Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Táýelsizdikke - 30 jyl: Almatyda qandaı sharalar ótedi

2021 jyldyń 16 shilde 2021 12:52

ALMATY. QazAqparat- Almatyda Qazaqstan Táýelsizdiginiń 30 jyldyǵyn merekeleý aıasynda «Qaıyrymdy ister marafony» jalpyulttyq jobasy júzege asyp jatyr. Almaty qalasy qoǵamdyq damý basqarmasy basshysynyń orynbasary Renat Bekbergenov Óńirlik kommýnıkatsııalar qyzmetinde ótken baspasóz konferentsııasynda júzege asqan jáne josparlanǵan is-sharalar týraly aıtty, dep habarlaıdy QazAqparat tilshisi.

Spıkerdiń aıtýynsha, 2021 jyly «Qaıyrymdy ister marafony» aıasynda respýblıkalyq jáne qalalyq deńgeıde 935 is-shara ótkizý josparlanǵan.

Almatydaǵy barlyq is-shara sımvolıkalyq túrde ótedi jáne ataýly kún men merekelerge arnalady.

«Mysaly, maýsym aıynda Almatyda memlekettik rámizder kúnine, medıtsına qyzmetkerleri kúnine jáne polıtsııa kúnine arnalǵan 70-ten astam túrli formattaǵy is-sharalar ótti. Turǵyn úı terezelerine jalaýlar qoıylyp, ánuran bir mezgilde oryndaldy. Adam kóp jınalatyn aýmaqta memlekettik tý taratylyp, jalaýlary bar avtokólikter men motojarystar ótti», – dedi Renat Bekbergenov.

Shilde aıynda megapolıste QR astanasy kúnine arnalǵan shara onlaın jáne offlaın formatta ashyq aspan astynda ótti.

«Qalada mańyzdy oqıǵalar boldy. 25 ónerkásiptik jáne áleýmettik-mádenı nysandar paıdalanýǵa berildi. Sonyń ishinde Qazaqstan-Shveıtsarııa týrızm jáne qonaq úı bıznesi ınstıtýty, «Ads Industries» farmzaýyty, «Terrenkýr» jaıaý júrginshiler aımaǵy, jańa balabaqsha men mektepter ashyldy», – dedi Qoǵamdyq damý basqarmasynyń ókili.

Ekinshi jartyjyldyqta qala ákimdigi «Qaıyrymdy ister marafony» aıasynda 800-den astam is-shara ótkizý josparda.

«Tamyz aıynyń sońy men qyrkúıek aıynyń basynda pedagog qyzmetkerlerdiń tamyz konferentsııasyn, Qazaqstan Respýblıkasynyń Konstıtýtsııa kúnine arnalǵan aýqymdy is-sharalardy ótkizý josparlanǵan. Sondaı-aq Almatyda «Táýelsizdik jetistikteri» taqyrybynda biryńǵaı qalalyq synyp saǵaty men ashyq sabaqtar ótedi. Sonymen qatar Ybyraı Altynsarınge eskertkish pen 13 jańa bilim berý nysanyn ashý josparda», – dedi spıker.

Jyl sońynda Almaty turǵyndaryn kóptegen qyzyqty oqıǵalar kútýde. Mysaly, qarasha aıynda ındýstrııalyq-ınnovatsııalyq jáne áleýmettik nysandardy iske qosý, «Almaty – Táýelsizdiktiń altyn besigi» respýblıkalyq forýmy jáne «Creative jastar» ınnovatsııalyq jobalar baıqaýy ótedi.

Jeltoqsan aıynda qalada tuńǵysh Prezıdent kúnine arnalǵan «Táýelsizdik shejiresi» taqyryptyq kórme, ǵylymı-praktıkalyq konferentsııalar josparlanǵan.

Jeltoqsan oqıǵasynyń 35 jyldyǵyna arnalǵan ataýly kúnge erekshe nazar aýdaryldy.

Ataýly kún qarsańynda qaıyrymdylyq sharasyn ótkizý kózdelgen. Onda muqtaj jandarǵa qajetti qoldaý kórsetiledi.

«Qaıyrymdy ister marafony» – bul mereke ǵana emes, eń aldymen qaıyrymdylyq mıssııasy. Jobanyń arqasynda muqtaj otbasylarǵa azyq-túlik jıyntyǵy túrinde materıaldyq qoldaý kórsetiledi, turǵyn úıdi jóndeýge múmkindik beredi. Barlyǵy 22 myńǵa jýyq almatylyq qoldaý aldy»,- dedi Renat Bekbergenov.

Almaty qalasy «Qazaqstan uıǵyrlarynyń respýblıkalyq mádenı ortalyǵy» qoǵamdyq birlestiginiń ókildigi tóraǵasynyń orynbasary Dolkýntaı Abdýhalıldiń aıtýynsha, «Qaıyrymdy ister marafonyna» megapolıs kásipkerleri belsendilik tanytyp jatyr.

«Mysaly, «Metal Prom Group» kompanııa toby ótken jyly qaıyrymdylyqqa 105 mln teńge jumsady. Jalpy, sońǵy úsh jylda muqtaj jandarǵa 450 mln teńge kóleminde qaıyrymdylyq kómek kórsetildi. Aıta ketý kerek, bul kompanııa úshin kómek tek joǵary gýmanıstik áreket emes. Óıtkeni kásiporynnyń mindeti – adaldyq, eńbeksúıgishtik, sapa, memleketke jáne adamdarǵa paıda ákelý. Kásiporyn qoǵamdaǵy áleýmettik mańyzdy máselelerdi sheshýge kómektesýge daıyn», – dedi Dolkýntaı Abdýhalıl.

Onyń aıtýynsha, barlyq kásipkerler úshin qaıyrymdylyq sharasy - kásiptiń áleýmettik jaýapkershiliginiń kórinisi.


Joǵary qaraı