Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Zeınetaqyny paıdalaný: QR Prezıdenti shekti mejeni 2022 jyldyń 1 sáýirine deıin kótermeýdi tapsyrdy

2021 jyldyń 9 jeltoqsan 2021 17:49

NUR-SULTAN. QazAqparat – QR Prezıdenti Qasym-Jomart Toqaev Úkimetke zeınetaqy qoryndaǵy qarajatty paıdalanýǵa qatysty shekti mejeni kóterý merzimin 2022 jyldyń 1 sáýirine deıin uzartýdy tapsyrdy. Bul týraly Memleket basshysynyń baspasóz hatshysy Berik Ýálı Facebook-te málim etti, dep habarlaıdy QazAqparat.

«Memleket basshysy Qasym-Jomart Toqaev zeınetaqy jınaqtarynyń shekti mejesin kóterý týraly sheshimge qatysty kópshiliktiń ótinishine qulaq asty.

Shekti meje kelesi jyldan bastap eń tómengi jalaqynyń ósýine baılanysty kóteriledi. Zeınetaqy júıesiniń negizgi mindeti – azamattardy zeınetke shyqqannan keıin qajetti jetkilikti tabyspen qamtamasyz etý. Sondyqtan zeınetaqy jınaqtarynyń shekti mejesin kóterý jónindegi sheshim – negizinen osy baǵyttaǵy durys qadam.

Sonymen qatar Memleket basshysy zeınetaqy qoryndaǵy shekti mejeden asqan qarjysyn paıdalanyp úlgermegen azamattardy qoldap, Úkimetke burynǵy shekti mejeni kóterý merzimin 2022 jyldyń 1 sáýirine deıin uzartýdy tapsyrdy», - dep jazdy B.Ýálı.

Eske salaıyq, 2022 jyldyń 1 qańtarynan birjolǵy zeınetaqy tólemin alýdyń jetkiliktilik shegi 1,8 ese kóteriletini málim etilgen bolatyn. QR Eńbek jáne halyqty áleýmettik qorǵaý mınıstrliginiń baspasóz hatshysy Aleksandr Kononets atalǵan shekti mólsher nelikten arttyrylatynyn túsindirdi.

Keıin zeınetaqy jınaǵyn paıdalanýǵa qatysty enpf-otbasy.kz platformasyna úsh kún ishinde ótinishterdiń rekordtyq sany joldanǵany aıtyldy.

QR Indýstrııa jáne ınfraqurylymdyq damý mınıstrliginiń baspasóz qyzmeti zeınetaqy jınaǵyn «Otbasy bank» depozıtine aýdarý múmkindigin túsindirdi.

Búgin senator Nurlan Qylyshbaev Premer-Mınıstr Asqar Mamınniń atyna joldaǵan depýtattyq saýalynda zeınetaqy jınaǵyn paıdalanýǵa qatysty jetkiliktilik shegin arttyrý máselesin kóterdi. Depýtat Memleket basshysy zeınetaqy esep-shotynan artyq jınaqty alýǵa múmkindik beriletin azamattar sanatyn birtindep ulǵaıtýdy tapsyrǵanyn eske saldy. Senator qazirgi tańda jetkiliktilik somalaryn kóterý taqyryby qoǵamda qyzý talqylanyp jatqanyn atap ótti.


Joǵary qaraı