Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Túrkistan oblysynda otbasylyq zorlyq-zombylyqtyń aldyn alý máseleleri talqylandy

2021 jyldyń 30 qarasha 2021 15:04

TÚRKІSTAN. QazAqparat - Túrkistan oblysynda júzege asqan turmystyq zorlyq-zombylyq qurbandaryn áleýmettik-psıhologııalyq qoldaý kórsetý qyzmeti oń nátıje berdi. Arnaıy ótkizilgen táýelsiz zertteý qorytyndysy osyndaı sheshim shyǵarǵan, dep habarlaıdy QazAqparat tilshisi.

Túrkistan oblysynyń tájirıbesi negizinde qolǵa alynǵan joba barlyq óńirde qoldaý tapty. Bes jyldan beri júzege asyp kele jatqan ortalyq jumysynyń nátıjesi Túrkistan oblysy ákimdiginde ótken basqosýda jarııalandy. Atalǵan qyzmet Túrkistan oblysynyń barlyq aýdandarynda jumys isteıdi. Jıynǵa Túrkistan oblysy ákiminiń orynbasarlary S.Qalqamanov pen U.Tájibaev, oblystyq basqarma basshylary men ıÝNFPA ókilderi qatysty. Basqosýda ıÝNFPA ókilderi turmystyq zorlyq-zombylyqtyń aldyn alý baǵytynda Túrkistan oblysy ákimdiginiń tapsyrysymen ázirlengen strategııaǵa joǵary baǵalaryn berdi.




Bul kommýnıkatsııalyq strategııa BUU Halyqtyń qonystanýy salasyndaǵy qorynyń «Ortalyq Azııada genderlik zorlyq-zombylyqtyń aldyn alý jáne oǵan qarsy áreket etýdi jaqsartý úshin ulttyq áleýetti kúsheıtý» jobasy aıasynda Ulybrıtanııa úkimetiniń qoldaýymen ázirlengen.




Talqylanǵan taqyryptyń mańyzdylyǵyn atap ótken oblys ákiminiń orynbasary S.Qalqamanov kommýnıkatsııalyq strategııa negizinde shuǵyl jospar qurýdy tapsyrdy. Sonymen birge ol óńirde otbasylyq zorlyq-zombylyqtyń aldyn alý baǵytyndaǵy jumystar jalǵasa beretinin málimdedi. Turmystyq zorlyq-zombylyq qurbandaryn áleýmettik-psıhologııalyq qoldaý kórsetý qyzmeti aýyldardaǵy áıelderge kómek kórsetedi. Sebebi daǵdarys ortalyqtary kóbinde qalalyq jerlerde ornalasqan. Joba Qazaqstannyń 5 oblysynda júzege asýy múmkin. Otbasynda zábir kórgen áıel kómek surap, quzyrly organdardyń tabaldyryǵyn tozdyrmaıdy. Jeke basyndaǵy taýqimetti arnaıy qyzmet mamandary bilse jetkilikti. Olar ózderi polıtsııaǵa, áleýmettik qyzmetterge, prokýratýraǵa jáne taǵy basqa uıymdarǵa habar beredi.




Jıynda Qazaqstandaǵy ıÝNFPA-nyń ókili Ǵazıza Moldaqulova «Túrkistan oblysymen áriptestik joǵary deńgeıde. Bul óńirde genderlik zorlyq-zombylyq boıynsha jaqsy jumystar atqarylýda. Aldaǵy ýaqytta da bul baǵyttaǵy jumystar kúsheıdi» deı kele demografııasy joǵary óńirde ana quqyǵyn qorǵaý, turmystyq zorlyq-zombylyqtyń aldyn alý asa mańyzdy ekenin atap ótti.





Avtor Aınur Aqbaeva
Basty sózder: Adam quqyǵy, Túrkistan oblysy,
Joǵary qaraı