵynda Ulytaý oblysyn, Semeı aımaǵynda Abaı oblysyn jáne Almaty oblysynan Jetisýdyń bólinip shyǵatynyn jarııalady.

«Jańa oblystardyń qurylýy – kópshiliktiń kókeıinde júrgen másele. Kezinde oblys mártebesinen aıyrylǵan óńirlerde turǵyndar sany azaıyp, turmys sapasy tómendep ketkeni jasyryn emes. Osy olqylyqtyń ornyn toltyratyn kez keldi. Jańadan qurylatyn oblystardyń Abaı, Ulytaý, Jetisý dep atalýynyń erekshe máni bar. Biz ulanǵaıyr jerimizdiń baıyrǵy ataýlaryn, uly tulǵalarymyzdyń esimin urpaq sanasynda jańǵyrta beremiz», - dedi Prezıdent.

Sonymen birge, Q. Toqaev Qapshaǵaıǵa Dinmuhammed Qonaevtyń atyn berýdi usyndy.

«Qapshaǵaı qalasy halqymyzdyń birtýar perzenti Dinmuhamed Qonaevtyń esimimen tyǵyz baılanysty. Eger jurtshylyq Qapshaǵaıǵa Qonaevtyń esimin berý kerek dep usynys aıtsa, men bul pikirge qosylamyn. Men munyń bárin azamattardyń usynys-pikirlerine súıenip aıtyp otyrmyn. Jergilikti turǵyndar jappaı qoldasa osy bastamalarda taıaý arada júzege asyrýǵa bolady dep sanaımyn», - dedi Qasym-Jomart Toqaev.




Konstıtýtsııanyń úshten biri ózgeredi, referendým ótedi

29 sáýirde Qazaqstan halqy Assambleıasynyń HHHІ sessııasynda Prezıdent Qasym-Jomart Toqaev Ata zańǵa ózgerister men tolyqtyrýlar engizý jóninde respýblıkalyq referendým ótkizýdi usyndy.

«Ázirlengen túzetýlerdiń tarıhı mańyzy bar. Biz memlekettigimizdiń damý jolyndaǵy jańa kezeńge qadam basqaly turmyz. Osy reformalar qolǵa alynǵan kezde Konstıtýtsııaǵa engiziletin ózgerister men tolyqtyrýlardyń jobasyn Parlament qaraıdy dep oılaǵan edim. Bul - qoldanystaǵy zańnamada ornyqqan rásimniń biri. Alaıda, aldaǵy aýqymdy ári mańyzdy ózgerister el bolashaǵyna aıryqsha áser etedi. Sondyqtan men Ata zańǵa ózgerister men tolyqtyrýlar engizý jóninde respýblıkalyq referendým ótkizýdi usynamyn», - dedi QR Prezıdenti.

5 mamyrdaǵy beıneúndeýinde Q. Toqaev Joldaýda aıtylǵan bastamalardyń negizgi maqsaty – saıası júıemizdi túbirimen ózgertý ekenin atap ótti.

«Bul halyqtyń kóp jylǵy talap-tileginen týyndap otyr. Azamattarymyz memleketti basqarý isine qatysýǵa keń múmkindik berilgenin qalaıdy. Sondaı-aq saıası úderisti túbegeıli demokratııalandyrý qajet dep sanaıdy. Muny tıimdi júzege asyrý úshin Ata zańymyzǵa ózgerister engizý qajet. Bir sózben aıtqanda, konstıtýtsııalyq reforma jasaý kerek. Osyǵan oraı meniń tapsyrmammen arnaýly jumys toby quryldy. Oǵan belgili quqyqtanýshy ǵalymdar, tájirıbeli sarapshylar jáne quzyrly organdardyń ókilderi kirdi», - dedi Memleket basshysy.

5 maýsymda ótetin respýblıkalyq referendýmda Konstıtýtsııanyń 33 babyna 56 ózgeris engizý máselesi shyǵarylady.

«Konstıtýtsııanyń jańarǵan nusqasynda Prezıdenttiń barlyq saıası kúshter men partııalardan derbestigin bekitý kózdelgen. Memleket basshysynyń jaqyn týystaryna saıası laýazym ıelenýge jáne kvazımemlekettik sektorda basshylyq qyzmet atqarýǵa tyıym salynady. Sondaı-aq quqyq qorǵaý salasy boıynsha mańyzdy ózgerister engiziledi. Atap aıtsaq, Konstıtýtsııalyq sot qurylady. Adam quqyqtary jónindegi ýákildiń, ıaǵnı ombýdsmenniń mártebesi Ata zańmen aıqyndalady. Elimizde ólim jazasy múlde joıylady. Munyń bári azamattardyń quqyqtary men bostandyqtaryn qorǵaý úshin jasalyp jatyr. Aldaǵy konstıtýtsııalyq reforma el damýynyń jańa kezeńi bastalǵanyn kórsetedi», - dedi Prezıdent Qasym-Jomart Toqaev.

Referendýmǵa qatysatyn óńir azamattarynyń keminde úshten ekisi jaqtap daýys berse, onda sheshim qabyldanady. ıAǵnı, eldegi 17 óńirdiń 11-indegi halyq jaqtap daýys berse, Konstıtýtsııaǵa ózgeris engiziledi.









Joǵary qaraı