Aýa raıy
Astana 27 °S
Almaty 30 °S
valıýta baǵamy
USD 409.98
EUR 462.21
RUB 5.75
CNY 58.43

Tarazda tozyǵy jetken  úıler kúrdeli jóndeýden ótýde

2019 jyldyń 20 qazan 2019 07:29

TARAZ. QazAqparat –Taraz qalasynda eskirgen 80 kópppáterli turǵyn úıdi kelesi jyly kúrdeli jóndeýden ótkizý josparlanyp otyr, dep habarlaıdy QazAqparat tilshisi.

Qalalarda ornalasqan kópqabatty turǵyn úılerdi jóndeý máselesi kóp jyldardan beri kún tártibinen túspeı keldi. Shatyrdan sý aǵyp, jertóleler isten shyǵyp, jergilikti jurtshylyqtyń shamyna tıgeni jasyryn emes. Keıingi jyldary bul túıtkilder turǵyn úı-kommýnaldyq sharýashylyqty jańǵyrtýdyń memlekettik baǵdarlamasy aıasynda, keıinirek óńirlerdi damytýdyń 2020 jylǵa deıingi baǵdarlamasy sheńberinde qarqyn ala tústi. Búginde tarazdyqtar da bul baǵdarlamalardyń tıimdiligin kóre bastady desek qatelespeımiz.

Aıta keteıik, aǵymdaǵy jyly Taraz qalasynda barlyǵy 989,6 mıllıon teńgege eskirgen 25 úıge jóndeý jumystary júrgizilýde. Onyń 540 mıllıon teńgesi qala bıýdjeti esebinen qarastyrylsa, qalǵan qarajat aldyńǵy jóndeý jumystary júrgizilgen úılerden qaıtarym qarjy esebinen.

Solardyń biri retinde qalanyń «Aqbulaq» shaǵynaýdanyndaǵy №9, №17 úılerdegi júrgizilgen kúrdeli jóndeý jumystaryn aıtsaq ta bolady. Atalǵan turǵyn úıler 1966 jyly salynǵan, 5 qabatty, 70 páterli. Óz kezeginde turǵyn úılerdiń shatyrlary, jylý, ystyq jáne muzdaı sý, káriz, elektr júıeleri aýystyrylyp, kireberisteri kúrdeli jóndeýden ótýde. Jóndeý jumystarynyń jalpy quny 292 945 myń teńgeni quraıdy.

«Aǵymdaǵy jyly Taraz qalasynda barlyǵy 989,6 mıllıon teńgege 25 úıge jóndeý jumystary júrgizilýde. 540 mln teńge qala bıýdjeti esebinen bolsa, qalǵan qarajat aldyńǵy jóndeý jumystary júrgizilgen úılerden qaıtarym qarjy esebinen. Búgingi tańda qala boıynsha barlyǵy 1298 kóppáterli turǵyn úı bar. Onyń ishinde búgingi kúnge 300-ge jýyq úı kúrdeli jóndeý jumystaryn qajet etedi»,-deıdi oblys ákimdiginiń qurylys basqarmasynyń basshysy Jaıyqbaı Shaldarbekov.

Basqarma basshysy keler jylǵa 3,4 mıllıard teńgege 80 úıdiń jóndeý jumystary josparlanyp otyrǵanyn jetkizdi. Ol úshin respýblıkalyq qazynadan qarajat bólýge Qurylys komıtetine bıýdjettik ótinim tapsyrylǵan.

Avtor Janǵazy Ahmetov
Basty sózder: Jambyl oblysy, Turǵyn úı,
Joǵary qaraı