Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

ıÝNESKO-nyń shtab-páterinde Abaı mereıtoıynyń halyqaralyq tusaýkeseri ótedi

2020 jyldyń 5 maýsym 2020 15:32

NUR-SULTAN. QazAqparat – Mádenıet jáne sport mınıstri Aqtoty Raıymqulova Abaıdyń 175 jyldyǵyn atap ótýde ysyrapshyldyqqa jol berilmeıtinin málimdedi, dep habarlaıdy QazAqparat tilshisi.

«Osy jyly biz halqymyzdyń kórnekti aqyny jáne oıshyly Abaı Qunanbaıulynyń mereıtoıyn atap ótýdemiz. Abaı fılosofııasy bizdiń mádenı jáne ulttyq biregeıligimizdiń ajyramas bóligine aınaldy. 21 qańtarda «Astana Opera» teatrynda Uly Abaıdyń mereıtoıyn resmı túrde ashý rásimi ótti. Prezıdentimiz Qasym-Jomart Kemeluly Toqaevtyń «Abaı jáne HHІ ǵasyrdaǵy Qazaqstan» maqalasynda eń basty maqsat – toı toılaý emes, oı tolǵaý, oı órisimizdi keńeıtý ekenine zor mán berip otyrǵanyn bilesizder. Bekitilgen jalpy respýblıkalyq jospardyń barlyq is-sharalary ıdeologııalyq jáne aǵartýshylyq júktemeni kóteredi», - dedi Aqtoty Raıymqulova OKQ alańy arqyly onlaın rejımde halyq aldynda esep berý kezdesýinde.

Mınıstr Memleket basshysy atap ótkendeı, mereıtoıdyń kún tártibi tujyrymdamalyq turǵydan elde jáne shetelde Abaı tulǵasynyń jahandyq aýqymyn keńinen tanymal etýge arnalǵan ıdeologııalyq-mazmundy jáne sapaly is-sharalardy ótkizýge negizdeletinin aıtyp ótti.

«Bul rette bıyl atap ótiletin mańyzdy is-sharalar barysynda ysyrapshyldyq pen naýqanshyldyqqa jol berilmeıtindigine basa nazar aýdarǵym keledi. Búgingi kúni Abaıdyń murajaı-úıinde, Jıdebaıdaǵy «Abaı-Shákárim» memorıaldyq kesheninde ǵylymı-restavratsııalaý jumystary júrgizilýde. Abaıdyń «Jıdebaı-Bórili» mýzeı-qoryǵyn tolyqqandy ǵylymı-zertteý ortalyǵy etip qaıta qurý tujyrymdamasy ázirlendi. Jalpy, Shyǵys Qazaqstan oblysyndaǵy 18 nysanda jumystar júrgizilýde», - dedi ol.

Aqtoty Raıymqulova óz sózinde Abaı shyǵarmashylyǵyn nasıhattaý maqsatynda elde jáne shetelde onyń eńbekteri álemniń 8 shet tiline aýdarylyp, basylyp shyǵarylatynyn atap ótti.

«Pragada Abaıdyń mádenı-aqparattyq ortalyǵy ashyldy. Bratıslava, Býdapesht, Berlın qalalarynda «Abaı oqýlary», kórmeler, dóńgelek ústelder uıymdastyryldy. Nur-Sultan qalasyndaǵy L.N. Gýmılev atyndaǵy Eýrazııa ulttyq ýnıversıtetiniń bazasynda «Abaı akademııasy» ǵylymı-zertteý ınstıtýty quryldy. Mereıtoıdyń negizgi sharalaryn qyrkúıek aıynda Shyǵys Qazaqstan oblysynda ótkizý jospralanyp otyr. Qazan aıynda Parıjdegi ıÝNESKO-nyń Shtab-páterinde Abaı mereıtoıynyń halyqaralyq tusaýkeseri ótedi», - dedi Aqtoty Raıymqulova.


Avtor Aıan Bekenuly
Basty sózder: Ádebıet, ıÝNESKO, #Abai175,
Joǵary qaraı