Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Túrkııada qalyp qoıǵan qazaqstandyqtardy elge jetkizý aıaqtaldy

2022 jyldyń 17 qańtar 2022 07:18

TÚRKIıA. QazAqparat - Túrkııada qalyp qoıǵan qazaqstandyqtardy elge jetkizý aıaqtaldy. Bul týraly Qazaqstannyń Ystanbuldaǵy Bas konsýly Álim Baıel málimdedi, dep habarlaıdy QazAqparat.

2022 jyldyń 5 qańtarynan bastap tek Ystanbulda myńnan astam jolaýshy qalyp qoıǵan. Osyǵan baılanysty, Qazaqstannyń Túrkııadaǵy Elshiligi men Ystanbuldaǵy Bas konsýldyǵy azamattarǵa aqparattyq, quqyqtyq jáne materıaldyq kómek kórsetý boıynsha jedel shtab quryp, jan- jaqty qoldaýdy kórsetti.

«Bas konsýldyq áleýmettik paraqshalarda azamattardy olardyń Qazaqstanǵa oralýy týraly ýaqtyly habardar etý úshin arnaıy habarlama chattaryn iske qosty. Ystanbuldyń eki áýejaıynda da azamattarǵa qajetti kómek kórsetý maqsatynda konsýldyq qyzmetkerleriniń kezekshiligi uıymdastyryldy. Qazaqstanǵa Ózbekstan, Qyrǵyzstan jáne Reseı arqyly jetýge sheshim qabyldaǵan azamattarǵa bılet satyp alý, sondaı-aq, olardyń qozǵalysyn QR-nyń tıisti elderdegi sheteldik mekemelerimen úılestirý boıynsha kómek kórsetildi», delingen habarlamada.

Bas konsýldyq reısterdi kútý kezinde asa muqtaj 154 jolaýshyny qaladaǵy qonaqúılerde tegin ornalastyrdy. Eriktiler men Ystanbuldaǵy qazaq dıasporasynyń ókilderi 100-den astam otandasymyzdy ystyq tamaq pen jyly tósekpen qamtamasyz etti. Sondaı-aq, dıplomattardyń úılestirýimen 300-den astam jolaýshy ystyq tamaqpen, 200-ge jýyq jolaýshyǵa qala ishinde arnaıy tasymal kólikteri qyzmet kórsetti.

«Qazaqstandyq dıplomattar áýe kompanııalarymen turaqty baılanysta bolyp, reısterdi tez arada qalpyna keltirý jóninde kelissózder júrgizdi. Jaǵdaıdyń turaqtanýyna qaraı Qazaqstanǵa áýe reısteri qalpyna kele bastady. Bas konsýldyq reısteri oryndalmaǵan barlyq jolaýshylardy elge jetkizý úshin azamattar men áýe kompanııalarynyń áreketterin úılestirdi. 15 qańtardaǵy jaǵdaıǵa sáıkes, Ystanbuldan Qazaqstannyń túrli qalalaryna 2 500-den astam qazaqstandyq ushqan. Antalııada qalyp qoıǵan qazaqstandyqtardyń da barlyǵy derlik elge jetkizildi», delingen habarlamada.

Máselen, Bas konsýldyqtyń Túrik áýe joldarymen kelisimi boıynsha 11 qańtarda Almatyǵa 151 azamat oraldy, onyń ishinde 75 jolaýshy bortqa aqysyz qabyldandy. Qazir barlyq áýe kompanııalary (AirAstana, Túrik áýe joldary, FlyArystan, Scat jáne t.b.) reısterin óz kestelerine sáıkes shtattyq rejımde oryndaýda. Túrkııadan kelgen jolaýshylardy Almaty áýejaıy da qabyldaı bastady.

Basty sózder: QR SІM, Týrızm, Túrkııa,
Joǵary qaraı