Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Taldyqorǵanda er adam kósheden taýyp alǵan 11 tapansha men 1  avtomatty polıtsııaǵa tapsyrǵan

2022 jyldyń 19 qańtar 2022 14:14

TALDYQORǴAN. QazAqparat - Almaty oblysynyń 40 jastaǵy turǵyny qańtar aıynyń basynda oryn alǵan jappaı tártipsizdik kezinde Taldyqorǵan qalasynyń kósheleriniń birinen birneshe qarý-jaraq taýyp alyp, erikti túrde polıtsııa organdaryna tabys etken, dep habarlaıdy QazAqparat tilshisi.

Almaty oblystyq Polıtsııa departamenti baspasóz qyzmetiniń málimetinshe, quqyq qorǵaý organdarynyń eskertýlerin basshylyqqa alǵan turǵyn tekserýden keıin jaýapkershilikten bosatyldy.

«Barlyq turǵyndardy taýyp alǵan zańsyz qarý-jaraqtardy esh oılanbastan polıtsııaǵa tapsyrýǵa shaqyramyn. Osy áreketterińiz Sizderge sotqa deıingi tergeý amaldary kezinde kóp kómek kórsetedi. Men Іshki ister mınıstrliginiń turǵyndarǵa joldaǵan úndeýin eskerip, 5 qańtarda Taldyqorǵan qalasyndaǵy jappaı tártipsizdik kezinde taýyp alǵan 11 tapansha men 1 dana avtomatty jaǵdaı turaqtalǵan soń tártip saqshylaryna tabystadym. Osy arqyly barlyq jaýapkershilikten bosatyldym»,- deıdi turǵyn óz úndeýinde.

Esterińizge sala keteıik, buǵan deıin QR Іshki ister mınıstrligi elimizdiń turǵyndaryna zańsyz saqtalǵan atys qarýy men oq-dárilerdi óz erkimen tapsyrý týraly úndeý jarııalaǵan bolatyn. Tártip saqshylary eldegi jappaı tártipsizdikter barysynda urlanǵan qarý men oq-dáriler zańsyz maqsattar úshin paıdalanýy, sondaı-aq azamattardyń ómiri men densaýlyǵyna qaýip tóndirýi múmkin ekenin eskertken.

«Qarý men oq-dárilerdi zańsyz saqtaǵany úshin qylmystyq (QK 287-baby – 5 jylǵa deıin bas bostandyǵynan aıyrý) jáne ákimshilik (QR ÁQBtK 482-baby-25 AEK aıyppul) jaýapkershilik kózdelgenin qaperlerińizge salamyz. Zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamdar, eger olardyń is-áreketterinde ózge qylmystar quramy bolmasa, qylmystyq jáne ákimshilik jaýapkershilikten bosatylady»- delingen vedomstvo taratqan úndeýde.

Almaty oblysynyń polıtseıleri azamattardy zańsyz saqtalǵan qarýdy, oq-dárilerdi, jarylǵysh zattardy jáne arnaıy quraldardy óz erkimen tapsyrýǵa shaqyrady. Sonymen qatar, qoǵamdyq qaýipsizdik úshin qarýlar men jarylǵysh zattardy paıdalanbaýdy, olardy múldem tasymaldamaýdy, jaýapkershilikke tartylmas úshin birden polıtsııaǵa 102 nemese 112 telefondary arqyly habar berýdi suraıdy.


Joǵary qaraı