Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Tótenshe jaǵdaı kezinde múgedek jandarǵa qandaı qoldaý kórsetildi

2022 jyldyń 20 qańtar 2022 16:51

NUR-SULTAN. QazAqparat – Elimizde tótenshe jaǵdaı kezinde múgedek jandarǵa qandaı kómek kórsetildi? Jáne olar memlekettik qyzmet pen járdemaqyny ýaqytyly aldy ma? Mán-jaıǵa qatysty QR Eńbek jáne halyqty áleýmettik qorǵaý mınıstrligi túsinik berdi, dep habarlaıdy QazAqparat tilshisi.

«Tótenshe jaǵdaı rejıminiń engizilýine baılanysty bizdiń mınıstrlik 2021 jylǵy 5 jeltoqsannan bastap 2022 jylǵy 19 qańtarǵa deıingi kezeńde múgedektikti qaıta kýálandyrý merzimi bastalǵan azamattar úshin múgedektigi boıynsha memlekettik járdemaqylardy tóleý avtomatty túrde uzartyldy. Atalǵan shara 11 411 múgedektigi bar adamdy qamtıdy. Sondaı-aq, tólemderdi uzartý múgedek balalarǵa jáne I toptaǵy múgedekterge kútim jasaıtyn 3 089 adamdy qamtyp otyr», - dedi mınıstrlikke qarasty Eńbek komıteti basqarmasynyń basshysy Ánel Sheneeva.

Onyń aıtýynsha, elimizde kámelet jasyna tolmaǵan múgedek balalardyń kútimi boıynsha 373 adam járdemaqy alady.

І top múgedegi Nurlan Syzdyqov eldegi tótenshe jaǵdaıǵa qaramastan memlekettik járdemaqy ýaqytyly berilgenin aıtyp otyr.

«Járdemaqy óz ýaqytynda, keshikpeı berilip jatyr. Onyń ústine áleýmettik qyzmet portaly iske qosyldy. Múmkindigi shekteýli jandar úshin portal óte yńǵaıly ári tez. Qyzmetti úıden shyqpaı-aq alýǵa bolady. Kerek qural-jabdyqty ınternet arqyly tapsyrys berýge bolady. Portalda barlyq qyzmet túri kórsetilgen», - deıdi ol.




Sondaı-aq, ol áleýmettik portalda ınvataksı qyzmeti bolsa degen usynysyn jetkizdi. Sebebi júrip-turýynda qıyndyǵy bar jandar úshin kádimgi taksı yńǵaısyz, al qoǵamdyq kólikke minip-túsý qıyn.

Odan bólek, múgedek jandarǵa kórsetiletin memlekettik qoldaýǵa qatysty Ǵalııa Smaılova da óz oıyn ortaǵa saldy.

«Járdemaqy alýǵa qujatty áleýmettik qyzmetter portaly arqyly rásimdedim. Járdemaqy ýaqytyly tústi. Portal arqyly emdeý, saýyqtyrý ortalyqtaryna joldama alýǵa bolady. Meniń jaǵdaıymda shıpajaıdan buryn, ol jaqtyń aýa raıynyń qandaı ekeni mańyzdy. Óıtkeni, densaýlyǵym aýa raıynyń ózgerýimen baılanysty. 14 jyl boıy arnaıy dári-dármek iship kelemin. Biraq men ishetin dáriler áleýmettik qoldaý aıasynda berilmeıdi. Ózim satyp alamyn», - dedi ІІ top múgedegi.

Mınıstrliktiń málimetine súıensek, eldegi tótenshe jaǵdaı kezinde áleýmettik qyzmetter portaly kedergisiz jumys istep turdy.

Atalǵan portalda arnaýly qyzmetter kórsetetin 792 áleýmettik-medıtsınalyq mekeme tirkelgen. Sonymen qatar ońaltýǵa arnalǵan tehnıkalyq quraldardy jetkizetin – 164 kompanııa, 15 myńnan astam jeke kómekshi, ymdaý tili qyzmetin kórsetetin 262 maman, 67 sanatorlyq-kýrorttyq emdeýdi jáne 135 kepildik berilgen áleýmettik toptamany jetkizýshi bar.

Aıta ketsek, 1414 biryńǵaı nómirine qońyraý shalyp, tildi tańdaý jáne 5 sanyn basý arqyly portaldy paıdalaný boıynsha keńes alýǵa bolady.


Joǵary qaraı