Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Urlanǵan qarýdy óz erikterimen tapsyrǵandar jazadan  bosatylady – Bas prokýratýra

2022 jyldyń 25 qańtar 2022 20:06

NUR-SULTAN. QazAqparat – Tártipsizdik kezinde urlanǵan qarýdy óz erikterimen tapsyrǵan adamdarǵa qylmystyq jaýaptylyqtan bosatylady.

Bul týraly búgin Ortalyq kommýnıkatsııalar qyzmetinde QR Bas prokýratýrasy birinshi qyzmet basshysynyń orynbasary Eldos Qılymjanov málim etti, dep habarlaıdy QazAqparat tilshisi.

«Quqyq qorǵaý organdary qylmystyq isterdi tergeýmen qatar, urlanǵan qarýdy izdeý jáne olardy tárkileý jumystaryn jalǵastyrýda. Іshki ister mınıstrliginiń ókili aıtqandaı, qarýlardy óz erkimen tapsyrý múmkindigi bar. Óz kezeginde Bas prokýratýra zańsyz saqtalǵan qarýlardy, oq-dárilerdi, jarylǵysh zattardy óz erikterimen tapsyrǵan adamdarǵa qylmystyq jaýaptylyqtan bosatý kepilin beredi», - dedi Eldos Qılymjanov.

Onyń aıtýynsha, qarýdy óz erkimen tapsyrǵandardyń áreketterinde basqa da qylmys quramy bolmaýy kerek.

«Sonymen qatar azamattardyń nazaryna aıta ketetin jáıt, adam qarýmen júrip, quqyq qorǵaý organdaryna ustalsa, ondaı jaǵdaı óz erkimen qarýdy tapsyrý dep tanylmaıdy. Іshki ister organdaryna zańsyz aınalymnan atys qarýlaryn alý boıynsha jedel-izdestirý jáne profılaktıkalyq is-sharalardy jandandyrý týraly tapsyrma berildi», - dedi Bas prokýratýranyń ókili.

Budan buryn habarlanǵandaı, tártipsizdik kezinde qarýdy urlaǵany úshin 98 adam ustalyp, ýaqytsha ustaý abaqtysyna qamaldy jáne olardy zańsyz saqtaǵany úshin 61 adam ustaldy.

«Tártipsizdik barysynda 7 ańshylar dúkenine shabýyl jasalyp, tonaldy. Olardan 1 564 azamattyq qarý urlandy», - dedi QR ІІM Tergeý departamentiniń bastyǵy Sanjar Ádilov.



Joǵary qaraı