Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Jambylda aýzymen sýret salyp, keste toqıtyn erekshe qyz turady

2021 jyldyń 17 qańtar 2021 23:07

TARAZ. QazAqparat – Jambyl oblysynda aýzymen sýret salatyn erekshe qyz turady, dep habarlaıdy QazAqparat tilshisi.

Tabıǵattyń sulýlyǵy men syr-symbatyn, álemniń ádemiligin alýan tústi boıaýlarmen aq paraqqa túsirý sýretshilerge ǵana beriletin qabilet. Ásirese, erekshe jaratylǵan jandardyń ónerge degen qushtarlyǵy men qabileti tipti bólek desek, júregi meıirimge, kózi nurǵa toly Aıajan da sondaı aıryqsha qabiletke ıe.

Talas aýdany, Qarataý qalasynyń turǵyny Aıajan Jýataı 24 jasta. «Úmit» mektep-ınternatynyń túlegi. Birneshe, oblystyq, respýblıkalyq baıqaýlardyń jeńimpazy. Erekshe jaratylǵan arý qyz qalamyn tistep otyryp, sýret salady. Aıajannyń syrǵa toly sýretteri janǵa jylýlyq syılasa, toqyǵan kestesi, monshaqtarmen jasaǵan túrli áshekeı buıymdary kózdiń jaýyn alady. Mundaı óner týyndylaryn óz kózimen kórmegen jan eki qoly men aıaǵy damymaǵan adamnyń aýyzymen jasaǵan dúnıesi dep aıtýy ekitalaı. Daryndy Aıajannyń ónerge, ómirge qushtarlyǵy joǵary.

«Men týa bitti osylaı jaratylǵan janmyn. Biraq, taǵdyryma esh ýaqytta nalymadym. Sebebi, meniń eki qolym men aıaǵym damymasa da, estý, kórý qabiletterim erekshe. Kún uzaq jata bermeı, sýret salý men keste toqýdan bólek, janyma jaqyn aqyn -jazýshylardyń óleńin oqyǵandy jaqsy kóremin. Nege ekeni belgisiz sýretti túnde salý unaıdy. Kompıýterdi jaqsy meńgergenmin», – degen daryndy qyz janyna jaqyn jandardyń qamqorlyǵy men súıispenshiligine, demeýine dán rıza ekendigin jetkizdi. Óziniń jaı-kúıin baqytsyzdyqqa balamaı, qorshaǵan orta, qoǵam týraly da tushymdy oıyn ortaǵa saldy.

«Oryndalmaıtyn orynsyz armandy oılaýdan aýlaqpyn. Men úshin atqan tań men batqan kúndi, anamnyń aq júzin kóre alatynym, saf aýamen tynystaı otyryp, oıymdy jetkizýdiń ózi úlken baqyt. Bastysy elimiz álemdi jaılaǵan indetten aman shyqsa. Adamdar densaýlyqlyqtyń qadirin bilip, aqshamen de ala almaıtyn dúnıelerdiń bar ekenin tereń túsinse deımin», – deıdi ol.

Keıde pendelikpen kúıki tirliktiń kúıbeńine shydaı almaı nalyp, qajyp jatamyz. Osyndaı sátte aınalamyzdaǵy san túrli taǵdyr ıeleriniń ómirge, ónerge qushtarlyǵynan sabaq alý artyq etpeıdi.


Avtor Saıa Sembaı
Basty sózder: Jambyl oblysy, Qoǵam,
Joǵary qaraı