Aýa raıy
Astana 9 °S
Almaty 15 °S
valıýta baǵamy
USD 421.58
EUR 496.83
RUB 5.53
CNY 62.20

Smolensk túbinde qaza tapqan qazaq sarbazynyń súıegi týǵan elinde qaıta jerlendi

2020 jyldyń 14 maýsym 2020 17:50

SEMEI. QazAqparat - Smolensk túbinde qaza tapqan qazaq sarbazynyń súıekteri otanynda qaıta jerlendi, dep habarlaıdy QazAqparat Qorǵanys mınıstrligine silteme jasap.

Ekinshi dúnıejúzilik soǵysta Smolensk túbinde qaza tapqan qazaqstandyq jaýynger Ómirzaq Qazanqapovtyń súıegi týǵan jerinde qaıta jerlendi. Arnaıy bort arqyly ol Reseıden Qazaqstanǵa, sarbazdyń týǵan jeri Semeı qalasyna jetkizildi.

Eske alý rásimi Semeı garnızonynyń ofıtserler úıinde ótti. Sharaǵa «Shyǵys» óńirlik qolbasshylyǵy áskerleri basshylyǵy, qalalyq ákimdik pen qalalyq soǵys jáne eńbek ardagerleri Keńesiniń ókilderi jáne jaýyngerdiń týystary qatysty.

Ómirzaq Qazanqapov 120-shy jeke atqyshtar brıgadasynyń quramynda Rjev-Sychev shabýyl operatsııasyna qatysqan kezde 1942 jyldyń 14 tamyzynda qaza tapqan. 78 jyldan keıin týystary onyń qaza tapqan jerin bilip, týǵan jerinde qaıta jer qoınyna tapsyra aldy.




Soldattyń súıegin «Poısk» Máskeý qoǵamdyq uıymynyń «Kobalt» izdeý jasaǵy Smolensk oblysy Temkın aýdanynyń aýmaǵyna dalalyq shyǵý kezinde tapty. Áskerı qyzmetshi týraly aqparat 1925 jylǵy úlgidegi jaqsy saqtalǵan soldat medalonynyń blanki negizinde anyqtaldy.

Іzdeý jasaǵy sarbazdyń týǵan-týystaryn uzaq ýaqyt izdedi. Nátıjesinde Semeı qalasynan shóberesi Omarǵalı Madııar men Pavlodardan shóberesi Lázzat Qazanqapova tabyldy. «Kobalt» izdestirý jasaǵynyń komandıri sarbazdyń súıekterimen birge týystaryna onyń jeke zattaryn tabys etti. Atap aıtqanda, kaska, saperlik kúrek, sabyn salǵysh, saptyaıaq, medalon, ramkadaǵy japsyrma, tarıhı anyqtama jáne qujattary bar medal.

«Shyǵys» óńirlik qolbasshylyǵy áskerleriniń qolbasshysy atap ótkendeı, jeńis – álem tarıhyndaǵy erekshe oqıǵa. Bul soǵysqa 1,2 mıllıon qazaqstandyq attanyp, onyń 600 myńnan astamy qaıtyp oralmady. Soǵystan oralmaǵan 270 myńǵa jýyq sarbaz ben ofıtser iz-túzsiz joǵalyp ketken.

«Biz soǵystan qaıtyp oralmaǵan Ómirzaq Qazanqapovtyń jarqyn esteligine bas ıemiz. Erlikpen qaza tapqan adamdy qaıǵyra eske alamyz. Soǵys batyrlaryn máńgi este saqtaý úshin tynymsyz izdeý jumystaryn júrgizýge belsendi qatysqan barlyq azamattarǵa úlken alǵys aıtqym keledi», – dedi general-maıor Asan Júsipov.

Qaza tapqan sarbazdyń súıegi Semeı qalasyndaǵy zıratqa áskerı qurmetpen qaıta jerlendi.






Joǵary qaraı