Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Volonter Damır Kósheev Túrkııada 3 myń shaqyrymdy velosıpedpen júrip ótti

2021 jyldyń 2 tamyz 2021 08:56

TÚRKІSTAN. QazAqparat - Qazaqstannyń belgili sportshysy, tanymal volonter Damır Kósheev Ystanbul-Izmır-Bodrým-Marmarıs-Antalııa-Ankara-Akchakoja-Ystanbul qalalarynyń aralyǵyn velosıpedpen júrip ótti, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Ol 30 kún boıy 3 000 shaqyrymǵa jýyq qashyqty baǵyndyrý úshin Túrkistan qalasynan Túrkııa Respýblıkasyna attandy. Erikti Óńirlik kommýnıkatsııalar ortalyǵynda ótken brıfıngte «Qazaqstan - ulylardyń otany» atty sapar barysyna keńinen toqtaldy.

Joba el Táýelsizdiginiń 30 jyldyq mereıtoıyna oraı Qazaqstan Respýblıkasy men Túrkııa Respýblıkasynyń arasyndaǵy dostyqty nyǵaıtý maqsatynda uıymdastyryldy.

«Meniń osy saparym eki el arasyndaǵy yntymaqtastyqtyń nyǵaıýyna septigin tıgizse meniń jetistigim sol. Aýa-raıynyń ystyqtyǵy men klımattyń qolaısyzdyǵyna qaramaı maqsatymdy oryndadym. Qoldaý bildirgen barlyq azamatqa alǵys aıtamyn. Aldaǵy ýaqytta bul baǵyttaǵy josparym óte kóp. Maǵan Túrkııanyń astanasy Ankara qalasyndaǵy Abaı Qunanbaev atyndaǵy saıabaq unady. Sondaı-aq, birneshe qaladaǵy skverler, mektepter men kóshelerge qazaqtyń uly aqynynyń esimi berilgen. Bul biz úshin asqaq abyroı, maqtanysh sezimi dep bilemin», - dedi veloshabandoz.

Qazaqstannyń Túrkııa Respýblıkasyndaǵy elshiligi men Túrkııanyń Velosıped sporty federatsııasy belgili Damır Kósheevpen birge Ankara qalasynda velotýr uıymdastyryp, jobanyń mańyzdylyǵyn arttyra tústi. Іs-sharaǵa elshi Abzal Saparbekuly bastaǵan dıplomattar toby men túriktiń ulttyq sportshysy Ahmet Aqıýrek bastaǵan birneshe sportshy qatysty.


Joǵary qaraı