Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Táýelsizdikke 30 jyl: Tarazda «Anaǵa taǵzym» ortalyǵy ashyldy

2021 jyldyń 11 qazan 2021 16:06

TARAZ. QazAqparat – El Táýelsizdiginiń 30 jyldyǵyna oraı Tarazda «Anaǵa taǵzym» ortalyǵy ashyldy, dep habarlaıdy QazAqparat tilshisi.

Oblys ákimi Berdibek Saparbaevtyń bastamasymen boı kótergen ortalyqtyń aldyna aqjaýlyqty analardyń qurmetine eńseli eskertkish ornatylǵan. Nysan jergilikti demeýshilerdiń kómegimen salynǵan. Mundaı ortalyq buǵan deıin Aqtóbede boı kóterse, elimiz boıynsha ekinshi bolyp Taraz qalasynda ashylyp otyr.

Saltanatty sharaǵa el anasyna aınalǵan tanymal tulǵalar, belgili azamattardy ómirge alyp kelgen aqjaýlyqtylar, sport pen ónerdegi názik jandylar, kásipker áıelder men qoǵam belsendileri qatysty.

Aımaq basshysy ótkenniń ónegesin búgingi jas býynnyń boıyna sińirý kerektigin aıtyp, ortalyqtyń aldaǵy ýaqytta atqaratyn jumysyna toqtaldy.




«Qazaqta «Anańdy Mekkege arqalap aparsań da, onyń aldyndaǵy boryshyńdy óteı almaısyń» degen sóz bar. Sondyqtan biz, bárimiz, ana aldynda basymyzdy ıemiz, olardy máńgi qurmetteımiz. Qandaı zamanda da abzal analarymyz halyqpen birge, erlerine súıenish, tirek bola bilgen. Bizdiń tarıhymyzda bedeldi, eleýli aqjaýlyqty analarymyz az bolmaǵan. Aısha-bıbi, Qyz Jibek, berisi Álııa men Mánshúk sekildi kóptegen názik jandylarymyz el ómirinde oıyp turyp oryn alady. Nebir qıyn-qystaý kezeńderde analarymyz tek otbasynyń uıytqysy bolyp qana qoımaı, aýyrlyqty eńserýge belsene aralasty.

Babalarymyzdan qalǵan «Áke uldy tárbıeleıdi, ana tutas ultty tárbıeleıdi» degen asyl sóz bar.

Ana men balany qoldaý, otbasylyq qundylyqtardy nyǵaıtý jáne damytý – memlekettiń áleýmettik saıasatynyń basty baǵyttarynyń biri. Osy oraıda paıdalanýǵa berilip otyrǵan «Anaǵa taǵzym» ortalyǵy bir jaǵynan sulýlyq pen izgiliktiń beınesi, ekinshi jaǵynan tutas elimizdiń damýyna uıytqy bolar Qazaqtyń anasy degen atqa laıyq, XXI ǵasyr áıeliniń qalyptasýyna yqpal etedi dep oılaımyn»,- dedi oblys ákimi.




Sondaı-aq, aımaq basshysy kópbalaly, az qamtylǵan analardyń máselelerine qulaq túrip, olardy sheshý jolyndaǵy ortalyqtyń atqarar qyzmetine toqtaldy. Usynys, oı-pikirler de barynsha eskerilmek. Qajet bolǵan jaǵdaıda, jergilikti atqarýshy organ ókilderi osynda shaqyrtylyp, qabyldaýlar men kezdesýler uıymdastyrylady.

QR Memlekettik syılyqtyń laýreaty, «Qunanbaı» fılminde Abaıdaı kemeńgerdiń asyl ájesi – Zereniń rólin somdaǵan Nursıfat Salyqova aqylman, danagóı uly analardyń izgi jolyn dáripteı otyryp, jas urpaqqa onyń ishinde qyz balalarǵa rýhanı-adamgershilik turǵyda tárbıe berýdi maqsat etken ortalyq jumysyna sáttilik tilep, aq batasyn berdi.




«Ortalyqtyń qyzmeti ótkenniń ónegesin, tarıhı-taǵylymyn jańa zamannyń talabymen sabaqtastyryp, búgingi qazaq áıeliniń ozyq obrazyn qalyptastyrýǵa baǵyttalyp otyrǵany qýantady. Aqylman analardyń tektiligin búgingi urpaqqa úlgi etip, boıyńa sińirý jolyndaǵy jumystar óz jemisin beredi dep senemin»,-dedi ol.

Kópbalaly ana Sapýra Erjanova analarǵa aıryqsha kóńil bólip otyrǵan memleket, oblys basshylyǵyna degen rızashylyǵyn jetkizdi.

Budan soń qonaqtarǵa ǵımarattyń qurylymy tanystyrylyp, qazaqy dástúrmen tusaý keser rásimi ótti.

«AraıStroıMarket» JShS bıznestiń áleýmettik jaýapkershiligi aıasynda syıǵa tartqan úsh qabatty ǵımarattyń barlyq zaly, dálizi ulttyq naqyshta bezendirilgen. Munda jas jáne kóp balaly analar úshin túrli kýrstar uıymdastyrylyp, psıhologııalyq jáne quqyqtyq turǵydan jan jaqty qoldaýlar kórsetiledi.




Ortalyqtaǵy «Mıras» ekspozıtsııalyq zalynda ulttyq salt-dástúrler barynsha nasıhattalady. Al, «Alqa» saltanat zaly jáne «Іnjý-marjan» ádebı-mýzykalyq qonaqjaı bólemesinde uly tulǵalar men el maqtanyshyna aınalǵan azamattardy ómirge ákelgen qaıratker analardyń jáne talantty názik jandylardyń portretteri ilingen.

Sondaı-aq, «Syrǵalym» syrlasý klýby, «Erke sylqym» horeografııalyq zaly, «Qyzǵaldaq» ulttyq ekotárbıe klýby, «Syrly álem» beıneleý óneri jáne «Ana tili» sheshendik óner mektepteri, «Qazyna» ulttyq aspaptar synyby, «Yntymaq» kovorkıng zaly, «Bereke» aspazdyq jáne «Boıtumar» qolóner jáne dızaın stýdııalary jumys isteıdi.





Joǵary qaraı