Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Turmystyq kelispeýshilikti ultaralyq kıkiljiń deýge bolmaıdy – Maııa Bekbaeva

2021 jyldyń 3 jeltoqsan 2021 20:20

NUR-SULTAN. QazAqparat – Elimizde eshqandaı ultaralyq kıkiljiń, daý-damaı joq. Kerisinshe barlyq ult ókilderi tatý-tátti ómir súrip jatyr. Bul týraly Qazaqstan halqy Assambleıasy tóraǵasynyń orynbasary Maııa Bekbaeva málim etti, dep habarlaıdy QazAqparat tilshisi.

«Ultaralyq kıkiljiń armıandar men ázirbaıjan halqy arasynda bar. Eki memlekettiń arasynda uzaq jyldar boıy qaqtyǵystyń bolǵany ras. Qazaqstanda ultaralyq kıkiljiń joq. Qazaq halqy barlyq ult ókilderimen beıbit qarym-qatynasta. Sondyqtan óz basym Qazaqstanda ultaralyq kıkiljiń bar degen pikirmen kelispeımin. Bizde barlyq ulttar tatý-tátti ómir súrip jatyr. Al jan alysyp, qan tógisip, jaýlasý joq. Ulttar arasynda turmystyq kelispeýshilik bar, biraq ony ultaralyq kıkiljiń deýge bolmaıdy», - dedi Maııa Bekbaeva elordada ótken «Beıbitshilik jáne kelisim jolymen» telejobasynyń tusaýkeseri rásiminde.

Onyń aıtýynsha, elimizde bolyp jatqan keıbir turmystyq kelispeýshilikter qoǵamǵa burmalanyp taralyp jatyr.

«Qazir ınternet zamany. Kez kelgen adam oqıǵany ınternet arqyly tarata alady. Al bolǵan oqıǵa qanshalyqty shyndyqqa janasady ol bólek másele. Jáne búginde aqparat tez taralady. Qaıtalap aıtamyn, bizdiń elimizde barlyq ulttyq beıbit qarym-qatynasta ómir súrýde. Taıaýda bolǵan Penjim aýylyndaǵy oqıǵany alsaq, ol jerde oqýshylar «sen qazaqsyń, men uıǵyrmyn» dep ultyn dáleldeý úshin tóbelesken joq. Bul balalar arasyndaǵy ózara kelispeýshilik. Ókinishke qaraı, qoǵamda bul oqıǵany burmalap, teris jaǵynan taratýshylar boldy. Qazaq pen uıǵyr halqynyń qarym-qatynasy áriden dostyqqa negizdelgen. Elimizde qanshama qazaq-uıǵyr otbasy bar», - deıdi ol.

Buǵan deıin QHA qazaqstandyqtarǵa «Beıbitshilik jáne kelisim jolymen» telejobasyn usynǵany týraly habarlaǵan edik.


Joǵary qaraı