Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Ujymdyq ımmýnıtet ne úshin qajet – dáriger pikiri

2021 jyldyń 30 shilde 2021 23:27

NUR-SULTAN. QazAqparat – Koronavırýstyń úndi shtamy burynǵydan qalaı erekshelenedi? Nelikten ujymdyq ımmýnıtettiń bolýy mańyzdy? Bul suraqtarǵa Nur-Sultan qalasynyń №2 qalalyq emhanasynyń Profılaktıka bóliminiń meńgerýshisi Gúlmıra Baratova jaýap berdi, dep habarlaıdy QazAqparat tilshisi.

«Bıylǵy jaz byltyrǵydan ózgeshe, óıtkeni qazir vırýstyń taǵy bir shtamy – Delta bar, ol óziniń anaǵurlym juqpaly bolýymen erekshelenedi. Koronavırýstyń Ýhan nusqasynda vırýsty tórt adamǵa deıin juqtyratyn bolsa, qazirgi jaǵdaıda – bir adamnan jeti adamǵa deıin juǵýy múmkin. Delta shtamynyń ınkýbatsııalyq kezeńi eki ese qysqa – tek jeti kún jáne aýrýdyń belgileri de ózgeshe: JRVI, tamaqtyń qyshýy, bas aýrýy jáne jótel baıqalady. Sondaı-aq, asqazan aýyryp, ishtiń ótýi de múmkin. Adamdar áli de dim men ıis sezýdiń joǵalýy sııaqty aldyńǵy shtamǵa tán belgilerdi kútip júr. Ne degenmen jaǵdaı baqylaýda. Qazir KVI naýqastaryna baratyn mobıldi brıgadalar jumys isteıdi. Naýqastar oqshaýlanyp jatyr, olarmen mobıldi brıgadalardyń qyzmetkerleri jumys isteıdi, em-dom taǵaıyndaıdy. Eger adamdardyń jaǵdaıy aýyr bolsa, olar aýrýhanaǵa jatqyzylady», - dep atap ótti dáriger.

Onyń aıtýynsha, qazir elimizde ujymdyq ımmýnıtetti damytý úshin adam sany jetkiliksiz.

«Sol sebepti adamdar áli aýrý juqtyryp jatyr, koronavırýs kúsheıip, juqtyrǵandar sany ósýde. Árıne, vaktsına koronavırýstan 100% qorǵamaıdy. Óıtkeni, vaktsına alǵan adamdar da aýyrady, biraq vaktsına aýrýdy áldeqaıda jeńildetedi, asqynýlar bolmaıdy, mundaı naýqastar ókpeni jasandy jeldetý jaǵdaıyna jetpeıdi. Mysal retinde tumaýdy alyp qaraıyq. Tumaýǵa qarsy ekpe alǵandar da tumaýmen aýyrýy múmkin, biraq aýrýǵa ońaı jáne asqynýsyz tótep beredi», - dep túsindirdi Gúlmıra Baratova.

Dáriger koronavırýstan qorǵanýdyń eń jaqsy ádisi – vaktsınalaý ekenin eske saldy.

«Ázirge bul – jalǵyz qorǵaný joly. Karantın sharalaryn saqtaı otyryp, ózińizdi qorǵaı alasyz. Ókinishke oraı, keı turǵyndar densaýlyǵyna baılanysty vaktsına saldyra almaıdy. Vaktsınalaýǵa bolmaıtyn onkologııalyq naýqastar da bar. Bul jaǵdaıda ujymdyq ımmýnıtet kómektesedi. Turǵyndardyń basym kópshiligi vaktsına alsa, KVI vırýsynyń qozdyrǵyshy aınalymǵa túspeıdi, demek, vaktsınalaýǵa qarsy kórsetilimi bar adamdar da qorǵalady. Barlyq turǵyndardy vaktsına egýge shaqyramyz, ol úshin barlyq jaǵdaı jasalǵan, egý pýnktteri jumys isteıdi», - dedi dáriger.


Joǵary qaraı