Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Táýelsizdiktiń arqasynda Qazaq Eli joǵalyp bara jatqan dúnıelerin jańǵyrtty - Narıman Tóreǵalıev

2021 jyldyń 6 jeltoqsan 2021 18:16

NUR-SULTAN. QazAqparat –Táýelsizdiktiń arqasynda Qazaq Eli barymen qaıta tabysyp, joǵalyp bara jatqan dúnıelerin jańǵyrtty – tilin tiriltti, dinin qaıtaryp, tarıhyn túgendedi. QR Parlamenti Senatynyń depýtaty, Áleýmettik-mádenı damý jáne ǵylym komıtetiniń hatshysy Narıman Tóreǵalıev Elbasy Nursultan Nazarbaevtyń «Táýelsizdik Taǵylymy» atty maqalasyna qatysty osyndaı pikir bildirdi, dep habarlaıdy QazAqparat.

Bıylǵy jyl Elimizdiń tarıhyndaǵy erekshe jyl – Táýelsiz el bolǵanymyzǵa bıyl 30 jyl tolyp otyr. Osy jyldar ishinde talaı belesterdi baǵyndyrdyq. ǵasyrlarǵa bergisiz qyrýar ister atqaryldy.

Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev óziniń «Táýelsizdik Taǵylymy» atty maqalasynda táýelsizdik jolyndaǵy qıyn qystaý kezeńderdi aıryqsha tebirenispen baıandap, oı tolǵaǵan. Elbasy maqalasy egemendigimizdiń ótken tarıhyna qaıta úńilip shyǵýǵa jáne onyń árbir jylyndaǵy jalyndy isterdi saralaýǵa jeteleıdi.

Shyndyǵynda, Táýelsizdiktiń arqasynda Qazaq Eli barymen qaıta tabysyp, joǵalyp bara jatqan dúnıelerin jańǵyrtty – tilin tiriltti, dinin qaıtaryp, tarıhyn túgendedi. Elbasy N. Nazarbaev atap ótkendeı, Táýelsizdikti jarııalaý bir basqa bolsa, ony ustap turý, myǵym etý odan da kúrdeli, burynǵydan da qıyn másele bolǵany anyq.

Elbasy óz maqalasynda aıtqandaı «Táýelsizdigimizdi jarııalaǵanda bizdiń óz valıýtamyz da joq edi. Álemdik qarjy naryǵyn muqııat zertteı kelip, ulttyq teńgemizdi de der kezinde aınalymǵa engizdik». Rasynda, Odaq ydyraǵannan keıin Qazaqstanǵa tıgen basty mura aýqymy jaǵynan kóz kórip-bilmegen júıeli daǵdarys boldy. Bizdiń enshimizge básekege qabiletsiz ekonomıka, basqarýdyń eskilikti júıesi jáne qol-aıaǵy qursaýly memlekettik apparat tıdi. Bul biz bastan ótkergen alǵashqy eń aýyr da sozylmaly daǵdarys boldy. Sol kezde biz, qıynshylyqtarǵa tótep berip qana qoımaı, sonymen birge, makroekonomıkalyq turaqtylyqty qamtamasyz etip, uzaq merzimdi strategııalyq maqsattar, betburystyq sıpattaǵy reformalar júrgizdik. Bizdiń memleket táýelsizdiktiń 30 jylynda ekonomıkalyq, áleýmettik qýatty reformalardy jedel de tıimdi iske qosqan el atandy. Biz, bul jetistigimizge ult pen ulystyń tatýlyǵy, demokratııanyń berik negizderi men otandastarymyzdyń janqııarlyq eńbegi arqasynda qol jetkizdik.

Shyn máninde, táýelsizdikke qol jetkizgen sátten bastap, asa mańyzdy tarıhı sheshimder qabyldandy. Olardyń biri elimizdiń atom qarýynan óz erkimen bas tartýy álem tarıhyndaǵy mańyzdy sheshimderdiń biri boldy. Osylaısha bizdiń el – beıbitshilik ordasyna aınaldy.

Elbasymyz Táýelsizdik jolynda aıanbaı ter tógip, otyz jylǵa jýyq táýelsizdigimizdi tuǵyrly etip, elimizdi odan ári órkendetý jolynda el birligi men keleshegi úshin qyzmet etýde.

Táýelsizdikke qol jetkizgen soń, biz óz shekaramyzdy nyq shegendep, alpaýyt eldermen qarym-qatynasty bastadyq.

N.Nazarbaev óz maqalasynda osy qıyn kezeńderde qabyldanǵan sheshimder men bastamalarǵa erekshe toqtalǵan.

Sondaı bastamalardyń biri «Bolashaq» baǵdarlamasy boldy. Jahandyq arenada básekegege qabiletti, kásipqoı mamandardy daıarlaý maqsatynda «Bolashaq» baǵdarlamasymen oqytqan stýdentterimiz qazirgi kezde eline aıanbaı qyzmet etip, óz bilimderin halyqaralyq dárejede kórsetýde.

Qaısar halqymyz ben kemeńger Elbasymyzdyń arqasynda az ýaqytta terezesi álemniń alpaýyt elderimen teń memleketke aınaldyq.

Qazirgi zaman bilimdilerdiń zamany. Keleshek urpaq ata-babalary bilektiń kúshimen saqtap qalǵan jerin qalamnyń ushymen, ótkir bilimimen kórkeıtýi qajet.

Sonymen qatar, óz maqalasynda Elbasy «Eń bastysy – elimiz aman, urpaǵymyz azat. Biz alaqanǵa salyp ósirgen sol azat urpaq endigi jerde «Men Qazaqstanyma ne beremin?» degendi oılaýy kerek» - dedi.

Rasynda qazirgi ashyq aspan men táýelsiz ómir, ońaı jolmen kelgen joq. Endi, osy táýelsizdigimizdi nyǵaıtý maqsatynda aıanbaı eńbek etip, óskeleń urpaqqa úlgi bolý bizdiń mindet.

Elbasymyzdyń búgingi maqalasy, halqymyzǵa ónege, keleshek urpaqqa tarıh bolary sózsiz.

Memleketimizdiń myzǵymastyǵy men, táýelsizdigimizdiń tuǵyryn óz qalpynda ustap, kók týymyzdyń jelbireýine at salysyp, basqa qonǵan baqty baǵalaı bilý ár azamattyń mindeti.

Elbasymyzdyń kemel saıasaty qashan da jalǵasyn taýyp, halqymyzdy jarqyn bolashaqqa jeteleıtini sózsiz.

Egemen eldiń eńsesi bıik, Azat eldiń aspany ashyq bolsyn!



Joǵary qaraı