Aýa raıy
Astana -12 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Túrkistanda koronavırýstan jazylǵandardy ońaltý ortalyǵy ashyldy

2020 jyldyń 30 qazan 2020 06:29

TÚRKІSTAN. QazAqparat - Túrkistanda koronavırýs ınfektsııasymen nemese pnevmonııamen aýyryp, odan emdelip shyqqandardy ońaltýǵa arnalǵan alǵashqy ortalyq ashyldy, dep habarlaıdy QazAqparat tilshisi.

Oblys ákimdiginiń baspasóz qyzmetinen málim etkendeı, qalalyq emhanada ornalasqan jańa ortalyqtaǵy mamandar alǵashqy 19 emdelýshini qabyldap, reabılıtatsııalyq kómek kórsetýde. Olarǵa ıngalıatsııa, parafınoterapııa, emdik massaj, velotrenajer syndy emdik sharalary júrgiziledi.

Ortalyqty aldaǵy ýaqytta magnıtti terapııa jáne basqa da medıtsınalyq apparattarmen tolyqtyrý josparlanǵan. Emhana bazasynda sonymen qatar vırýsologııalyq zerthanasy úzdiksiz jumys isteıdi. Munda Túrkistan oblysynyń Otyrar, Báıdibek, Sozaq aýdandary men Kentaý, Túrkistan qalalaryndaǵy emdeý mekemelerinen alynǵan PTR synamalaryna taldaý jasalady. Nátıjeleri ortalyqtandyrylǵan júıe arqyly azamattardyń jeke málimet júıesine engiziledi.

Oblys aýmaǵynda júrgizilip jatqan koronavırýs ınfektsııasymen kúres jumystary BAQ ókilderine arnalǵan baspasóz týry aıasynda keńinen tanystyryldy.

«Koronavırýs ınfektsııasynyń yqtımal ekinshi tolqyny bastalǵan jaǵdaıda emhanalardyń qyzmeti qalypty jaǵdaıda jalǵasa beredi. Sanıtarlyq talaptardy qatań saqtaı otyryp, dárigerler turǵyndardy aldyn ala jazylý boıynsha qabyldaıdy. Al koronavırýs belgileri bar naýqastar bólek esik arqyly súzgi bólimine kirgizilip, bólek kabınette tekseriledi. Vırýs anyqtalǵan jaǵdaıda ambýlatorııalyq baqylaý jáne emdeý júrgiziledi. Oblystaǵy barlyq medıtsınalyq uıymdarda indetpen kúres jumystary barynsha kúsheıtilgen», - deıdi Túrkistan qalalyq emhanasynyń bas dárigeri Raıymbek Tasyrbaev.

Baspasóz týry barysynda Túrkistan qalalyq aýrýhanasynyń da indetpen kúreske daıyndyq jumystary tanystyryldy. Koronavırýs ınfektsııasynyń birinshi tolqynynda aýrýhanada 300-den astam qyzmetker jumyldyrylǵan bolatyn. Emdeý mekemesinde 320 tósek-oryndyq provızorlyq statsıonar qarastyrylǵan. Qosymsha 50 oryndyq ınfektsııalyq bólim ashý josparlanǵan. Aýrýhana 81 ottegi taratý kózi, 16 dana ókpeni jasandy jeldetý apparaty, 70 dana ottegi kontsentraty men 70 pýlsoksımetrmen tolyqty. Sondaı-aq statsıonarlyq ottegi stantsııasy ornatylyp, eki aılyq dári-dármek qory jáne dezınfektsııalyq zattarmen, jeke qorǵanysh kıimderimen qamtamasyz etilgen.


Joǵary qaraı