Statıstıkamen eshkim oınap otyrǵan joq – Shoranov indet juqtyrǵandar jaıly

NUR-SULTAN. QazAqparat – Óńirlerde koronavırýsty juqtyrý statıstıkasyn ádeıi burmalaý jaǵdaıy tirkeldi me? Ortalyq kommýnıkatsııalar qyzmetiniń alańynda tilshilerdiń bul suraǵy Densaýlyq saqtaý birinshi vıtse-mınıstri Marat Shoranovqa qoıyldy, dep habarlaıdy QazAqparat tilshisi.

«Mundaı faktiler bolǵan joq. Buryn medıtsınalyq statıstıka aı saıyn jınalatyn. Koronavırýs paıda bolǵannan keıin KVI+ statıstıkasyn kún saıyn jınaı bastadyq. KVI+ statıstıkasyn apta saıyn dúısenbide berip otyrǵan sebebimizdi túsindirdik. Ózińiz aıtqandaı, statıstıkamen oınap otyrǵan azamattar joq», - dedi Marat Shoranov.

Eske sala ketsek búgin, ıaǵnı 27 qańtar kúni tańerteń Qazaqstanda koronavırýspen aýyrǵandardyń jalpy sany 181 117-ge jetkeni habarlanǵan bolatyn. El ishindegi indetti toqtatý úshin 1 aqpannan bastap vaktsınalaý bastalady.

«Jalpy jyl sońyna deıin 6 mln adamǵa ekpe salýdy josparlap otyrmyz. Alaıda mundaı kólemdegi vaktsına naryqta bolýy kerek. Bul tegin medıtsınalyq kómektiń kepildik berilgen kólemi aıasynda vaktsınatsııa tegin bolady. Elde vaktsınalaýdy memleket esebinen júrgizý qarastyrylyp jatyr. Úkimet rezervinen tıisti qarajat bólinedi. Tıisinshe vaktsınalaý tegin bolady», - deıdi Marat Shoranov.