Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Táýelsizdiktiń 30 jyldyǵy Londonda toılandy

2021 jyldyń 7 jeltoqsan 2021 09:40

LONDON. QazAqparat - Londonda Táýelsizdiktiń 30 jyldyǵy sán-saltanatymen atalyp ótildi. Qazaqstannyń Ulybrıtanııadaǵy Elshiligi uıymdastyrǵan sharaǵa jergilikti saıası, ekonomıkalyq jáne mádenı ısteblıshmenttiń ókilderi, jýrnalıster, sheteldik dıplomattar jáne qazaq dıasporasy qatysyp, qýanyshqa ortaqtasty, dep habarlaıdy QazAqparat tilshisi.

1991 jyly Qazaqstan týraly Ulybrıtanııada kóp adam bile bermeıtin. El egemendigin alǵannan keıin týra bir aı ótken soń eki el arasynda dıplomatııalyq áriptestik ornatyldy. Búginde Birikken Koroldik Qazaqstan ekonomıkasynyń iri ınvestorlarynyń biri. 30 jyl ishinde kóptegen salalar boıynsha ekijaqty qarym-qatynastar ornatylyp, olar jańa sapalyq deńgeıge kóterildi.




Merekelik shara barysynda qonaqtarǵa, sondaı-aq, Táýelsizdik jyldaryndaǵy jetistikter men Qazaqstan-Brıtan qatynastary damýynyń negizgi kezeńderi týraly baıandaldy. Qazaqstannyń Birikken Koroldiktegi elshisi Erlan Ydyrysov tarıhı ólshem boıynsha qysqa ýaqyt ishinde memleketimizdiń Ortalyq Azııanyń iri ekonomıkasyna aınala alǵanyn atap ótti. Keshke Ulybrıtanııanyń Eýropa jáne Amerıka isteri jónindegi memlekettik mınıstri Vendı Morton arnaıy kelip, júrekjardy lebizin jetkizdi.




«Úsh onjyldyq kóleminde dıplomatııalyq áriptestigimiz nyǵaıyp keledi. Sizder taýarlar men qyzmetter saýdasynyń kólemi jylyna shamamen 1,4 mıllıard sterlıng fýnt bolatyn Ortalyq Azııadaǵy bizdiń iri seriktesimizsizder. Sonymen qatar Qazaqstan Ulybrıtanııanyń klımattyń ózgerýine qarsy kúrestegi negizgi jahandyq áriptesteriniń biri», - deıdi mınıstr.

Sharada «Qos arna» etnofolklorlyq ansambli Ulybrıtanııa jurtshylyǵyn ulttyq ónermen sýsyndatty. Jas ónerpazdar dombyra, qobyz, sybyzǵy jáne jetigende oınap, jınalǵandardy Uly dalanyń mýzykalyq jaýharlarymen tanystyrdy.

Aıda Jahanbek Ulybrıtanııadaǵy Sheffıld ýnıversıtetiniń mýzyka fakýltetinde oqıdy, al onyń inisi Azamat Qurmanǵazy atyndaǵy Qazaq ulttyq konservatorııasy Halyq mýzykasy fakýltetiniń stýdenti. Keshte olar «Shıli ózen» ánin jáne Nurǵısa Tilendıevtiń «Aqqý» kúıin naqyshyna keltirip oryndap, zor qoshemetke ıe boldy. Sonymen qatar ulttyq aspaptardyń súıemeldeýimen aǵylshyndarǵa etene tanys «Tóbemnen tamshylaǵan jańbyr» ánin aıtyp, kópshilikti tań-tamasha etti.




«Bul shyǵarmalardy tańdaǵan sebebimiz qazaq halqynyń árbir aspabyn jekeshelep kórsetý jáne de qazaq aspaptarymen tek qana dástúrli mýzykany ǵana emes soǵan qosa pop janryndaǵy jáne djaz janryndaǵy búkil ánderdi oryndaýǵa bolatyndyǵyn kórsetkimiz keldi», - deıdi Azamat Jahanbek.

«Qos arnany» tyńdaý arqyly men óte erekshe áserge bólendim. Ulttyq aspaptardyń daýsy ǵajap. Dombyradan basqalaryn buǵan deıin estimegen ekenmin. «Aqqý» kúıin oryndaǵan kezde sol qustardy kóz aldyma elestettim. Ásirese, aspaptardyń kúshimen olardyń daýsyn salǵan kezde ǵajap sezimge bólendim», - deıdi brıtanııalyq Djıl Braýn.

Qonaqtar otandyq sýretshiler men dızaınerlerdiń eńbekteri qoıylǵan kórmege qatysty. Atap aıtqanda olardyń nazaryna belgili sýretshi Aıǵana Ǵalıdiń eńbekteri, sondaı-aq Glazgodaǵy BUU klımattyń ózgerýi jónindegi halyqaralyq konferentsııasynda qoıylǵan Qazaqstan balalarynyń jahandyq jylyný taqyrybyndaǵy sýretteri usynyldy.




Kesh qonaqtaryn «Silk Road Fashion London» kompanııasynyń qoldaýymen qazaqstandyq dızaıner Aıdana Omarovanyń «Omabelle» brendiniń ulttyq kostıýmderin kıgen modelder qarsy alyp, shyǵaryp saldy. Sonymen qatar eski dástúr boıynsha «sarqyt» retinde Qazaqstan týraly jazylǵan kitaptar men aport almasy syıǵa tartyldy.



































Joǵary qaraı