Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

SQO turǵynynyń kollektsııasynda 90-ǵa jýyq órt sóndirý kóliginiń kishireıtilgen nusqasy  bar

2022 jyldyń 15 qańtar 2022 20:49

PETROPAVL. QazAqparat – Petropavl turǵyny órt sóndirý kólikteriniń 90-ǵa jýyq kishireıtilgen nusqasyn jınaǵan. Onyń kollektsııasynda jergilikti sheberlerdiń qolynan shyqqan mashınalar da bar, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, azamattyq qorǵanys polkovnıgi Dmıtrıı Rastıhınniń kollektsııasy kádesyı dúkeninen satyp alynǵan órt sóndirý mashınasymen bastalǵan eken. 2016 jyly jol túsip Sankt-Peterbor qalasyna barǵan órt sóndirýshiniń kózine oıynshyq ottaı basylady. Ony ulyna dep syılyqqa satyp ákeledi. Keıin oǵan birtindep jańa túrleri – avtotsısternalar, avtosaty, jedel avtomobılder, arnaıy jabdyqtary bar mashınalar qosyla bastaıdy.

Órt sóndirýshiniń aıtýynsha, kollektsııasyndaǵy qundy modelderdiń biri - petropavldyq sheber ıÝrıı Rodıonov jasaǵan jyljymaly órt sóndirý sý qoımasynyń dál kóshirmesi. Munyń álemde teńdesi joq. Óıtkeni bul biregeı órt sóndirý kóligi sońǵy ýaqytqa deıin Qazaqstanda jalǵyz boldy.

«Órt sóndirý isi ǵasyrlar boıy damyp keledi, sondyqtan arnaıy tehnıkanyń kóptegen túri bar. Máselen 2000 jyldardyń basynda órt sóndirýshiler KAMAZ bazasyndaǵy vakýýmdy órt sóndirý avtomobılin qaıta jasap, oǵan syıymdylyǵy 10 tonna 2 órt tsısternasyn jáne sekýndyna 40 lıtr sý soratyn qýatty sorǵyny ornatty. Ol kezde mundaı syıymdylyqtaǵy mashınalar bolǵan joq. Bul tehnıka ásirese kóp sý qajet etetin aýqymdy órtterde qoldanylady. «Órt sóndirýshiler oqıǵa ornyna sýsyz keledi» degen bos sóz. Óıtkeni sý birneshe mınýt ishinde bitip, tsısternany qaıta toltyrý qajet. Al órt kezinde ár sekýnd qymbat. «PPV – 10» qazir de sapta, órt sóndirý kezinde qoldanylyp keledi», - deıdi Dmıtrıı Rastıhın.

Órt sóndirýshige kollektsııasyndaǵy ár mashına qymbat. Onyń bireýin ınternet arqyly tapsyrys berip aldyrsa, endi birin onyń hobbıi týraly biletin dostary syılaǵan. Germanııadan joldasy arnaıy ákelgen oıynshyq ta bar.

«Meniń toptamamda balabaqsha tárbıelenýshileri 3D prınterimen basyp shyǵarǵan órt sóndirýshi kóligi bar. Biz balabaqshalarmen jaqsy baılanys ornatqanbyz. Mektepke deıingi mekemelerdiń balalarymen profılaktıkalyq áńgimeler, vıktorınalar, órtke qarsy oıyndar ótkiziledi. Shekteýli serııamen shyqqan jáne menshikti rettik nómiri bar kólikterdiń modelderi de toptamamda saqtalǵan», - deıdi Petropavl turǵyny.

Dmıtrıı Rastıhın órt sóndirý salasynda 17 jyl eńbek etip keledi. Ol qarapaıym ınspektordan SQO TJ departamentiniń memlekettik órt baqylaý basqarmasynyń bastyǵyna deıin ósti. Birneshe ret órtke shyǵyp, tilsiz jaýmen kúresti.


Joǵary qaraı