Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Smaılov komandasy durys jumys isteýi kerek - Jabal Erǵalıev

2022 jyldyń 13 qańtar 2022 04:49

KÓKShETAÝ. QazAqparat – Memleket basshysy Qasym-Jomart Toqaevtyń ázirge halyqtyń eki ıyǵynan basyp, eńsesin kótertpeı qoıǵan biraz máselelerdiń sheshimin aıtyp, jańa Úkimetke naqtyly tapsyrma bergeni qýantady. «Aqmola-Tirshilik» jaýapkershiligi shekteýli seriktestiginiń dırektory, Aqmola oblysy qoǵamdyq keńesiniń múshesi Jabal Erǵalıev osylaı aıtty, dep habarlaıdy QazAqparat tilshisi.

«Qazaqta «eliń tynysh bolsa sen de tynysh bolarsyń» degen sóz bar. Sol ras eken! Jańa jyldyq merekeli kúnderimiz alań kóńilmen ótti. Áıteýir Memleket basshysy Qasym-Jomart Toqaevtyń batyl ári durys sheshimdi jedel qabyldaı bilýiniń arqasynda Táýelsizdik týy jyǵylmaı qaldy. Osy oraıda Prezıdent Qazaqstan Respýblıkasy Parlamenti Májilisiniń otyrysynda sóılegen sózinde: «Elimiz dýshar bolǵan aýyr qasirettiń sebepterin saralap, onyń saldaryna naqty baǵa berý – aldymyzda turǵan óte mańyzdy mindet»,-dep atap kórsetti.

Taǵy da sabyr saqtap, jel sózge ermeı, báriniń saldary men sebebiniń anyǵy men qanyǵy belgili bolǵan jaǵdaıda oı qosarmyz. Alaıda, elimizdiń batysy men ońtústiginde dinniń jat aǵymdary tarap jatqandyǵy jáne de olardyń erkinsýlerine jol berilip jatqandyǵy erteden belgili de bolǵan-dy. Dinı ekstremızm ana bir jyldary Aqtóbede bas kóterip, bul qaýiptiń bar ekendigin ańdatyp edi ǵoı. Ekstremıstik din aǵymdary óz elimizdegi áldebir toptarǵa qajet te boldy ma eken? Ne de bolsa elimizdiń qaýipsizdigi máselesin oılaǵan sátte aldaǵy ýaqytta osy jaıdyń da este bolǵany kerek», - dedi Jabal Erǵalıev.

Sonymen birge ol Memleket basshysy osy jolǵy sózinde halyqtyń uzaq jyldar boıy kútken sózin aıtqanyn atap ótti.

«Qasym-Jomart Kemelulynyń «Bizge keregi aqıqat qana!» degen bir aýyz sóziniń túp-tórkinin uǵyna bilsek Qazaqstanda ádildik pen aqıqat joly endi bastalyp, sol ádildik pen aqıqat kúni endi týatyn bolady. Ádildigi men adaldyǵy joq qoǵamnyń sotynan sol ádildik izdeýdiń ózi bekershilik ekendigine kózderi de jetken qara halyqtyń saly sýǵa ketti. Amaldary taýsyldy. Qańtar oqıǵasynyń oryn alýyna da osy túrtki bolǵan syńaıly», - dep tolyqtyrdy Jabal Erǵalıev.

Ol atap ótkendeı, endigi arada júıeniń jumys isteýin qolǵa alǵan abzal, ıaǵnı sol júıeniń ár tetigin qolyna ustap otyrǵan kadrlar jeke bastyń qamy emes, memlekettiń, halyqtyń ıgiligi úshin jumys isteýleri qajet.

«Memleket basshysy Qasym-Jomart Toqaev ázirge halyqtyń eki ıyǵynan basyp, eńsesin kótertpeı qoıǵan biraz máselelerdiń sheshimin aıtyp, jańa Úkimetke naqtyly tapsyrma bergeni qýantady. Sóz arasynda aıtar bolsam, Álıhan Smaılov bastaǵan jańa Úkimet endi ózderin halyqtyń Úkimetimiz dep jumys isteýge tıisti. Memleket basshysy elimizde keń kólemdi saıası reformalar júrgizilip jatqandyǵyn jáne ol jalǵasatyn málimdedi. Óte oryndy! Óıtkeni qoǵamdy bıýrokratııa keseli jaılap bara jatqandyǵy jáne bul keselden bárimizdiń de aıyǵýymyz kerektigin aıtty. Endigi arada sol saıası reformalardyń tabysty ári nátıjeli bolýy úshin kókeıde júrge óz oı-pikrilerimzdi eshkimniń ar-namysyna tımeı, bıliktiń qulaǵyna baıypty jetkize bileıik. Biz «halyq únine qulaq asatyn» qoǵamda ómir súrip jatyrmyz. Prezıdent óz sózinde «Bárimiz bul oqıǵadan sabaq alýymyz kerek. Eń bastysy, bereke-birlikti, tynyshtyq pen turaqtylyqty saqtaýymyz qajet. Endi, Qazaqstanda damýdyń jańa kezeńi bastalady. Bul shynaıy jańarý kezeńi bolady»,-dep senimdi aıtty. Qazaqstandyqtar biz de, elimizdiń shynaıy jańarý kezeńi bastalyp ketkendigin bilip, tanyp otyrmyz!», - dep túıindedi Jabal Erǵalıev.


Joǵary qaraı