Aýa raıy
Astana 5 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Zarına Dııas Strasbýrg týrnıriniń ekinshi aınalymyna shyqty

2020 jyldyń 21 qyrkúıek 2020 17:23

NUR-SULTAN. QazAqparat – Qazaqstandyq Zarına Dııas Strasbýrg WTA týrnıriniń ekinshi aınalymyna shyqty, dep habarlaıdy QazAqparat tilshisi.

Álemniń 72-raketkasy Z.Dııas alǵashqy aınalymda dúnıejúzilik reıtıngte 79-orynda turǵan amerıkalyq Krıstına Makheılmen kúsh synasty.

Zarınanyń bastapqyda qarsylasy chehııalyq Barbora Strytsova bolyp belgilengenimen, ol kelmeı qaldy da, ornyna amerıkalyq sportshy shyqty.

Úsh setke sozylǵan match óte tartysty ótti.

Birinshi partııada taı-breıkte K.Makheıl basymdylyq kórsetti – 7:6 (7:4).

Ekinshi sette Zarına Dııas ese qaıyrdy – 7:5.

Úshinshi, sheshýshi partııada áýeli qazaqstandyq tennısshi breık jasap, alǵa shyqqanymen, qarsylasy da qarap qalmady. Degenmen esep 4:4 bolǵanda, Zarına breıkke qol jetkizdi. Áıtse de matchqa dop bergende, sol múmkindigin paıdalana almady. Aqyry kezdesý taǵdyry taı-breıkte sheshilip, onda qazaqstandyq tennısshi jeńisti julyp aldy – 7:6 (7:3).

Báseke 3 saǵat 11 mınýtqa sozyldy.

Zarına ekinshi aınalymda US Open týrnıriniń 2017 jylǵy chempıony, álemniń 33-inshi, týrnırdiń 8-raketkasy, amerıkalyq Sloan Stıvens nemese reıtıngte 83-satydaǵy japonııalyq Nao Hıbınonyń bireýimen synǵa túsedi.

Eske sala keteıik, budan buryn D.Popkonyń Rolan Garros doasynyń irikteý saıysyn sátti bastaǵanyn, E.Rybakınanyń Strasbýrg týrnırinde jeńiske jetkenin jazǵan bolatynbyz.


Avtor Eljan Eraly
Basty sózder: Sport,
Joǵary qaraı