Aýa raıy
Astana 20 °S
Almaty 26 °S
valıýta baǵamy
USD 412.55
EUR 468.66
RUB 5.79
CNY 58.80

Jambyl oblysynda muqtaj jandarǵa 300-den astam úı asarlatyp salynady

2020 jyldyń 2 shilde 2020 09:03

TARAZ. QazAqparat – Jambyl oblysynyń 300-den astam eldimekeninde 300-den astam úı asarlatyp salynady. «Asarlatyp úı salý» jobasy «Rýhanı jańǵyrý» baǵdarlamasy aıasynda qolǵa alynyp otyr , dep habarlaıdy QazAqparat tilshisi.

Oblys ákimi Berdibek Saparbaev jobaǵa qoldaý bildirip, ıgi isti uıymdastyrý úshin Taraz qalasy men aýdan ákimderine de tapsyrma berdi.

Baızaq aýdanynda bastaý alǵan asardy oblys boıynsha Jambyl oblysynyń «Rýhanı jańǵyrý» jobalyq ofısi úılestiredi. Basty maqsat – halyqtyń birligin arttyrý, muqtaj jandarǵa kómek berý. Jobanyń taǵy bir ereksheligi – úıli bolatyn otbasyn anyqtaýǵa aýyl ákimdigi ǵana emes, qazynaly qarııalarymyz, aqsaqaldar da atsalysýda.

Bul týraly oblystyq «Rýhanı jańǵyrý» jobalyq ofısiniń basshysy Zarına Qýatova aıtyp ótti.

«Bul – qazaqy ádepti jańǵyrtýdyń bir joly. Al, oblys boıynsha kúrdeli jóndeý jumystary júrip jatqan memlekettik nysandardan shyqqan jaramdy materıaldar úı qurylysyna paıdalanylmaq. Jomart jandar da qol ushyn berýde. Sondaı-aq bul – «Rýhanı jańǵyrý» baǵdarlamasynyń «Pragmatızm» baǵyty aıasynda jańadan qolǵa alynǵan «Únem – qoǵam qýaty» arnaıy jobasyn iske asyrýdyń, ıaǵnı, ysyrapshyldyqqa jol bermeýdiń, memleket múlkin talan-tarajǵa salmaı, ıgi iske jumsaýdyń tóte joly»,-deıdi Z.Qýatova.





Búginde birqatar aýdandarda joba birden qoldaý taýyp, turǵyndardyń aýyldastaryna asarlatyp úı salyp berý isi bastalyp ta úlgergen.

Onyń bir mysaly retinde Baızaq aýdany, Mádimar aýyldyq okrýg ákiminiń sheshimimen 15 sottyq jer telimi bólinip, 4 bala tárbıelep otyrǵan jalǵyzbasty ana – Ǵalııa Qurmanovaǵa 4 bólmeli úı salynyp jatqanyn aıtýǵa bolady. Oǵan aýyldyqtar kóptep-kómektep qolǵabys bildirip jatyr. Mundaı ıgi tirlik aýdandaǵy Úlgili, Qyzyl juldyz, Báıterek aýyldarynda jalǵasyn tabýda.

Sondaı-aq, Sarysý, Shý aýdanyndaǵy da birqatar aýyldyq okrýgterde osy baǵyttaǵy jumystar qolǵa alynǵan. Atap aıtsaq, Sarysýdyń Jańatalap aýyldyq okrýgi Uıym aýyly turǵyndary tarapynan qarjy jınaqtalyp, jalǵyzbasty anaǵa asarlatyp úı salynýda.

Qazirgi tańda úıdiń qabyrǵalary kóterilip jatyr. Basqa aýyldarda da jumys qolǵa alyna bastaǵan.








Joǵary qaraı