Zeınetaqy jınaǵyn alý: Úsh saǵatta arnaıy saıtta 4 myńnan astam ótinim tirkeldi

NUR-SULTAN. QazAqparat – Búgin arnaıy portalda zeınetaqynyń bir bóligin alýǵa ótinim qabyldaý bastalǵaly 4 myńnan astam adam ótinish berdi. Bul týraly «Otbasy bank» AQ baspasóz qyzmetinen málim boldy, dep habarlaıdy QazAqparat tilshisi.

«Búgin saǵat 09:00-den bastap enpf-otbasy.kz arnaıy saıty iske qosyldy. Sodan bergi úsh saǵat ishinde 4 509 ótinim qabyldandy. Qazirgi kezde ótinim qabyldaıtyn saıt qalypty rejımde jumys istep tur», - dedi baspasóz qyzmetiniń ókili QazAqparat saýalyna jaýap bere otyryp.

Bank málimetinshe, zeınetaqynyń bir bóligin aýdarýǵa arnalǵan 65 myńǵa tarta arnaıy shot ashyldy.

Budan buryn habarlanǵandaı, zeınetaqynyń bir bóligin alýǵa ótinim qabyldaıtyn saıt iske qosyldy. Osy arqyly el aýmaǵynda ótinim qabyldaý bastaldy.

Aıta keteıik, Ortalyq kommýnıkatsııalar qyzmetiniń alańynda keshe zeınetaqynyń bir bóligin baspanaǵa jumsaý máselesine qatysty baspasóz máslıhaty ótti.

Indýstrııa jáne ınfraqurylymdyq damý mınıstrliginiń ókilderi men «Otbasy bank» basshylary jıynda kóptiń kókeıinde júrgen basty suraqtarǵa jaýap berdi.