Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Top qasqyrmen betpe-bet kelgen áje: Qanıpa Jylysova qalaı aman qalǵanyn aıtyp berdi

2021 jyldyń 18 qyrkúıek 2021 12:25

ÓSKEMEN. QazAqparat – Shyǵys Qazaqstan oblysy Kúrshim aýdany Aqsýat aýylynda jeti qasqyrmen bet-bet kelip, ajal aranynan qutylyp shyqqan Qanıpa Jylysova jaıly talaı ańyz aıtylyp júr. Bireýler buǵan senbeı «múmkin emes» dep basyn shaıqasa, basqalalary áserli bolsyn dep ústi-ústine ásirelip aıtady. Sonyń aq-qarasyn bilý úshin seksenniń seńgirinen asqan ájemen áńgimelesip qaıtqan edik.

- Qanıpa áje, kóz aldyńyzda qaıta-qaıta kólbeńdeıtin sol bir oqıǵa jaıly aıtyp berseńiz...

- Bul osydan ondaǵan jyldar buryn bolǵan. Úıdegiler mal sýǵaryp bitkenshe taǵylar kelip tımesin dep jan-jaqqa kóz tastap turdym. Tús aýǵan shaq.

Otbasy múshelerimen otardy monshanyń ber jaǵyndaǵy qorshaýǵa qamap, aýqattanyp alý úshin úıge kirdik. Arada bir shaı qaınatym ýaqyt ótkende syrttan dabyrlaǵan daýystar shyǵyp ketti.

Óre túregelip, atyp shyqsaq, qasqyrdan úrikken qoılar qabyrǵaǵa úıelep qalypty. Sol arada túz taǵylary qoı men eshkini jaryp, aǵyp jatqan aryqqa súırep úlgergen.

Artynan birneshe dúrkin myltyq attym. Álgi qasqyrlar myltyq daýysyn estise de alysqa uzamady.




- Sonda aýyl irgesine qasqyr jıi keletin bolyp tur ǵoı?

- Ondaı oqıǵa birinshi ret bolyp turǵan joq. Turǵyndardyń bireýi ótpeı qalǵan mal terilerin aýyl shetine aparyp tastaı bergen. Qasqyrlar qaıta aınalyp kelip, álgi terilerdi kemirip jep jatty.

Kelesi kúni tańsáride joldasym Qaıroldaǵa Alǵabas aýylyna baryp, azyq-túlik ákelýin suradym. Otaǵasy «Sharýalarym kóp, óziń bar» dedi de qoıdy. Sóıtip, qula bıeni shanaǵa jektirdim de jolǵa shyqtym.

Adam minezdes janýar birdeńeni sezse kerek, júrgisi kelmeı, qamys qulaqtaryn tikireıtip, turyp qaldy.

«Aýyryp tur ma ózi?» dep oıladym. Qula bıemen qalyń qardy ombylap otyryp zırat tusyna jettim. Qolyma ne qamshy, ne shybyq ta almappyn. Qula bıe kenet júrisin baıaýlatty.

Sálden soń jele jónelgenimen, zırat tusynan túsip, oıǵa jete bergende júrisin taǵy aqyryndatty. Endi qaıtpek kerek? Ústimdegi tondy sheship astyma basyp, attyń saýyrynnan soqtym. Bir qaýiptiń baryn sezgen janýar sharasyz kúıge túskendeı, tym zorǵa júrip keledi.

Bar oıym aýylǵa aman-esen jetip, azyq-túlikti túgendeý. Sálden soń qarsy aldymda 100 metrdeı jerde qasqyrdy kórdim. Týra bir arystan sııaqty. Túz taǵysy áý basta zıratqa taıaǵan tusta aryq jıeginde turǵanda-aq kózime shalynyp qalǵan. Sol kezde beısaýat júrgen jylqy dep oıladym. Ákki haıýan meni alystan sezip, zıratty aınalyp kelip aldymnan shyqty.

- Sol kezde eń birinshi ne oıladyńyz?

- Jaqyn mańdaǵy fermaǵa jetip, aman qalýdy oıladym. Qula bıe qamshy saldyrmaı quıǵytty. Jaqyn tustaǵy qystaýdy betke aldym. Kenet bıe qalyń qarǵa kúmp etip kirdi de ketti. Abyroı bolǵanda, móńkı-móńkı ombylap shyqqan qula bıe fermaǵa qaraı tartyp otyrdy.

Qystaýǵa taıaı bere eski qyzyl úıdiń janyndaǵy aryqqa kelip toqtaǵanymda qarsy aldymda qasqaıyp turǵan sol qasqyrdy qaıta kórdim. Bul joly bir emes, jeti qasqyr! Zárem ushyp, Alǵabasqa aparatyn qasqa jolǵa shyqtym. Shapqannan shaýyp otyryp Serpek degen tanysymnyń úıine jettim. Serpek qolyna qarýyn alyp, ara-tura ańǵa shyǵyp júretin-di. Dál sol kúni Aqsýatqa kete qalypty. Al aýyl shetinde azý tisin aqsıtyp álgi jeti qasqyr qarap turdy.

Úlken qyzym Raýshan Alǵabas aýylynda turatyn. Jaǵdaıdy bir baǵamdap, qyzymnyń úıine keldim. Qula bıeni sýytaıyn dep er-toqymdy alyp qarasam jyrtqyshtan qashyp jantalasqan janýardan ter parlap aǵyp tur.

Úıdegilerge aıtyp bıeniń arqasyna ton japtyrdym da úıge kirdim. Al baǵanaǵy jeti qasqyr sol kúni-aq aýyldaǵy kók baıtaldy jaryp ketti. Osy jaıttan keıin el ishinde nebir áńgimeler jeldeı esip, men jaıly kúrshimdikter jıi aıtyp júrdi.

«Qanıpa bir qoı, bir eshki soıyp ákele jatyr eken. Sony top qasqyrǵa jiliktep laqtyryp otyryp aman qalypty» degen áńgimeler de boldy.

- Budan basqa da este qalarlyqtaı oqıǵalar boldy ma?

- Shopan bolyp júrgenimde bastan ótken qyzyqty jaıttar kóp bolǵan. Alystan myltyqpen kózdep turyp sarshunaqty sulatyp túsirgen, aıly túnde úı aýlasynda tóbe kórsetken aıýdy jipten bosap ketken sıyr eken dep shatastyryp, sońynan túsken sátterim áli esimde.

Alaıda bir emes, jeti qasqyrdyń aranynan aman qutylǵan sol bir oqıǵa kúni keshe bolǵandaı kóz aldymda.


Joǵary qaraı