Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Terrorıster Almaty polıtsııa departamentin qalaı basyp almaq boldy

2022 jyldyń 18 qańtar 2022 19:32

ALMATY. QazAqparat - Almatylyq polıtsııa qyzmetkeri departamentke jasalǵan shabýyl týraly aıtyp berdi, dep habarlaıdy QazAqparat tilshisi.

Almaty qalalyq polıtsııa departamentiniń arnaıy jáne jumyldyrý daıyndyǵy basqarmasynyń aǵa ınspektory Aqtan Zaınolda áriptesterimen birge departament ǵımarattarynyń qorǵanysyn qalaı saqtap qalǵany týraly aıtty.


« Qańtardyń 5-i kúni keshke arnaıy jospar jarııalanǵannan keıin biz Almaty polıtsııa departamentiniń ákimshilik ǵımaratyn kúzetýge arnalǵan posttarymyzǵa tura bastadyq. Bizdiń mindetimiz – lańkesterdiń departament ǵımaratyna basyp kirýine jáne olardyń qarý-jaraqty ıelenýine jol bermeý boldy, óıtkeni azamattardyń jáne jalpy eldiń qaýipsizdigine úlken qaýip tónip turdy», – dedi Aqtan Zaınolda.

Polıtsııa qyzmetkeriniń aıtýynsha, shabýyl jasaǵandar – áýesqoılar emes. áńgime jaqsy daıyndalǵan shabýyldaýshylar jaıynda.

«Lańkester jaqsy daıyndalǵan. Ǵımarat 4-5 jaqtan shabýylǵa ushyrady. Oǵan qosa, departamenttiń janynan kólikpen júrip, bizdiń nazarymyzdy basqa jaqqa aýdardy. Sodan keıin qylmyskerler sol kólikterden oq jaýdyrdy. Meniń ornym túni boıy qarýly shabýylǵa toıtarys bergen úshinshi postta boldy. Ár polıtsııa qyzmetkerin jaýyngerlik pozıtsııalarǵa bóldik», — deıdi ol.

Spıkerdiń sózinshe, abyroı bolǵanda polıtseıler aman. Eshkim qaza tapqan joq.

Kapıtan bul ýaqytta jeke qaýipsizdigi týraly oılamaǵanyn atap ótti.

«Azamattardyń qaýipsizdigi tarazyda boldy. Biz bir-birimizdi qoldadyq. Qarýly lańkesterge abyroımen toıtarys berý jáne olardyń qarýdy ıelenýine jol bermeý mańyzdy boldy. Biz beıbit turǵyndar men qalany qorǵaýdy birinshi orynǵa qoıdyq», – dedi quqyq qorǵaý organynyń qyzmetkeri.


Joǵary qaraı