Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Túrkistan oblysynyń densaýlyq saqtaý salasy respýblıkada kósh bastady

2021 jyldyń 4 naýryz 2021 06:29

TÚRKІSTAN. QazAqparat - Túrkistan oblysynyń densaýlyq saqtaý salasy elimiz boıynsha kósh bastady. Pandemııa kezinde oryn alǵan qıyndyqtarǵa qaramastan, qoǵamdyq densaýlyq basqarmasy memlekettik baǵdarlamalar kórsetkishi boıynsha aýqymdy jumys atqarǵan, dep habarlaıdy QazAqparat tilshisi.

Premer-mınıstrdiń orynbasary Eraly Toǵjanovtyń qatysýymen ótken Densaýlyq saqtaý mınıstrliginiń keńeıtilgen alqa otyrysynda byltyr atqarylǵan jumys qorytyndysy men bıylǵa arnalǵan mindetter málim boldy.

Máselen, Túrkistan oblysynyń densaýlyq saqtaý salasyna 13,7 mlrd teńge bólingen bolsa, 2020 jylǵa arnalǵan memlekettik baǵdarlamalar tórt nysanaly ındıkatorǵa baǵyttalǵan.

Olar azamattardyń ortasha ómir súrý uzaqtyǵyn 73,21 jasqa deıin arttyrý men júrek-qan tamyry, onkologııalyq, sozylmaly respıratorlyq aýrýlardan jáne qant dıabetinen mezgilsiz qaıtys bolǵandar sanyn 18,86%-ǵa deıin tómendetýge jumsalǵan.

Sondaı-aq, ana ólimin 17,1%-ǵa deıin azaıtý, 1 myń tiri týǵanǵa shaqqandaǵy náreste ólimin 10,1%-ǵa deıin tómendetý kózdelgen.




Osylaısha oblys ákimi Ómirzaq Shókeevtiń qoldaýymen óńirdegi medıtsına salasyn damytýǵa barynsha kúsh salynǵan.

Túrkistan oblystyq qoǵamdyq densaýlyq basqarmasy basshysy Marat Pashımovtyń aıtýynsha, eń birinshi kezekte ana men bala saýlyǵy, jansaqtaý jáne ota jasaý men jedel járdem qyzmetin kúsheıtýge basymdyq berilgen.

Medıtsınalyq uıymdardyń materıaldyq-tehnıkalyq bazasyn jabdyqtaý maqsatynda 2,5 mlrd teńgege 205 dana medıtsınalyq tehnıka satyp alynǵan.

Memlekettik-jekemenshik áriptestik tetigi arqyly 9 feldsherlik ambýlatorııanyń qurylysy júrgizilip, onyń 5-ýi paıdalanýǵa berilgen.

Sonymen qatar bıyl tórt emdeý nysany ashylmaq. Óńirde 73% medıtsınalyq uıymdar medıtsınalyq aqparattyq júıesine qosylǵan.

Qazirgi tańda oblys boıynsha 2 medıtsınalyq aqparat júıesi (DAMÝMED, KÓMEK) jumys jasaýda.

Oblys boıynsha dáriger men orta býyndy medıtsınalyq qyzmetkerlerdiń jumys ornyn kompıýterlik tehnıkamen jabdyqtaý úlesi - 100%.

Aıta keteıik, oblys boıynsha tolyqtaı elektrondyq densaýlyq pasporttary jasaqtalǵan. 400 myńǵa jýyq adam mobıldi qosymshasyn paıdalanady.

Jyl sońynda 10,5 myńnan astam túrkistandyq dárigerdiń qabyldaýyna jazylǵan.

















Joǵary qaraı