Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Tekelidegi laı kóshkininen qaza bolǵan balanyń anasy oqıǵanyń qalaı bolǵanyn aıtty

2022 jyldyń 16 mamyr 2022 21:01

TALDYQORǴAN.QazAqparat - Almaty oblysyndaǵy Tekeli qalasynda bolǵan laı kóshkininen qaza bolǵan balanyń anasy oqıǵanyń qalaı bolǵanyn aıtyp berdi, dep habarlaıdy QazAqparat tilshisi.

Qaza bolǵan bes jastaǵy Janbota Tileýhannyń anasy qaıǵyly oqıǵa oryn alǵan sátte monshada bolǵan. Sol ýaqytta tek qatty gúrildiń daýysyn estigen.

«Qatty jel soqqandaı boldy. Odan keıin tars-turs bolyp ketti. Ózimiz shoshyǵannan, esimizdi bilmeı qaldyq. Terezeden shyqtyq ta, jan-jaqqa qarasaq úı ornynda joq. Bala sol úıdiń ishinde qalǵan bolatyn. Aqyldy, súıkimdi edi. Men ánshi bolamyn, men bıshi bolamyn deıtin», - deıdi qyzynyń qazasynan eseńgirep qalǵan Gúlnár Tileýhan.

Qaıǵy jutqan anany qazir ákimdik úlken qyzymen birge qonaqúıge ornalastyrǵan. Al kishkentaı Janbotany erteń jerleıdi. Ákimdik bul otbasyna jańa baspana beretinin málimdedi. Al qalǵan tórt januıanyń búlingen úıine qatysty sheshimdi komıssııa qabyldaıdy.

«Qazir bizde tórt úı buzylyp tur. Tehnıkalyq saraptama jasap, qarap shyqtyq. Úı salyp beremiz be, satyp alamyz ba, zańǵa qarap sheshim shyǵaramyz», - dedi Tekeli qalasynyń ákimi Batyr Moldahmetov.




Esterińizge sala keteıik, Tekelide laı kóshkini keshe kúndizgi saǵat 12:00 shamasynda bastalǵan . Taýdan kóz ilespes jyldamdyqpen lap etken balshyq aldyndaǵysyn japyryp, bes úıdi basyp qalǵan. Olardyń birinde bes jasar Janbota bolǵan. Qyzdyń denesin qutqarýshylar tek jeti saǵattan soń, arnaıy daıyndalǵan ıttiń kómegimen úıindi astynan alyp shyqqan. Búldirshin bir áýlettiń kenjesi edi. Anasy Gúlnár Tileýhannyń aıtýynsha, qaıǵyly jaǵdaı bolady dep eshkim oılamaǵan. Janbota úı ishinde alańsyz qýyrshaq oınap otyrǵan. Al 12 jastaǵy ápkesi týystarynyń úıinde bolypty. Endi, mine bir-aq kúnde bes jasar qyzynan da, baspanasynan da aıyrylǵan kelinshek, qaıǵydan eseńgirep otyr.

Aıta keteıik, Almaty oblysynyń ákimi Tekelide laı kóshkininen zardap shekkenderge baspana beriletinin Tvıtter paraqshasynda jazǵanyn habarlaǵan bolatynbyz.


Joǵary qaraı