Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Tokıo-2020: XXXII jazǵy Olımpıadanyń ashylý saltanaty bastaldy

2021 jyldyń 23 shilde 2021 17:01

NUR-CULTAN. QazAqparat - Dál qazir Japonııa astanasy Tokıo qalasynda XXXII jazǵy Olımpıadanyń ashylý saltanaty bastaldy, dep habarlaıdy QazAqparat tilshisi.

Bıyl dúbirli dodada 33 sport túrinen 339 medal jıyntyǵy sarapqa salynady. Olımpıada baǵdarlamasyna beısbol/softbol, karate, serfıng, sporttyq quzǵa órmeleý jáne skeıtbordıng sekildi sporttyń bes túri engizilgen.

Aldyn ala málimet boıynsha aıtýly alaman básekege jumyr jer betindegi 206 memleketten 11 myńnan astam sportshy qatysady dep kútilýde. Jarysqa qatysýshylardyń teń jartysyna jýyǵy áıelder bolmaq. Uıymdastyrýshylar onyń genderlik teńdikti bildiretinin aıtady.

Atalǵan sharany uıymdastyrýǵa jaýapty mamandardyń aıtýynsha, Tokıo tórindegi aıtýly shara eldiń esinde ınnovatsıalyq Olımpıada retinde erekshelenetin bolady.

Qazaqstandyq 97 sportshy kúnshyǵys elinde sporttyń 28 túrinen baq synaıdy. Qazaqstan Ulttyq olımpıadalyq komıteti aıtýly alamanǵa baratyn tizimdi naqtylaý maqsatynda irikteý jáne reıtıngtik jarystary aıaqtalǵannan keıin qorytyndy shyǵardy.

Tokıo tórinde Qazaqstan jalaýyn qyzylordalyq boksshy Qamshybek Qońqabaev pen jeńil atlet Olga Rypakova ustap shyǵady.

Bıyl Olımpıada óziniń tarıhynda 32-márte jalaýyn jelbiretedi. Tuńǵysh ret 1896 jyly Grekııa jerinde bastalǵan aıtýly sport dodasy sodan beri barsha adamzat balasynyń qyzyǵa tamashalaıtyn básekesine aınaldy.

Álem jurtshylyǵy AQSh-ty atalǵan saıysty eń kóp uıymdastyrylǵan el retinde tanıdy. Onda 4 ret jazǵy jáne 4 ret qysqy Olımpıada ótkizilgen. Al Frantsııa 2 jazǵy, 3 qysqy alamannyń alaýyn jaqty. Odan keıingi kezekte Ulybrıtanııa 3 ret (3/0), Germanııa 3 ret (2/1), Japonııa, Italııa, Kanada 3 ret (1/2) osyndaı senimge ıe bolǵan.

Aıta ketken jón, jarystyń ashylý saltanatyna Halyqaralyq Olımpıada komıtetiniń (HOK) Prezıdenti Tomas Bah pen Japonııa ımperatory qatysýda.

Eske sala ketsek, budan buryn budan burynǵy Jazǵy Olımpıadalarda Qazaqstan týyn qandaı sportshylar alyp shyqqanyn habarlaǵan edik.

Ashylý saltanaty onlaın kórsetilip jatyr.


Avtor Ádiljan Úmbet
Basty sózder: Japonııa, Olımpıada, Sport,
Joǵary qaraı