Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Tuńǵysh Prezıdentten úsh ret bata alǵanmyn – Berik Ýap

2021 jyldyń 1 jeltoqsan 2021 19:12

ATYRAÝ. QazAqparat – Tuńǵysh Prezıdentten bata alǵan atyraýlyq jas munaıshy – Berik Ýap. Onyń esimi kópshilikke 2000 jylǵy shildeden beri jaqsy tanys. Sol kezde ol 7 jasta bolatyn, dep habarlaıdy QazAqparat.

Bul – Kaspıı teńiziniń tórindegi alǵashqy ári eń iri kenish – «Qashaǵannan» «qara altyn» tabylyp, elimizdiń ekonomıkalyq áleýeti álemge taǵy bir ret keńinen tanylǵan kez. Elbasy Nursultan Nazarbaev shilińgir shildeniń basynda Atyraý oblysyna jumys saparymen kelip, Kaspıı teńizindegi «Qashaǵannan» tuńǵysh munaıyn kórý úshin ken ornyndaǵy «Suńqar» burǵylaý qondyrǵysyna bardy. Sol bir tarıhı sátke táýelsiz qazaq eliniń munaı-gaz ónerkásibin damytýshylardyń bastaýyndaǵy tanymal tulǵa, «Qazaqoıl» ulttyq kompanııasynyń prezıdenti Nurlan Balǵymbaev pen oblystyń sol kezdegi ákimi Imanǵalı Tasmaǵambetovpen birge erkin eldiń erteńine senimi zor jeti jasar Berik Ýap ta kýá bolǵan.

«Men úshin bári aıaq astynan bastaldy. Oıyn balasymyn ǵoı, búgin sonyń bárin oı eleginen ótkizsem, kórgen túsim sekildi. 1994 jyldan beri Soltústik Kaspıı jobasyna atsalysqan ákem Sársenbaı Jaǵıpashov «Qashaǵanǵa» jumysyna ketip bara jatatyn. Biz onyń jumystan kelýin asyǵa kútip júremiz. Ákemniń mamandyǵy – geodezıst-kartograf. Bir kúni meni ózimen birge Atyraýdaǵy áýejaıǵa alyp bardy. Sol jerde Nurlan Balǵymbaev, Qasym-Jomart Toqaev jáne Imanǵalı Tasmaǵambetov aǵalarymmen áńgimelestim. Olar meniń betimnen súıip, ózderiniń uldaryndaı erkelete sóılesti», - dep eske aldy tarıhı oqıǵaǵa aınalǵan sol sátti Berik Ýap.




Berik Ýaptyń aıtýynsha, 4 shildede kompanııanyń mamandarmen birge Berik Ýap «Qashaǵanǵa» tikushaqpen ushyp barǵan. Kóp uzamaı ken ornyna Elbasy Nursultan Nazarbaev kelgen. Kompanııa mamandary «Qashaǵan» kenishi týraly tehnıkalyq málimetterdi tanystyra bastaǵan. Elbasy sheteldik, otandyq munaıshylar arasynda turǵan kishkentaı Berikti kórip, birden qasyna shaqyrypty. Aty-jónin, bolashaqta qandaı mamandyq ıesi bolatynyn surapty.

«Tuńǵysh Prezıdent arnaıy ydysqa quıylǵan munaıdy «Qazaqstannyń bolashaǵy úshin!» dep birinshi meniń betime jaqty. Sol jerde maǵan «Táýelsiz elińniń bolashaǵyna adal qyzmet etetin abyroıly azamat bol!» dep batasyn berdi. Sonan soń «Suńqarmen» tanysý kezinde meni qolymnan ustap, ózimen birge jetelep júrdi. Bala bolsam da Nursultan Ábishulynyń alaqanynyń ystyq taby boıyma erekshe bir kúsh bergenin sezdim. Quddy meni óz ákem qolymnan jetelep júrgendeı boldy», - dep tolǵandy jas munaıshy.

Osynaý tarıhı sátten soń Berik Ýaptyń taǵdyry «Qashaǵanmen» bite qaınasty deýge bolady. Buǵan Elbasynyń «Qashaǵanda» bergen batasy da, geodezıst-kartograf mamandyǵyn meńgergen ákesi Sársenbaı men jas urpaqty bilim nárimen sýsyndatqan anasy Nurııanyń tárbıesi de áser etken. Sonyń áseri bolar, ol mektep kezinen bolashaǵyn «Qashaǵanmen» baılanystyrýdy uıǵardy. Sóıtip, 2010 jyly Atyraýdaǵy qazaq-túrik lıtseıin «Úzdik attestatpen» bitirip, birden shetelde bilim alý úshin Ulybrıtanııaǵa attanǵan. Sol eldegi Manchester ýnıversıtetinde tórt jyl «Munaı-gaz isi» boıynsha tolyqqandy bilim aldy. Keıin bir jyl Shotlandııanyń astanasy – Edınbýrgtegi ýnıversıtettiń magıstratýrasynda oqydy.

«Shetelde bilim alǵanda taǵdyryma oń áser etken «Qashaǵan» kenishin udaıy esinen shyǵarmadym. Nursultan Ábishulynyń batasy da jadymda júrdi. Joǵary bilim alyp, elge oralamyn dep ózime sert te berip qoıdym. Óıtkeni, «Qashaǵan» kenishi táýelsiz Qazaqstannyń jarqyn bolashaǵy úshin ashyldy. Osy maqsat úshin Elbasy bastap, munaı-gaz ónerkásibiniń tanymal tulǵalary eńbek sińirdi. Báriniń kózdegeni bir ǵana izgi maqsat – Qazaqstannyń ekonomıkasyn órkendetý. Bul maqsatty iske asyrýǵa men de úlesimdi qosýym qajet dep oıladym», - deıdi Berik Ýap.

Berik Ýap 2015 jyly Atyraýǵa oralǵan. Sodan beri «Qashaǵan» jobasynyń operatory – NCOC kompanııasynda ınjener bolyp jumys isteıdi.

«Nursultan Ábishuly «Qashaǵan» jobasyna baılanysty kezdesýlerden meni qaldyrǵan emes. 2013 jyly Ulybrıtanııanyń Premer-Mınıstri Devıd Kemoronmen birge «Qashaǵan» jobasynyń tanystyrylymyna kelgende meni janyna shaqyryp aldy. Qal-jaǵdaıymdy, oqýymnyń barysyn surady. «Bilimińdi jetildire ber, osy jobada jumys isteıtin myqty maman bolýyń qajet» dep taǵy da batasyn berdi. Al, 2016 jylǵy jeltoqsanda Atyraýǵa kelgen saparynda «2000 jyly «Qashaǵannyń» alǵashqy munaıyn «Bul eleýli oqıǵa bolady» dep, jeti jastaǵy jas balanyń betine jaǵyp edim. Qazir sol bala shetelde bilip alyp, munaı salasynda jumys isteıdi. Sol kezde de saǵan bata berip edim, qazir de batamdy beremin» dedi. Men osylaısha, Tuńǵysh Prezıdentten úsh ret bata aldym. Táýelsizdiktiń eleń-alańynda elimizdi aıaqtan turǵyzý úshin aıanbaı eńbek etken Nursultan Ábishulynyń úsh batasyn maǵan júktelgen úlken senim dep uǵyndym», - deıdi óziniń bolashaǵyna aqjoltaı bolǵan jobaǵa jumysqa ornalasqan jas munaıshy.




Táýelsiz Qazaqstannyń Tuńǵysh Prezıdentinen úsh ret bata alǵan erkin eldiń perzenti kóp emes. Biri de biregeıi bolǵan Berik Ýaptyń kún saıyn erteletip jumysyna barar aldynda jańylmaıtyn bir daǵdysy bar. Bul – 2000 jyly Elbasynyń atynan syıǵa berilgen kompıýterdiń aldyna bes mınýt otyrý.

«Prezıdent syılyǵy – men úshin tarıhı jádiger. Elbasynyń syılyǵy retinde ony kózdiń qarashyǵyndaı saqtap júrmin. Óıtkeni, ony mektepte oqyp júrgende kóp paıdalandym. Shotlandııada munaıshy mamandyǵyna oqyǵan inim Aýhat ta osy kompıýterdi qoldanyp edi», - degen Beriktiń eldiń keleshegine senimi mol.

Halqymyzda «Bataly ul arymas» degen naqyl bar. Óıtkeni, dýaly aýyzdy adamnyń batasy qabyl bolady. Sonyń dálelindeı, budan 21 jyl buryn Prezıdenttiń batasyn «Qashaǵannyń» tórinde alǵan qarshadaı bala endi básekege qabiletti jas maman retinde halyqaralyq jobanyń el ıgiligine jaratylýyna úlesin qosyp júr.

Eske sala ketelik, buǵan deıin Atyraý mýzeıinde qos mereke qarsańynda ekspozıtsııalyq zaldar ashylǵan bolatyn.


Joǵary qaraı