Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jambyl oblysynda 25 myńǵa jýyq jumysshynyń jalaqysy 24% ósti

2022 jyldyń 19 qańtar 2022 09:28

TARAZ. QazAqparat – Aımaq basshysy Berdibek Saparbaevtyń tóraǵalyǵymen ótken áleýmettik-eńbek qatynastaryn retteý jónindegi oblystyq úshjaqty komıssııa otyrysynda kásiporyndarda, uıymdar men mekemelerde eńbek zańnamasynyń saqtalýy, ujymdyq sharttar jasasý men olardyń júzege asý máseleleri qaraldy, dep habarlaıdy QazAqparat tilshisi.

Eńbek ınspektsııasy basqarmasynyń basshysy Ernar Esirkepov oblys kásiporyndaryndaǵy jalaqy bereshekterin anyqtaý jáne joıý, óndiristik jaraqattanýshylyqty tómendetý boıynsha atqarylyp jatqan jumystar jóninde baıandady.

Ujymdyq sharttarmen óńirdegi kásiporyndardyń jalpy sanynyń 71,4 paıyzy qamtyldy. Jambyl oblysy bul kórsetkish boıynsha respýblıkada úshinshi orynda.

Oblys ákiminiń tapsyrmasyna sáıkes 195 kásiporyn 24472 jumyskerdiń jalaqysyn orta eseppen 24 paıyz kótergen.

Bul kórsetkish boıynsha kóshbasshylar úshtigine Taraz (30 kásiporyn), Baızaq aýdany (60), Shý aýdany (33) kiredi.

Jıynda eńbek qatynastary salasynda atqarylǵan jumystar týraly Taraz qalasynyń jáne aýdandardyń ákimderi, kásiporyn basshylary, «Jambyl oblysynyń Kásipodaq ortalyǵy» aýmaqtyq kásipodaqtar birlestigi tóraǵasynyń orynbasary Baqtııar Qaraýylov esep berdi.

«Aýdandyq ákimdikter, eńbek ınspektsııalary, kásipodaqtar jumys berýshilerdiń eńbek zańnamasy normalaryn saqtaýyna qatysty máselelerdi birlesip sheshýleri kerek. Ujymdyq sharttardyń talaptaryn oryndaý, qaýipsiz eńbek jaǵdaılaryn jasaý, jalaqylardy ýaqytyly tóleý máseleleri nazardan túspeýi tıis. Kásiporyndar men eńbek ujymdaryndaǵy jaǵdaıdy turaqty túrde zerttep, quqyq buzýshylyqtar týraly der kezinde quzyrly organdardy habardar etý, eńbek janjaldarynyń aldyn alý sharalaryn qabyldaý qajet»,- dedi oblys ákimi.

Sondaı-aq, aımaq basshysy kásiporyndarda jumys oryndarynyń, jalaqynyń qysqarýyna jol bermeý jáne óndiristik jaraqattaný jaǵdaılaryn boldyrmaý boıynsha jumys júrgizýdi tapsyrdy.

Berdibek Saparbaev jaqyn arada iri kásiporyn basshylarynyń qyzmetkerler aldyndaǵy mindettemelerin oryndaýǵa qatysty esepterin tyńdaıtynyn eskertti.


Joǵary qaraı