Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jambyldyq jastarǵa bıyl jeńildetilgen baspana nesıesi beriledi

2022 jyldyń 13 mamyr 2022 05:17

TARAZ. QazAqparat – Bıyl «Áýlıeata jastary» óńirlik baǵdarlamasy aıasynda aımaqtaǵy jastarǵa jeńildetilgen baspana nesıesi berile bastaıdy. Alaıda onyń ózindik talaptary bolady,- dep habarlaıdy QazAqparat tilshisi.

Jambyl oblysy ákimdiginde ótken keńeste jastar saıasaty máseleleri basqarmasynyń basshysy Serikbol Berikqoja atalǵan óńirlik baǵdarlamasynyń oryndalý barysy týraly baıandady.

Baǵdarlama sheńberinde oblysta jańa bastama retinde Jambyl oblysynyń jastaryna jeńildikpen nesıe berý jobasy aǵymdaǵy jyldyń shilde aıynda iske asa bastaıdy dep josparlanýda. Joba óńir jastaryn qoljetimdi turǵyn úımen qamtamasyz etýge jáne jas otbasylarǵa qoldaý kórsetý maqsatynda daıyndalǵan.

«Buǵan deıin oblysta jastar men jas otbasylardy turǵyn úımen qamtamasyz etýge baǵyttalǵan arnaıy baǵdarlama bolmaǵan», - dedi S. Berikqoja.

Jalpy oblysta turǵyn úı alýǵa kezekte - 7 140, jer telimin alýǵa kezekte turǵan 10 787 jas bar.

Atalǵan joba aıasynda jastarǵa beriletin qaryzdyń eń joǵary somasy – 13 mln teńgege deıin. Nesıe berý ýaqyty - 19 jyl. Paıyzdyq mólsherleme - 5%, bastapqy jarna - 5%.

Baǵdarlamaǵa 35 jasqa deıingi QR azamaty jáne negizgi qatysýshy retinde tek erli-zaıyptylardyń bireýi ǵana qatysa alady.

Basqarma basshysy jobaǵa kezekte turǵan memlekettik, bıýdjettik qyzmetkerler qatysa almaıtynyn, negizinen basqa ıpotekalyq baǵdarlamarda qamtylǵan sanattarǵa jatpaıtyn, biraq tólem qabileti bar jastarǵa basymdyq berilip otyrǵanyn jetkizdi.

Oblys ákimi baǵdarlamanyń keı tetikterin zańdyq turǵyda qaıta qaraýdyn mańyzdylyǵyn atap ótti.

«Baǵdarlamanyń maqsaty jaqsy. Bizge kerek joba. Degenmen, erteń jastar nemese qatysýǵa nıettilerdiń arasynda túsinispestik týyndamas úshin, jan-jaqty saralap, sheshim qabyldaýǵa tıispiz. Túsindirý, aqparattyq jumystardy barynsha júrgizý mańyzdy»,-degen oblys ákimi Nurjan Nurjigitov jaýaptylarǵa naqty tapsyrmalar júktedi.


Joǵary qaraı