Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Tokıo Olımpıadasyna Qytaı elinde turatyn qandastarymyzdan qansha sportshy qatysady  - Sheteldegi qazaq tildi BAQ-qa sholý

2021 jyldyń 25 shilde 2021 13:00

NUR-SULTAN. QazAqparat- «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Shyńjańdyq 6 sportshy Tokıo Olımpıadasyna qatysady - «Jenmını jıbao» (People Daily)




Tokıo Olımpıadasyna qatysatyn qytaılyq sportshylar men bapkerlerdiń jáne resmı delegatsııa ókilderiniń tizimi jarııalandy. Onyń ishinde Shyńjańdyq 6 sportshy bar, dep jazady Qytaılyq kazakh.people.com saıty.

Atalǵan BAQ-tyń dereginshe, osy tizimde Tokıo Olımpıadasyna Qytaı eliniń atynan shyǵatyn qandastarymyzdyń da aty atalǵan. Olar 60 keli salmaqta grek-rım kúresinen óner kórsetip, Tokıo Olımpıadasyna joldama alǵan shyńjańdyq qandasymyz Ýálıhan Serikuly men 75 keli salmaqta sharshy alańǵa shyǵyp júrgen boksshy Toqtarbek Tańatqanuly.

Eske sala keteıik, Tokıo Olımpıadasyna barǵan Qytaılyq jalpy ókilder sany 777 adam. Munyń ishinde sportshylar 431 adam (áıel sportshylar 298 adam, er sportshylar 133 adam), bapkerler, dárigerler jáne basqada kómekshiler 307 adam, resmı delegatsııa ókilderi 39 adam bolǵan.

Іle qazaq avtonomııaly oblysynda «Tulpar» merekesi atalyp ótti - CNR




Qytaı memleketi «Tulpar mekeni» dep tanyǵan Іle qazaq avtonomııaly oblysynyń Mońǵolkúre aýdanynda «Tulpar» halyqaralyq týrızm merekesi bastaldy, dep jazady Qytaılyq kazakcnr.com saıty.

«Qytaıda «Tulpar» merekesi 1992 jyldan beri toılanyp keledi. Osy atalǵan sharanyń sońǵy jyldary dástúrge aınalǵan eń bir qyzyqty sáti «10 myń tulpardyń shabysy» atalatyn jandy kórsetilim, onda sahna aldynan myńdaǵan saıgúlik jer tósin dúbirletip shaýyp ótedi. Bıylǵy jyl sol 10 myń jylqyny shashaý shyǵarmaı jurt aldynan josyltyp aıdap ótýge 78 jylqyshy daıarlanǵan. «Tulpar» merekesinde basqada álemge tanylǵan jylqy tuqymdary kópshilikke kórsetildi. Sonymen birge qazaq halqynyń ulttyq oıyndary qyz qýý, kókpar, teńge ilý, báıge sekildi jarystar ótti. Osy qoıylymdardy kórsetýge arnaıy jobalanǵan erekshe sahnanyń jalpy aýmaǵy 2000 sharshy metr bolsa, sahna tórine qolmen beınelenip salynǵan 3D úlgisindegi alyp tulpar beınesi kórermenderdi erekshe áserge bóledi», -dep jazady CNR saıty.







Aıta ketsek, tarıhtan beri tekti tulparymen ataǵy shyqqan Mońǵolkúreniń jylqy mádenıetiniń tarıhy uzaq, tamyry tereńde. Іle jylqysyn ósirý ortalyǵy sanalatyn bul aýdanda 100 myń jylqy bar. Sondyqtan Mońǵolkúre búkil Qytaı eli boıynsha jylqy sany eń kóp, jylqy sapasy eń jaqsy aýdan bolyp esepteledi. Qytaı aýyl sharýashylyǵy mınıstrligi 2003 jyly Mońǵolkúre aýdanyna «Qytaıdyń tulpar mekeni» degen ataq bergen. Aýdan 2009 jyldan bastap dástúrli «Іle tulpary halyqaralyq týrızm merekesin» jyl saıyn uıymdastyryp keledi. Іle jylqysy Qytaı memleketi boıynsha at sporty jarystaryna qatysatyn jylqylardyń 70 paıyzyn ıelep otyr.







Túrik fılmi AQSh-ta júlde aldy - TRT




Rejısser Dervısh Zaımniń Sırııadan Túrkııaǵa sozylǵan bir sapardyń hıkaıasyn baıandaıtyn «Flaşbellek» atty fılmi AQSh-ta júlde aldy, dep habarlaıdy Túrkııa Radıo Televızııa portaly.

«Fılm Arızon shtatynda ótken 27-shi Sedona Halyqaralyq fılm festıvalinde «Úzdik Halyqaralyq fılm» júldesin aldy. Atalǵan fılm 2020 jyly 42-shi Cinemed fılm festıvalinde «Jas qazylar alqasy júldesin» alyp, 12-19 shilde kúnderinde Frantsııada kórsetilgen bolatyn. Fılmde arab kınematografııasynyń ataqty akterleri Salah Bakrı men Alı Súleıman oınaıdy. Atalmysh fılm 2019 jyly Túrkııanyń Gazıantep jáne Konııa qalalarynda túsirildi», -dep jazady TRT.

2032 jylǵy jazǵy Olımpıada oıyndary qaıda ótetini belgili boldy – KAZNEWS




Halyqaralyq Olımpıada komıteti (HOK) 2032 jylǵy jazǵy Olımpıada oıyndary men Paralımpıada oıyndary Brısben qalasynda ótedi, dep jazady Mońǵolııanyń Kaznews aqparattyq portaly.

«Osylaısha Aýstralııa jerinde jazǵy Olımpıada oıyndary úshinshi ret ótkeli tur. Buǵan deıin tórtjyldyqtyń basty dodasyn 1956 jyly Melbýrn jáne 2000 jyly Sıdneı qalalary qabyldaǵan edi. Eske salaıyq, 2024 jylǵy Olımpıada oıyndary Parıjde (Frantsııa), al 2028 jyly Los-Andjeleste (AQSh) ótedi», - dep jazdy Kaznews.

Atalǵan BAQ-tyń dereginshe, HHHІІ jazǵy Olımpıada oıyndaryna qatysýǵa Mońǵolııa sportshylary 13 sport túrinen barlyǵy 43 joldama jeńip alǵan.

Buharadaǵy 7 tarıhı nysan ICESCO-nyń Islam álemi muralar tizimine engizildi - «ÓzA» aqparattyq agenttigi




Buharadaǵy 7 mádenı mura nysandary Islam áleminiń Bilim, ǵylym jáne mádenıet uıymynyń (ICESCO) Islam álemi muralar tizimine engizildi, dep jazady Ózbekstannyń «ÓzA» memlekettik aqparat agenttigi.

«Oblystyq mádenı mura basqarmasynyń habarlaýynsha, 29 maýsymda Islam álemi muralary komıtetiniń toǵyzynshy onlaın-otyrysy ótip, onda Býharanyń 2020 jyly «Islam áleminiń mádenıetiniń astanasy» dep jarııalanýyna baılanysty Ózbekstan atynan usynylǵan kandıdattyq qujattar qaraldy.

Osy kezdesýde Buharadaǵy 7 kesene - Ismaıl Somonı kesenesi, Chor Bakr, Bahaýddın Nakshband kesheni, Maǵokı Attor meshiti, Poıı Kalon ansambli, ejelgi Poıkent qalasy men Toshsaroı medreseleriniń qaldyqtary ICESCO-nyń Islam álemi muralary tizimine engizilgen.

Onlaın formatta ótken jıyn aıasynda, keleshekte osy mádenı mura obektilerin qalpyna keltirý, zertteý jáne halyqaralyq masshtabta nasıhattaý boıynsha ICESCO jáne Islam áleminiń muralary komıtetimen yntymaqtastyqty nyǵaıtýǵa qol jetkizgen», -dep jazady «ÓzA» aqparattyq agenttigi.



Avtor Baqytjol Kákesh
Basty sózder: BAQ, Qoǵam,
Joǵary qaraı