Aýa raıy
Astana -2 °S
Almaty 5 °S
valıýta baǵamy
USD 421.58
EUR 496.83
RUB 5.53
CNY 62.20

Túımebaev: Birlikti qamtamasyz etý – kóp quramdy memleketterdiń negizgi kún tártibinde qala beredi

2020 jyldyń 21 qyrkúıek 2020 22:04

MÁSKEÝ. QazAqparat – Búgin Qazaqstan halqy Assambleıasy Tóraǵasynyń orynbasary – Hatshylyq meńgerýshisi Janseıit Túımebaev Máskeý qalasynda ótken Eýrazııa halyqtary Assambleıasynyń Halyqaralyq beıbitshilik kúnine arnalǵan onlaın-aktsııasyna qatysty, dep habarlaıdy QazAqparat tilshisi.

Aktsııanyń maqsaty – beıbitshilik pen kelisimdi saqtaý jolyndaǵy asa mańyzdy máselelerdi talqylaý.

«Búgingi tańda barlyq elder pandemııaǵa jáne ekonomıkalyq ósimniń baıaýlaýyna baılanysty kúrdeli kezeńderdi bastan ótkerýde.

Munyń bári áleýmettik máselelerdiń shıelenisýine, al keıbir jaǵdaılarda ksenofobııanyń, etnokonfessııalyq janjal kórinisteriniń ulǵaıýyna yqpal etetini barshamyzǵa málim.

Áleýmettik kıkiljińder etnostyq jáne dinı sıpat alýda, onyń saldarynan mıgranttar men bosqyndar sany ósýde.

Qazirgi ýaqytta kópetnosty qoǵamdardy biriktirýdiń bir kezdegi tabysty úlgileri eleýli synaqqa ushyraýda.

Mádenıetter men qundylyqtardyń alshaqtaýynyń kórinisi, mıgrantofobııa men násilshildiktiń ósýi, ózara beıimdelý protsesiniń qıyndyqtary buryn sátti júrgizilgen etnomodelderdiń 21 ǵasyrda keıde jumys istemeı otyrǵanyn kórsetti.

Kerisinshe, álem, burynǵydaı, qazirgi ahýal talaptaryna saı keletin, birliktiń jańasha formýlalaryn jasaý protsesinde bolyp otyr.

Sondyqtan birlikti qamtamasyz etý mindeti kóp quramdy barlyq memleketterdiń negizgi kún tártibinde qala beredi», - dedi J.Túımebaev.

QHA Tóraǵasynyń orynbasary óz sózinde Qazaqstan 100-den astam etnos ókilderi turatyn kópetnosty memleket ekendigin atap ótti.

«Álemniń 60-tan astam eli men aýmaǵy bizdiń etnostarymyzdyń tarıhı otany bolyp tabylady.

Táýelsizdik alǵan sátten bastap tatýlyq pen kelisimdi qamtamasyz etý memlekettik saıasattyń asa mańyzdy baǵyty.

Zań aldyndaǵy teńdik, qoǵamdyq kelisim, «Áralýandyqtaǵy birlik» qaǵıdattary bizdiń baǵa jetpes baılyǵymyz jáne strategııalyq resýrsymyzǵa aınaldy.

Biz etnostyq jáne mádenı san alýandyqty el damýynyń tıimdi quralyna aınaldyrdyq.

1995 jyly Tuńǵysh Prezıdent N.Á.Nazarbaevtyń bastamasymen qurylǵan Qazaqstan halqy Assambleıasy etnosaralyq ózara is-qımyldyń negizgi ınstıtýtyna aınaldy.

Barlyq etnostardy birtutas halyqqa biriktire otyryp, ol parlamenttik ókildigi bar jalpyhalyqtyq ınstıtýttyń joǵary konstıtýtsııalyq mártebesine qol jetkizdi.

25 jyl buryn ol 40-qa jýyq etnomádenı birlestikterdi biriktirse, búgingi tańda mundaı qurylymdar sany myńnan asady.

Búkil el aýmaǵynda tatýlyq pen kelisimniń azamattyq ortalyqtaryna aınalǵan qyryqtan astam Dostyq úıi bar.

Bizdiń ıntegratsııalyq model, eń aldymen, ortaq qundylyqtar, etnostardyń tilderi, mádenıeti, dástúrleri bizdiń jalpy mádenı baılyǵymyzdy quraıtyn eldiń jalpy mádenı keńistigi negizinde qurylady.

Árbir etnos - Qazaqstan halqynyń ajyramas bóligi.

Bizdiń etnostardyń eshqaısysy oqshaýlaý strategııasyn tańdaǵan joq.

Assambleıa etnostardyń azamattyq qaǵıdattarynda toptasýy jónindegi irgeli máselelerdi sheship, áralýandyqtaǵy birlikti saqtap qaldy.

Birikken Ulttar Uıymy, Eýropadaǵy qaýipsizdik jáne yntymaqtastyq uıymy bizdiń etnosaralyq qatynastar men ıntegratsııa modelimizge árqashan joǵary baǵa beredi.

Ótken jyly EQYU-nyń az ulttar isteri jónindegi Joǵarǵy komıssary Lamberto Zaner myrza bizdiń etnosaralyq jáne konfessııaaralyq kelisim salasyndaǵy saıasatymyzǵa joǵary baǵa berdi.

Álemdi birge qalyptastyra otyryp, biz áriptesterdi polıetnosty qoǵamdarda tatýlyq pen birlikti nyǵaıtýdyń tıimdi formýlasyn izdeý úshin kúsh-jigerdi biriktirýge shaqyramyz», - dedi Janseıit Túımebaev.

Konferentsııa jumysyna sondaı-aq kórnekti qoǵam jáne ǵylym qaıratkerleri, ıÝNESKO, BUU halyqaralyq uıymdarynyń jáne Reseı Federatsııasyndaǵy dıplomatııalyq mıssııalardyń ókilderi qatysty.


Joǵary qaraı