Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Táýelsizdik jyldary: Mańǵystaýda 1 100 shaqyrym jol salynyp, 3 temir jol iske qosyldy

2021 jyldyń 30 qarasha 2021 16:27

AQTAÝ. QazAqparat - Mańǵystaý oblysynda 30 jylda 1 100 shaqyrym avtomobıl joly salynyp, úsh temir jol iske qosyldy, dep habarlaıdy QazAqparat.

Mańǵystaýdyń shekaralyq oblys retinde tranzıt, kólik-logıstıka jáne ınfraqurylym áleýetiniń artýy – táýelsizdik jyldarynyń jemisi. Shalǵaıda jatqan Mańǵystaýda temir joly, teńiz jáne avtomobıl joldary qatar damyp, búginde toǵyz joldyń torabyna aınaldy.

Táýelsiz Qazaqstan tarıhynda tuńǵysh ret Kavkaz, Túrkııa arqyly Eýropa elderine jańa baǵyt ashyldy. Qazaqtyń ekinshi teńiz porty boı kóterdi. Quryq porty búginde Transkaspıı halyqaralyq kólik baǵdarynyń mańyzdy túıinine aınaldy. Teńiz aılaǵy arqyly jylyna 2 mln tonnadaı júk tasymaldanýda.

Táýelsizdik tuǵyry ornaǵan 30 jylda óńirde jańa temir joldary iske qosyldy. Úsh memleketti jalǵaıtyn «Ózen–Bereket–Gorgan» halyqaralyq temir jol dálizi ashyldy. «Borjaqty-Ersaı» jáne «Beıneý-Shalqar» temir joldary salyndy.

Ótken ǵasyrdyń 90-shy jyldary oblystaǵy avtomobıl joldarynyń uzyndyǵy 1 778 shaqyrymdy quraǵan. Táýelsizdik alǵan jyldan bastap taǵy 1 myń shaqyrymnan astam jol salyndy, tozyǵy jetken 2 myńǵa jýyq jol jóndeýden ótkizildi.

2020 jyly óńirdegi 154 shaqyrym jolǵa asfalt jabyndysy tóseldi. 149 shaqyrymdy qamtıtyn 8 jol qaıta jańartyldy. Al bıyl oblystyq jáne aýdandyq mańyzdaǵy 12 jol qaıta qalpyna keltirilýde. Atap aıtqanda, «Jyńǵyldy – Shaıyr - Sherqala» (29 km), «Shetpe-Qyzan» (Tasmuryn-Mastek ýchaskesi, (36 km), «Shetpe-Qyzan» (Mastek-Qyzan ýchaskesi, 25 km), MAEK sý jınaý kanalynan «Quryq» paromdy keshenine deıingi avtomobıl jolyn rekonstrýktsııalaý (27 km), «Aqtaý-Fort-Shevchenko» 5-29 km (24 km), «Honda» ortalyǵynan Ómirzaq aýylyna deıingi jol (4,5 km), «Basqudyq aýylynan bastap Mańǵystaý aýylyna deıingi 10 shaqyrym avtomobıl joly» (10 km).

Aqtaýdyń irgesindegi jyly jaǵajaıǵa deıin jańa jol tóseldi. Bul óńirdegi týrızmdi damytýǵa múmkindik beredi.

2022 jyly QR Indýstrııa jáne ınfraqurylymdyq damý mınıstrligi ftarapynan 6 jobany qarjylandyrýǵa qoldaý kórsetildi. Keler jyly «Basqudyq aýylynan bastap Mańǵystaý aýylyna deıingi 10 shaqyrym avtomobıl joly», «Munaıly aýdany Basqudyq aýylyn 4,3 shaqyrym aınalma joldy salý, «MAEK» sý jınaý kanalynan «Quryq» parom keshenine deıin 37 shaqyrym avtomobıl jolyn qaıta jańartý, «Jyńǵyldy – Shaıyr –Sherqala», «Shetpe-Qyzan» jolynyń «Tasmuryn – Mástek, Mástek-Qyzan aralyǵyna asfalt tóseý jumystary júrgiziledi, dedi oblystyq avtomobıl joldary basqarmasynyń basshysy Adaıbek Qalıev.

Sonymen birge, Mańǵystaý oblysynyń 2021-2025 jyldarǵa arnalǵan keshendi damý josparyna sáıkes, óńirdiń kólik ınfraqurylymyn odan ári damytý maqsatynda respýblıkalyq mańyzdaǵy «Beıneý-Shalqar» jáne «Jańaózen-Túrikmenstan shekarasy» avtomobıl joldaryn salý josparlanyp otyr.


Joǵary qaraı