Aýa raıy
Astana -9 °S
Almaty -8 °S
valıýta baǵamy
USD 421.58
EUR 496.83
RUB 5.53
CNY 62.20

Tilshiler saýaly men Tsoıdyń jaýaby: Koronavırýs jaıly sońǵy jańalyqtar legi

2020 jyldyń 27 qarasha 2020 20:48

NUR-SULTAN. QazAqparat – Keıingi kezde tilshilerdiń kóp kútken spıkeri kim deseńiz, ol – Densaýlyq saqtaý mınıstri Alekseı Tsoı edi. Ótken aıda jýrnalısterdiń aldyna bir shyǵyp, keıin kórinbeı ketken mınıstr búgin Ortalyq kommýnıkatsııalar alańyna keldi. Mınıstrge suraq qoıýǵa 30 tilshi jazylǵan eken. Eki saǵatqa sozylǵan baspasóz máslıhatynda Alekseı Tsoı men orynbasary Ajar Ǵınııat, Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova tilshilerdiń barlyq suraǵyna jaýap berip tarqasty, dep habarlaıdy QazAqparat tilshisi.

Qatań karantın engizile me?

Densaýlyq saqtaý mınıstri Alekseı Tsoı alǵashqy 10 mınýttyq baıandamasynda Qazaqstanda koronavırýs boıynsha testileýden ótkizý qýattylyǵy táýligine 90 myńǵa jetkenin málim etti. Aıtýynsha, koronavırýs ınfektsııasyn anyqtaý maqsatynda buǵan deıin 4 mıllıonǵa jýyq zertteý (test) júrgizilgen. Qazir kún saıyn zerthanalar 40 myńǵa tarta adamdy koronavırýs ınfektsııasy boıynsha testileýden ótkizip jatyr.

Jalpy, 27 qarashadaǵy jaǵdaı boıynsha, respýblıkamyz ortasha qaýipti aımaqta tur eken. Qaýipti bes óńirge qatań shekteý sharalary engizilgen. Olar: Shyǵys Qazaqstan, Soltústik Qazaqstan, Pavlodar, Qostanaı jáne Aqmola oblystary. «Sary aımaqtaǵy» Almaty qalasynda da vırýs juqtyrǵandar ósip barady. Áıtse de, qalǵan «jasyl aımaqtaǵy» óńirlerde de koronavırýs jaǵdaılary tirkelýde. Respýblıkada qazan aıymen salystyrǵanda qarashada KVI-ge shaldyqqandar 3,7 ese ósken. Jańa týǵan 124 sábı koronavırýsty anasynan juqtyrǵan. Elimizdegi barlyq jaǵdaıdyń 70 paıyzy – «qyzyl aımaqta» turǵan bes óńirge tıesili.

«Apta saıyn málimetterdi zerttep, aldaǵy kezeńderge de boljam jasap jatyrmyz. Qazir kórip otyrǵanymyzdaı, Qazaqstanda karantın sharalaryn jeltoqsan nemese qańtar aılarynda engizý máselesi jaǵdaıdy qanshalyqty baqylaýda ustaı alatynymyzǵa baılanysty bolady. Qazir koronavırýs órshigen keıbir óńirde juqtyrý deńgeıi tómendep kele jatqanyn baıqap otyrmyz. Shyǵys Qazaqstanda máselen jaǵdaı rettelip, juqtyrý deńgeıiniń tómendeý tendentsııasyn baqylaýdamyz. Eń bastysy – jaǵdaıdy baqylaýda ustaý. Qazir ınfektsııalyq aýrýhanalar 22 paıyzǵa, jansaqtaý tósekteri 17 paıyzǵa júktelgen. ıAǵnı, rezerv bar. Sondyqtan qazir ýaıymdaýdyń qajeti joq. Bári baqylaýda», - dedi Alekseı Tsoı.

Mınıstrlik pen óńirlerdiń koronavırýs boıynsha statıstıkasy nege sáıkespeıdi? Prezıdentten bastap qoǵam ókilderi tarapynan mınıstrlikke osy suraq keıingi kezde jıi qoıyla bastaǵan edi. Bul suraqtyń naqty jaýabyn baspasóz máslıhatynda mınıstr bergendeı boldy. Tipti bul olqylyqqa jol bergen jaýapty mamandar da jazalanǵan kórinedi.

«Óńirlerdiń statıstıkasy týraly aıtar bolsaq, bul jaǵdaıdan habarymyz bar. Atalmysh máseleni retteý úshin bizdiń arnaıy brıgadalar men monıtorıngilik toptar aımaqtarǵa baryp, jergilikti jerdegi jaǵdaılardy óz kózimen kórdi. Málimettiń keıde rasynda da tirkelip (qate tirkelip) jatqanyn kórip, sebepterin anyqtadyq. Mundaǵy basty sebepterdiń biri – zerthanalardyń tolyq ıntegratsııasynyń bolmaýy. ıAǵnı jeke zerthanalardyń bir bóligi biryńǵaı aqparattyq júıege engizilmegen. Keıingi kezde bul baǵyttaǵy jumysty rettep, jeke zerthanalar biryńǵaı aqparattyq júıege kiriktirile bastady», - dedi Alekseı Tsoı.

Mınıstr sonymen qatar keıbir medıtsınalyq uıymdar málimetterdi keshigip berýdiń saldarynan osyndaı olqylyqtar oryn alǵanyn aıtady.

«Osy máselelerdiń bárin taldap, jergilikti jerlerdegi jaýapty azamattarǵa ákimshilik sógis berildi. Bul másele bizdiń erekshe baqylaýymyzda tur», - dedi ol.

Nelikten reseılik vaktsınaǵa basymdyq berilip otyr?

Baspasóz máslıhatynda vaktsınaǵa qatysty saýal birneshe tilshiden tústi. Mınıstrdiń sózinshe, koronavırýsqa qarsy otandyq vaktsına jeltoqsanda klınıkalyq synaqtyń ekinshi satysynan ótedi. Jalpy Qazaqstanda koronavırýsqa qarsy vaktsınany jasaý jumystary qarqyndy júrgizilýde.

«Biz bul baǵytta resýrstarymyzdy barynsha paıdalanyp, naryqta qoljetimdi vaktsına jasaýǵa umtylýdamyz. Tirkelgenin jarııalaǵan alǵashqy vaktsına – reseılik vaktsına boldy. Memleket basshysy Qazaqstanda osyndaı zaýytty salyp, óndiristik qýattylyqty jolǵa qoıý tapsyrmasyn júktegen bolatyn. Bul óte mańyzdy sharýa. Sebebi halyqtyń vaktsınaǵa qoljetimdiligin jolǵa qoıýýymyz kerek. Zaýyt salynatyn alań aıqyndalýda. Zaýyt qazirgi farmatsevtıkalyq zaýyttardyń janyndaǵy alańdarda salynýy múmkin. Qazir bul máseleni reseılik áriptestermen talqylaý ústindemiz», - dedi Alekseı Tsoı.

Mınıstrdiń aıtýynsha, reseılik vaktsına synaqtyń úshinshi satysynda tur.

«Reseılik áriptesterimiz vaktsına synaǵynyń qorytyndysyn taıaýda jarııalaýǵa ýáde berip otyr. Bul vaktsınanyń alǵashqy jáne ekinshi satysy oń nátıjesin kórsetken. Qazirgi ýaqytta – reseılik vaktsınany áleýetti vaktsınanyń biri retinde kórip otyrmyz», - dedi ol.

Alekseı Tsoı ázirge álem elderinde jasalyp jatqan basty 10 úmitker-vaktsına baryn aıtady.

«Vaktsına synaqtyń 1-2-inshi satysynan ótken kezde deni saý eriktiler tańdalyp alynady. Olar - 18 jastan 60 jasqa deıingi azamattar. Zertteýler osy toptaǵy azamattarǵa júrgiziledi. Keıinirek testileýdiń úshinshi satysynda aıǵaqtar artyp, testileý keńirek toptarǵa jasala bastaıdy. Bizdiń elde kópfýnktsıonaldy zaýyttardy iske qosýdy josparlap otyrmyz. Koronavırýsqa ǵana qarsy emes, basqa vaktsınalardy da óndirý múmkindigine ıe bolýymyz kerek. Bizde mundaı óndiris áli joq», - dedi mınıstr.

Qaýip seıilgen joq

QR DSM Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova Qazaqstanda sońǵy aıda 747 medıtsına qyzmetkeri koronavırýs juqtyrǵanyn aıtady. ıAǵnı qaýipti aýrýdyń soqqysyn pandemııa bastalǵan alǵashqy kezeńdegideı aq halatty abzal jandar qabyldap jatyr.

Alekseı Tsoı da áriptesiniń sózin rastady.

«Dári-dármektiń eki aılyq qory bar. Aýrýhanalarda da, emhanalar da eki aılyq qor jetkilikti. 2020 jylǵy 18 qyrkúıekten bastap defıtsıt jaǵdaıynda dárihanalarǵa taratý úshin 10 mıllıon medıtsınalyq maska satylyp alyndy», - dedi Alekseı Tsoı Ortalyq kommýnıkatsııalar qyzmetindegi baspasóz máslıhatynda.

Mınıstr jergilikti atqarýshy organdar jeke qorǵanys quraldarynyń úsh aılyq qoryn satyp alyp qoıǵanyn habardar etti. Oǵan qosymsha 400 myńǵa tarta bir rettik qorǵanys kostıýminiń rezervi jınalǵan. Olardyń bári de «SK-Farmatsııa» JShS habtarynda saqtaýly tur.

Mınıstr sóz sońynda aldaǵy merekelerdi otbasymen ótkizýge shaqyryp, kópshilik bolyp jınalmaýǵa úndedi.


Joǵary qaraı