Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Tájik-qyrǵyz shekarasyndaǵy janjal: Ahýal qalaı ýshyqty

2022 jyldyń 28 qańtar 2022 11:59

NUR-SULTAN. QazAqparat – Kúni keshe Tájikstan men Qyrǵyzstan shekarasynda qaqtyǵys bolyp, eki eldiń áskerı qyzmetshileri Batken aýdanyna qarasty Tórt-Kóchó degen jerde bir-birine oq jaýdyrdy, dep habarlaıdy QazAqparat tilshisi.

Qarýly qaqtyǵys saldarynan shekarashylar, sonymen qatar tájik tarapynan beıbit turǵyndar mert bolǵany týraly aqparat bar. Qyrǵyzstannyń áskerı qyzmetshileri jaraqat alǵan.

Buǵan deıin TASS agenttigi Qyrǵyz Ulttyq qaýipsizdik memlekettik komıtetiniń aqparatyna silteme jasaı otyryp, qyrǵyz-tájik memlekettik shekarasyndaǵy aýylda jaǵdaı shıelenisip turǵanyn habarlaǵan bolatyn.

«Qyrǵyz Respýblıkasy men Tájikstan Respýblıkasy shekara qyzmetteriniń ókilderi arasynda júrgizilgen kelissózderdiń qorytyndysynda naqtylanǵan derekterge sáıkes, Tájikstan azamattary jaýyp tastaǵan Tórt-Kóchó degen jerdegi Batken-Isfan jolynyń ýchaskesi jol júrý úshin qaıta ashyldy», - dedi shekara vedomstvosynan.

Atalǵan komıtettiń naqtylaýynsha, saǵat 19:35-te aýdandaǵy ahýal tájik tarapynyń qarý qoldanyp Batken aýdanyndaǵy Chyr-Dobo mekeninde Qyrǵyz Respýblıkasy Ulttyq qaýipsizdik memlekettik komıtetiniń shekara bólimshesine oq atýyna baılanysty nasharlaı túsken.

«Qyrǵyzstan jáne Tájikstannyń shekara áskerleri bólimsheleri arasyndaǵy negizgi qarýly qaqtyǵys Tórt-Kóchó men Chyr-Dobo degen jerlerde júrip jatyr. Tájik tarapy mınomet pen granatomet qoldanýda», - dedi resmı vedomstvo.

Qyrǵyzdyń «Kabar» agettigi jarııalaǵan aqparatqa qaraǵanda, 27 qańtar kúni saǵat 23:50-de Qyrǵyzstan men Tájikstan áserı qyzmetshileri arasyndaǵy atys 10 mınýtqa toqtaǵan. Atys toqtaǵan sátte tarap ókilderiniń kezdesýin ótkizý josparlanǵan.

Biraq, taratylǵan aqparatta tájik tarapy atysty toqtatý týraly ekijaqty ýaǵdalastyqty qaıtadan buzyp, qyrǵys áskerı qyzmetshileriniń pozıtsııasyna oq jaýdyrýyn jalǵastyrǵan.

«2022 jyldyń 28 qańtary kúni saǵat 00:20-daǵy jaǵdaı boıynsha eki eldiń áskerı qyzmetshileri arasyndaǵy qarýly qaqtyǵys Kóchó-Boıý jáne Dahma mekenderinde júrip jatyr», - dep naqtylaıdy «Kabar» agenttigi Ulttyq qaýipsizdik memlekettik komıteti Shekara qyzmetiniń Aqparat jáne kommýnıkatsııa basqarmasyna silteme jasap.

Buqaralyq aqparat quraldary shekara mańyndaǵy eldi mekenderdiń turǵyndary úılerin tastap ketip jatqanyn jazýda.

Ótken túnde Qyrǵyzstan Prezıdenti Sadyr Japarov el azamattaryna úndeý jasap, janjalǵa qatysty pikirin bildirdi.

«Qurmetti qyrǵyzstandyqtar! Shekaradaǵy ahýal alǵashqy mınýttan bastap tolyqtaı meniń baqylaýymda tur. Qudaı qalasa, barlyǵyn da kelissózdermen, beıbit jolmen sheshemiz. Alańdamańyzdar. Ózge elderdiń múddesin ustanatyn jekelegen buqaralyq aqparat quraldary men saıasatkerlerdiń ahýaldy ýshyqtyrý maqsatynda taratqan jalǵan aqparattaryna senbeńizder», - dep jazdy Sadyr Japarov Facebook-tegi paraqshasynda.

Tájikstan aqparat agenttiginiń habaryna qaraǵanda, tájik tarapynan 10 adam jaraqat aldy. Onyń ishinde 6 áskerı qyzmetshi men 4 beıbit turǵyn bar.

«Ókinishke oraı, qaqtyǵys barysynda Tájikstannyń eki azamaty qaza boldy: Hodjaı Alo aýylynyń turǵyny, 1986 jyly dúnıege kelgen Obıdjon Týıchıev pen 1964 jyly dúnıege kelgen Sharıpov Abdýlatıf Rabıevıch», - delingen taratylǵan aqparatta.

Sońǵy málimetterge sáıkes, qyrǵyz-tájik shekarasyndaǵy qaqtyǵys saldarynan Qyrǵyzstannyń 11 áskerı qyzmetshisi zardap shekken. Bul jaıynda «Kabar» aqparat agenttigi eldiń Densaýlyq saqtaý mınıstrligine silteme jasap habarlady.

Qyrǵyz Respýblıkasy Densaýlyq saqtaý mınıstrliginiń aqparatyna qaraǵanda, tórteýine granata jaryqshaǵy, al ekeýine oq tıgen. Sál keıinirek Qyrǵyzstan turǵyndary men áskerı qyzmetshileri arasynda qaza bolǵandardyń joq ekeni málim etildi.

Búgin shekaradaǵy ahýaldyń turaqtanǵany belgili boldy.

Qyrǵyzstan Ulttyq qaýipsizdik memlekettik komıtetiniń Shekara qyzmeti málimdemesine qaraǵanda, Qyrǵyzstan men Tájikstan shekaradaǵy atysty tolyqtaı toqtatý týraly ýaǵdalastyqqa qol jetkizgen. Bul jaıynda «Kabar» agenttigi jazdy.

Taraptardyń kelissózderinen keıin tatýlasýǵa qol jetkizildi. Atap aıtqanda, taraptar mynadaı kelisimderge keldi:

- atysty tolyqtaı toqtatý;

- taraptardyń árqaısysy shekara mańyna shoǵyrlandyrylǵan kúshteri men quraldaryn turaqty ornalasqan jerlerine qaıtarý;

- Batken-Isfan jolynda qozǵalysty ashý;

- Qyrǵyzstan men Tájikstannyń quqyq qorǵaý organdary qyzmetkerleriniń shekaralyq aýdandarda janjalǵa jol bermeý úshin birge sholǵyndaýy.

Qazirgi ýaqytta Tájikstan men Qyrǵyzstannyń memlekettik shekarasyndaǵy ahýal turaqty.

«2022 jyldyń 28 qańtary kúni saǵat 08:00-degi jaǵdaı boıynsha Samarkandyk, Tórt-Kóchó, Kók-Tash, Dahma, Kóchó-Boıý jáne Golovnoı degen jerlerdegi qyrǵyz-tájik memlekettik shekara ýchaskesindegi ahýal turaqty dep sıpattalady», - delingen «Kabar» aqparat agenttigi taratqan habarlamada.

«Qazirgi ýaqytta shekarada ahýal salystyrmaly túrde turaqty jáne baqylaýǵa alyndy. Keshegi janjaldyń barlyq mán-jaıyn arnaýly komıssııa tergeıtin bolady. Qazir eki eldiń kúshtik qurylymdary birge sholǵyndaý júrgizip jatyr», - dep naqtylady Qyrǵyzstannyń Ulttyq qaýipsizdik komıtetiniń tóraǵasy Kamchybek Tashıev.


Joǵary qaraı